4 Felisa Lipelaelo

“Uena ea nang le tumelo e nyenyane, ke hobane’ng ha u ile ua itesella ho belaela?”—Matheu 14:31.

LITŠITISO KE LIFE? Ka linako tse ling, esita le barutuoa ba Jesu ba ne ba e-ba le lipelaelo. (Matheu 14:30; Luka 24:36-39; Johanne 20:24, 25) Ha e le hantle, Bibele e hlalosa hore ho hloka tumelo ke “sebe se re tšoasang habonolo.” (Baheberu 12:1) Moapostola Pauluse o ngotse: “Hase batho bohle ba nang le tumelo.” (2 Bathesalonika 3:2) Sena hase bolele hore ho hang ba bang ba ke ke ba e-ba le tumelo. Ha e le hantle, ba bangata ha ba sebetse ka thata e le hore ba be le eona. Molimo o tla hlohonolofatsa boiteko ba batho ba sebetsang ka thata hore ba be le tumelo.

U KA HLŌLA LITŠITISO JOANG? Qolla lintho tse etsang hore u be le lipelaelo. Ka mohlala, morutuoa Thomase o ile a belaella taba ea hore Jesu o tsositsoe, le hoja barutuoa ba bang ba ne ba re ba mo bone. Thomase o ne a batla bopaki.  Phello e bile efe? Jesu o ile a mo fa bopaki boo a neng a bo hloka e le hore a be le tumelo e matla.—Johanne 20:24-29.

A sebelisa Bibele, Jehova Molimo o re fa likarabo tseo re li hlokang e le hore re felise lipelaelo tsa rōna. Ka mohlala, ba bangata ba felloa ke tumelo ho Molimo hobane ba mo beha molato ka ho toba kapa ka tsela e sa tobang ka lebaka la lintoa, pefo le masisa-pelo a hlahelang batho. Bibele e re’ng tabeng ee?

Molimo ha a buse ka mebuso ea batho. Jesu o ile a re moea o sa bonahaleng o bitsoang Satane ke “musi oa lefatše.” (Johanne 14:30) Satane o ile a re o tla fa Jesu bolaoli ba mebuso eohle ea lefatše ha a ka etsa ketso e le ’ngoe ea ho mo rapela, a re: “Ke tla u fa bolaoli bona bohle le khanya ea eona, hobane ke bo nehiloe, ’me ke bo fa leha e le mang eo ke lakatsang ho mo fa bona.” Jesu ha aa ka a hana taba ea hore Satane o na le bolaoli boo. Ho e-na le hoo, Jesu o ile a re: “Ho ngoliloe, ‘Ke Jehova Molimo oa hao eo u tla mo rapela, ’me ke eena feela eo u tla mo etsetsa tšebeletso e halalelang.’” (Luka 4:5-8) Mahlomola ’ohle a teng lefatšeng ha aa bakoe ke Molimo, empa a bakoa ke Satane le mebuso ea batho.—Tšenolo 12:9, 12.

Haufinyane Jehova Molimo o tla felisa lintho tsohle tse bakang mahlomola. O se a ntse a lokiselitse ’Muso, kapa puso e eteletsoeng pele ke Mora oa hae, Kreste Jesu, hore o buse moloko oa batho. (Matheu 6:9, 10; 1 Bakorinthe 15:20-28) Ho phethahala boprofeta ba Bibele hobane hona joale ho boleloa litaba tse molemo tsa ’Muso ona lefatšeng lohle. (Matheu 24:14) Haufinyane, ’Muso ona o tla felisa bohle ba khahlanong le oona o be o felise le lintho tse bakelang batho mahlomola.—Daniele 2:44; Matheu 25:31-33, 46; Tšenolo 21:3, 4.

HO NA LE MOPUTSO OFE? Ba inehellang lipelaelo ba tšoana le maqhubu a isoang koana le koana ke “moea o mong le o mong oa thuto ka ho qhekella ha batho.” (Baefese 4:14; 2 Petrose 2:1) Ho fapana le hoo, ba fumanang likarabo tse khotsofatsang tsa lipotso tsa bona ba khona ho ‘ema ba tiile tumelong.’—1 Bakorinthe 16:13.

Bahatisi ba koranta ena, e leng Lipaki Tsa Jehova, ba ka rata ho u thusa hore u fumane likarabo tsa lipotso tse ka ’nang tsa u sitisa ho ba le tumelo. Ba u mema hore u kopanele le bona ’me u inoese ka nkho mabapi le lithuto tsa bona. Seo se tla matlafatsa tumelo ea hao ho Molimo haholo.

Hore u fumane boitsebiso bo eketsehileng, bala khaolo ea 8 bukeng ea Ha e le Hantle ke Eng Seo Bibele e se Rutang?, * sehloohong se reng “’Muso oa Molimo ke Eng?” le khaolo ea 11, sehloohong se reng “Ke Hobane’ng ha Molimo a Lumeletse Bohloko?”

[Mongolo o botlaaseng ba leqephe]

[Setšoantšo se leqepheng la 9]

Ba fumanang likarabo tse khotsofatsang tsa lipotso tsa bona ba na le motheo o tiileng oa tumelo ea bona