Atamela ho Molimo

Jehova o re fa Monyetla oa ho Ikhethela

Deuteronoma 30:11-20

“HANGATA ke ne ke e-ba le letsoalonyana la hore nke ke ka lula ke tšepahala ho Jehova.” Ana ke mantsoe a builoeng ke mosali e mong oa Mokreste ea neng a nahana hore lintho tse bohloko tse ileng tsa mo hlahela ha e sa le ngoana li tla etsa hore ho hang a se ke a atleha bophelong. Na ho hlile ho joalo? Na kannete lintho tse bohloko tse ileng tsa re hlahela li tla etsa hore re se ke ra atleha bophelong? Che. Jehova Molimo o re file monyetla oa ho ikhethela, kahoo re ka ikhethela hore na re batla ho phela joang. Jehova o batla hore re etse khetho e nepahetseng ’me Lentsoe la hae, Bibele, le re bolella hore na re lokela ho etsa seo joang. Nahana ka mantsoe a Moshe a tlalehiloeng ho Deuteronoma khaolo ea 30.

Na ho thata ho tseba hore na Molimo o hloka’ng ho rōna le hore re ho phethe? * Moshe o re: “Taelo ena eo ke u laelang eona kajeno ha e thata haholo ho uena, leha e le hore e hōle haholo.” (Temana ea 11) Jehova ha a hloke hore re etse seo re ke keng ra khona ho se etsa. Lintho tseo a li hlokang lia utloahala ebile re ka khona ho li phetha. Ebile ho bonolo ho li tseba. Ha ho hlokahale hore re nyolohele “maholimong” kapa re nke leeto le eang “lehlakoreng le leng la leoatle” e le hore re tsebe hore na Molimo o lebeletse eng ho rōna. (Temana ea 12, 13) Bibele e re bolella ka ho hlakileng hore na re lokela ho phela joang.—Mikea 6:8.

Leha ho le joalo, Jehova ha a re qobelle hore re mo mamele. Moshe o re: “Kajeno ke beha ka pel’a hao bophelo le molemo, lefu le bobe.” (Temana ea 15) Re lokolohile hore re ka ikhethela lefu kapa bophelo, bobe kapa se molemo. Re ka khetha ho rapela Molimo le ho mo mamela ebe oa re hlohonolofatsa kapa ra khetha ho se mo mamele ebe re kotula litholoana tse bosula. Hore na re khetha hofe, ho ho rōna.—Temana ea 16-18; Bagalata 6:7, 8.

Na Jehova oa tsotella hore na re khetha hofe? Ka sebele oa tsotella! Moshe o ile a susumetsoa ke Molimo hore a re: “Le khethe bophelo.” (Temana ea 19) Empa re ka khetha bophelo joang? Moshe o ile a hlalosa: “Ka hore le rate Jehova Molimo oa lōna, le mamele lentsoe la hae ’me le mo khomarele.” (Temana ea 20) Haeba re rata Jehova, re tla mo mamela re be re mo khomarele ka botšepehi ho sa tsotellehe hore na ke eng e ka re etsahallang. Haeba re etsa joalo re tla be re khetha bophelo—e leng bophelo bo molemo ka ho fetisisa hona joale, le bo sa feleng boo re lebeletseng ho bo fumana lefatšeng le lecha la Molimo le tlang.—2 Petrose 3:11-13; 1 Johanne 5:3.

Mantsoe a Moshe a re ruta ’nete e re khothatsang. Ho sa tsotellehe hore na u kile ua hlaheloa ke eng lefatšeng lena le khopo, sena hase bolele hore u ke ke ua atleha bophelong. Jehova o u file monyetla oa ho ikhethela. Ka sebele u ka khetha ho rata Jehova, ho mo mamela le ho lula u tšepahala ho eena. Haeba u khetha ho etsa joalo, Jehova o tla hlohonolofatsa boiteko boo u bo etsang.

’Nete ena, ea hore ke rōna ba ikhethelang hore na re tla rata Jehova le ho mo sebeletsa kapa che, e ile ea khothatsa mosali ea boletsoeng qalong. O re: “Ke rata Jehova. Ka linako tse ling ke ne ke lebala ntho ea bohlokoa ea hore ha e le hantle ke rata Jehova. Kahoo, nka khona ho lula ke tšepahala.” Le uena u ka khona, ka thuso ea Jehova.

[Mongolo o botlaaseng ba leqephe]