Ho joalo, lefatšeng lohle ho na le basali ba limilione ba Lipaki Tsa Jehova ba rutang. Ke lebotho le leholo la baboleli ba litaba tse molemo tsa ’Muso oa Molimo. Ha e profeta ka baboleli bao, Pesaleme ea 68:11 e re: “Jehova o fana ka polelo; basali ba bolelang litaba tse molemo ke lebotho le leholo.”

Leha ho le joalo, u se ke ua nahana hore tsela eo basali ba Lipaki Tsa Jehova ba rutang ka eona e tšoana le eo basali bao e leng baruti malumeling a mang ba rutang ka eona. Ho na le phapang e khōlō pakeng tsa bona. Ba fapana joang?

Moo ba rutang teng ho fapane. Baruti ba basali, haholo-holo ba ipitsang Bakreste, ke baeta-pele ka har’a liphutheho tsa bona, ’me batho ba ka sehloohong ba ba mamelang ke litho tsa kereke. Athe basali ba rutang ba Lipaki Tsa Jehova bona ba bua le batho ba ka ntle ho liphutheho, e leng batho bao ba kopanang le bona ha ba e-ea ka ntlo le ntlo le libakeng tse ling.

Ntho e ’ngoe eo basali bana ba Lipaki Tsa Jehova ba fapanang ka eona le ba malumeli a mang, ke seo ba se etsang ka phuthehong. Baruti ba basali ba likereke tse ipitsang tsa Bokreste le ba likereke tse ling, ba okamela litho tsa likereke tsa bona ebile ba li ruta lithuto tsa bolumeli ba bona. Leha ho le joalo, basali ba Lipaki Tsa Jehova ha ba rute phutheho ha ho e-na le banna ba kolobelitsoeng. Ke banna ba khethiloeng feela ba lokelang ho ruta.—1 Timothea 3:2; Jakobo 3:1.

Bibele e bolela hore ke banna feela ba fuoeng boikarabelo ba ho okamela phutheho. Hlokomela taelo eo moapostola Pauluse a ileng a fana ka eona ha a ne a ngolla molebeli-’moho le eena, Tite, ha a re: “Ke ka lebaka lena ke ileng ka u siea Kreta, e le hore u ka . . . beha banna ba baholo motseng o mong ka mor’a o mong.” Pauluse o ile a eketsa ka hore monna e mong le e mong ea behiloeng e lokela ho ba eo “ho seng seo a qosoang ka sona, monna oa mosali a le mong.” (Tite 1:5, 6) Pauluse o ile a fana ka litaelo tse tšoanang ha a ne a ngolla Timothea, o ile a re: “Haeba motho leha e le ofe a hahamalla boemo ba molebeli, o lakatsa mosebetsi o motle. Ka hona molebeli e lokela ho ba ea sa nyatseheng, monna oa mosali a le mong, . . . ea tšoanelehelang ho ruta.”—1 Timothea 3:1, 2.

Ke hobane’ng ha boikarabelo ba ho okamela ka phuthehong bo fuoa banna feela? Pauluse o re: “Ha ke lumelle mosali ho ruta, kapa ho sebelisa matla holim’a monna, empa hore a khutse. Etsoe Adama o ile a bōptjoa pele, ha ntan’o bōptjoa Eva.” (1 Timothea 2:12, 13) Kahoo, taba ea hore Molimo o ile a bōpa monna pele ho mosali, e bontša hore na ke hobane’ng ha a file banna boikarabelo ba ho ruta le ba ho okamela.

Bahlanka ba Jehova ba latela mohlala oa Moeta-pele oa bona, Jesu Kreste. Morutuoa Luka o ile a ngola tjena mabapi le tšebeletso ea Jesu: “A qala ho tsamaea ho tloha motseