Kabo ea Mangolo ea Bo129 ea Gileade

“Lena ke Letsatsi la Lōna”

KA LA 11 September, 2010, batho ba ka bang 8 000 ba ile ba bokana ketsahalong ea bohlokoa—kabong ea mangolo ea bo129 ea Sekolo sa Bibele sa Gileade sa Watchtower. Samuel Herd, eo e leng setho sa Sehlopha se Busang sa Lipaki Tsa Jehova o ile a re ho liithuti: “Lena ke letsatsi la lōna. Re tlile mona ho tla thaba le lōna!”

“Tsebe e Utloang”

Mor’abo rōna Herd o ile a qala lenaneo ka ho tšohla taba ea hore Bakreste kaofela ba lokela ho ba le “tsebe e utloang” ka hore ba ele hloko se rutoang ke Lentsoe la Molimo. (Liproverbia 20:12) Mor’abo rōna Herd o ile a bolella sehlopha, a re: “Le ’nile la alima Jehova litsebe tsa lōna likhoeli tsena tse ’maloa tse fetileng ’me le tla tsoela pele le etsa joalo ho ea ho ile.”

Baromuoa ba ka sebelisa litsebe tsa bona ka tsela e bohlale joang? Mor’abo rōna Herd o ile a re ke “ka ho mamela Lentsoe la Molimo.” O ile a phaella ka ho re: “Ho tla tšohloa lintlha tse ngata lenaneong la kajeno tse tla etsa hore le be ba loketseng mosebetsi oa boromuoa o larileng ka pel’a lōna.”

“Tšepa Jehova ka Pelo ea Hao Eohle”

Gerrit Lösch, eo e leng setho sa Sehlopha se Busang, o ile a tšohla sehlooho sena se etsang hore liithuti li nahane ka ho teba. O ile a bua ka makhetlo a mangata ao ka ’ona batho ba Molimo ba mehleng ea boholo-holo le ba kajeno ba ’nileng ba bontša ho tšepa Jehova.

Mor’abo rōna Lösch o ile a re “baromuoa [le bona] ba lokela ho ba le tšepo ka kabelo ea bona.” O ile a re: “Ka mohlala, u ka ’na ua ipotsa: ‘Na ke tla khona ho ithuta puo e ncha? Na ke tla khona ho tloaela mokhoa o mocha oo lintho li etsoang ka ’ona moo? Na ke tla khona ho hlōla ho hloloheloa hae?’” Karabo e bile efe? Mor’abo rōna Lösch o ile a khothalletsa sehlopha hore se ‘tšepe Jehova.’

Mor’abo rōna Lösch o ile a bala Liproverbia 14:26, e reng: “Ho na le kholiseho e matla ho tšabeng Jehova.” Re tla tšepa Jehova le ho feta haeba re nahanisisa ka litsela tse ngata tseo a ’nileng a re hlohonolofatsa ka tsona.

Bibele e re motho ea tšepang Jehova “ka sebele o tla ba joaloka sefate se lenngoeng haufi le metsi, seo metso ea sona e namelang molatsoaneng; a ke ke a bona ha mocheso o tla, empa makhasi a hae a tla beha haholo.”—Jeremia 17:7, 8.

Molaetsa o ne o hlakile. Mor’abo rōna Lösch o ile a re: “Ho sa tsotellehe hore na ke eng e larileng ka pele, le lokela ho tšepa Jehova.”

“Etsisang Mangeloi a Tšepahalang”

Seo e ne e le sehlooho sa puo ea Mor’abo rōna Stephen Lett, eo e leng setho sa Sehlopha se Busang. Mangeloi a re behetse mohlala o motle haholo. Mor’abo rōna Lett o ile a re: “Ntho e ’ngoe le e ’ngoe eo Bibele e e buang ka ’ona ke eo re ka e etsisang.” Joale o ile a bua ka litšobotsi tse ’nè tsa mangeloi a tšepahalang tseo re ka etsang hantle ha re li etsisa—e leng mamello ea ’ona, boikokobetso ba ’ona, moea oa ho thusa hammoho le botšepehi ba ’ona.

Bibele e tlaleha hore lengeloi le leng le ile la loana le ‘khosana ea Persia’—e leng modemona ea matla—ka matsatsi a 21. (Daniele 10:13) Lengeloi leo le ile la bontša ho ba le mamello. Mor’abo rōna Lett o ile a re Bakreste le bona ba “loana le . . . makhotla a moea a khopo.” (Baefese 6: 12) O ile a re ho liithuti: “Le loane ka thata e le hore le tsoele pele kabelong ea lōna.”

Ha Manooa, ntate oa Samsone, a ne a botsa lengeloi hore na lebitso la lōna ke mang, lengeloi leo le ile la hana ho mo bolella. Lengeloi leo le ile la bontša boikokobetso. (Baahloli 13:17, 18) Mor’abo rōna Lett o ile a re ho liithuti: “Ha motho e mong a leka ho u rorisa kapa ho u thoholetsa ka bokhoni ba hao, ka boikokobetso etsa hore thoriso e se ke ea leba ho uena empa e lebe ho Jehova le mokhatlo oa hae.”—1 Bakorinthe 4:7.

Ha Jesu a ne a le serapeng sa Gethesemane nakoana pele ho lefu la hae, “lengeloi le tsoang leholimong [le ile] la bonahala ho eena ’me la mo matlafatsa.” (Luka 22:43) Lengeloi leo le ile la bontša moea oa ho thusa. Mor’abo rōna Lett o ile a re: “Le rapelle hore le khone ho lemoha seo batho ba kabelong ea lōna ea boromuoa ba se hlokang, ’me ka thuso ea Jehova, le leke ho ba thusa.”

Kaha mangeloi a ileng a ikopanya le Satane ha a fetohela Molimo ha a mangata hakaalo, seo se bolela hore boholo ba libōpuoa tsena tse leholimong li beha mohlala o motle oa botšepehi.—Tšenolo 12:4.

Mor’abo rōna Lett o ile a phehella liithuti, a re: “Joaloka mangeloi ao a tšepahalang, le hanele Diabolose. Le mo hanyetse ’me o tla le balehela.”—Jakobo 4:7.

Lintlha Tse Ling Tse Tharo Tse Ileng Tsa Tšohloa

“Lulang le Entse Jehova Lefika la Lipelo Tsa Lōna.” Ha Gary Breaux, eo e leng setho sa Komiti ea Lekala ea United States, a bua ka sehlooho seo se thahasellisang se thehiloeng ho Pesaleme ea 73:26, o ile a thusa liithuti hore li lemohe bohlokoa ba ho itšetleha ka Jehova. Jehova o tšoana le lefika joang? Mor’abo rōna Breaux o ile a re: “Lefika le ka lula le hatile sekhechana sa pampiri ha lifefo li le teng. Ka tsela e tšoanang, Jehova a ka etsa hore le lule le tsitsitse, ka hore a lebele lipelo tsa lōna.” Ke ’nete hore pelo e ka re khelosa ha re tobane le teko e hlokang hore re mamelle. (Jeremia 17:9) E ’ngoe ea lintho tsena e ka etsa hore motho a nahane ho tlohela tšebeletso—boemo bo bocha ba leholimo, lijo tse ncha hammoho le basebetsi-’moho ba bacha lehaeng la baromuoa. Mor’abo rōna Breaux o ile a re: “Le tla thulana le maemo ao le tla lokela ho etsa qeto ea hore na le khetha eng. Na le tla khetha se tla thabisa Jehova? Haeba le etsa joalo, Jehova e tla ba ‘lefika la lipelo tsa lōna.’ O tla tataisa mehato ea lōna.”

“Na Tumelo ea Hao e Matla Hoo U ka Kenyang Maoto ka Metsing?” Mokoetlisi e mong oa sekolo sa Gileade, Sam Roberson, o ile a tšohla sehlooho sena, a se thehile tlalehong e hlahang lengolong la Joshua khaolo ea 3. Baiseraele ba limilione ba ne ba ka tšela Nōka ea Jordane joang empa e ne e jele litlhokoa? Jehova o ile a bolella Joshua hore a laele baprista hore ‘ba eme ba sa sisinyehe ka har’a Jordane.’ Molimo o ile a fana ka tšepiso ena: “Etlare nakong eo ka eona bohato ba maoto a baprista . . . bo hatang metsing a Jordane, metsi a Jordane a tla emisoa, . . . ’me a tla ema e le letamo le le leng.” (Joshua 3:8, 13) Mor’abo rōna Roberson o ile a re ho liithuti: “Ho tla ba le ‘linōka tsa Jordane’ bophelong ba lōna tseo haeba le li lumella, li ka le sitisang ho fumana litlhohonolofatso.” Ka mohlala, ho ka ’na ha e-ba le bothata ba ho phelisana hammoho ka kutloano le baromuoa ba bang. Tharollo ke efe? “Le shebe mosebetsi; le se ke la sheba basebetsi.” Mor’abo rōna Roberson o ile a eletsa sehlopha: “Haeba le bontša tumelo ea ho kenya maoto ka metsing, Jehova o tla le thusa hore le tšele ‘linōka tsa Jordane’ tseo le tla kopana le tsona bophelong ba lōna ba boromuoa.”

“Tiisa Merero ea Hao ka Thata.” Seo e bile sehlooho se tšohliloeng ke mokoetlisi e mong oa sekolo sa Gileade, e leng William Samuelson. Puo ea hae e ne e thehiloe lengolong la Liproverbia 16:3, le reng: “Rōlela mesebetsi ea hao ho Jehova ’me merero ea hao e tla tiisoa ka thata.” Mor’abo rōna Samuelson o ile a botsa liithuti:  “Na temana ee e bolela hore sa lōna feela ke hore le ‘rolele mesebetsi ea lōna’ ho Jehova le se na karolo eo le e phethang?” O ile a re ha ho joalo, etsoe Liproverbia 16:1 e re: “Litokisetso tsa pelo ke tsa motho oa lefatše.” Mor’abo rōna Samuelson o ile a re: “Jehova ha a lokise lipelo tsa lōna ka mohlolo. Ho e-na le hoo, le lokela ho tiisa hore ho ba le lintho tse le susumelletsang ho latela tsela e nepahetseng. Haeba le ithuta, le rapela le bile le sebelisana haufi-ufi le ofisi ea lekala eo le oelang tlas’a eona, le tla lula le e-na le pelo e tla le thusa ’me Jehova ka boeena o tla tiisa merero ea lōna.”

Liphihlelo le Lipuisano

E le karolo ea koetliso, liithuti tsa Gileade li kopanela le liphutheho tse haufi tsa Lipaki Tsa Jehova mosebetsing oa boboleli. Mark Noumair, eo e leng e mong oa bakoetlisi ba sekolo sa Gileade, o ile a buisana le liithuti tse ’maloa ka liphihlelo tseo ba bileng le tsona. Ntlha e ileng ea hatisoa ka ho khetheha liphihlelong tseo e bile karolo e phethoang ke thapelo e le hore ho fumanoe batho ba thahasellang tšebeletsong.

Ka mohlala, banyalani ba bang ba ne ba le reschorenteng. Mosebetsi e mong o ile a lemoha hore ba ne ba rapella ka pelong. O ile a ba atamela ’me a ba botsa hore na ke Lipaki Tsa Jehova. Ha a fumana hore ke tsona, mosebetsi eo o ile a ba hlalosetsa hore o hōlisitsoe e le Paki empa o ile a kheloha ’neteng. O ne a bile a kile a tlōla molao a ba a koalloa chankaneng. Joale mohlankana enoa o ne a utloa hore o batla ho ba le kamano e ntle le Jehova hape. O ile a ba a re pele banyalani bao ba kena reschorenteng, o ne a ntse a rapela Molimo, a mo bolella hore o batla thuso e le hore a hloekise bophelo ba hae. Thapelo eo ea hae e ne e arabiloe!

Ha Rudi Hartl, eo e leng oa Lefapha la Bongoli le Arabang Lipotso, a tšohla sehlooho se reng “Latsoang ’me le Bone Hore Jehova o Molemo,” o ile a buisana le Wayne Wridgway ea tsoang Mozambique, Jason Reed ea tsoang Chile le Kenji Chichii ea tsoang Nepal. Kaofela ha bona ke baromuoa ba koetlisitsoeng sekolong sa Gileade. Bara bana babo rōna ba ile ba bua ka ho toba ka mathata ao ba thulaneng le ’ona ha ba fihla likabelong tsa bona tsa boromuoa—ebang ke ho ithuta puo e ’ngoe, ho tloaela mekhoa e mecha eo lintho li etsoang ka eona kapa ho hlōla ho hloloheloa hae. Mor’abo rōna Chichii o ile a re: “Ntho e ’ngoe e ileng ea re thusa ke hore re ile ra etsa metsoalle hang-hang phuthehong e ncha. Ha re ntse re tloaela litho tsa phutheho, ho hlolohelloa hae ho ile ha mamelleha.”

Ka mor’a hore liithuti tsohle tse 56 li fumane mangolo a tsona a diploma, moromuoa e mong o ile a bala lengolo la sehlopha le neng le ama pelo le bontšang kananelo. Karolo e ’ngoe ea lona e neng e lebisitsoe ho Sehlopha se busang, e ne e re: “Re le sehlopha, re iponetse ka borōna hore na le itetse ka lerato le ka cheseho e kaakang, la re lokisetsa lenaneo la thuto, la re etela tlelaseng la ba la re fa thupelo e babatsehang ea moea. Ka lebaka la lerato leo le re bontšitseng lona, re tla leka ka hohle hore le rōna re etsise mohlala oa lōna o motle oa ho bontša lerato, mamello, boikokobetso le ho thahasella ba bang ha re fihla likabelong tsa rōna.”

[Ntlha e Qolotsoeng e leqepheng la 28]

“Ha motho e mong a leka ho u rorisa . . . , etsa hore thoriso e se ke ea leba ho uena”

[Ntlha e Qolotsoeng e leqepheng la 29]

“Ho tla ba le ‘linōka tsa Jordane’ bophelong ba lōna”

 [Chate/’Mapa o leqepheng la 31]

LIPALO-PALO TSA SEHLOPHA

Palo ea linaha tse emetsoeng 9

Palo ea baromuoa 56

Palo ea malapa 28

Karolelano ea lilemo 33.0

Karolelano ea lilemo ba kolobelitsoe 17.9

Karolelano ea lilemo ba le tšebeletsong ea nako e tletseng 13.3

[’Mapa]

(Ha u batla ho bona boitsebiso bo hlophisitsoeng hantle, sheba sengoliloeng)

Sehlopha se abetsoe ho ea linaheng tse 25 tse bontšitsoeng tlaase mona

LINAHA TSEO BA ABETSOENG HO TSONA

BOLIVIA

BOTSWANA

BULGARIA

CONGO (KINSHASA)

CÔTE D’IVOIRE

GAMBIA

JEREMANE

INDIA

INDONESIA

KENYA

LIBERIA

MACEDONIA

MADAGASCAR

MALAYSIA

MOZAMBIQUE

PANAMA

PERU

POLAND

ROMANIA

SERBIA

SIERRA LEONE

SWAZILAND

TANZANIA

UGANDA

ZIMBABWE

[Setšoantšo se leqepheng la 30]

Liithuti tsa Gileade li etsa pontšo ea se etsahetseng tšebeletsong ea tšimo

[Setšoantšo se leqepheng la 31]

Sehlopha sa Bo129 sa Sekolo sa Bibele sa Gileade sa Watchtower se Abetsoeng Mangolo

Lethathamong le tlaase mona, mela e baloa ho tloha ka pele ho ea ka morao ’me mabitso a thathamisitsoe ho tloha ka letsohong le letšehali ho ea ho le letona moleng ka mong.

(1) Munaretto, R.; Olofsson, Y.; Budden, K.; Najdzion, L.; Moya, G.; Treviño, G.; Dion, A.; Fleegle, A.

(2) Smith, J.; Michael Raj, J.; Smith, S.; Paramo, A.; McDonald, J.; Deans, M.; Joyal, S.; Watson, L.

(3) Joyal, C.; Crawley, T.; Hacker, D.; Shynkarenko, J.; Knapp, T.; Ayling, J.; Highley, C.; Olofsson, B.

(4) Fitzpatrick, M.; Najdzion, B.; Skallerud, L.; Harris, A.; Harris, S.; Budden, R.; Paramo, Y.; Skallerud, K.

(5) Crawley, B.; Michael Raj, J.; Lodge, A.; Lodge, R.; Herms, N.; Fitzpatrick, J.; Moya, R.; Munaretto, P.

(6) Watson, S.; Deans, M.; Hacker, J.; McDonald, J.; Treviño, J.; Harris, S.; Herms, C.; Harris, P.

(7) Shynkarenko, V.; Highley, T.; Smith, A.; Dion, J.; Ayling, R.; Smith, B.; Knapp, T.; Fleegle, B.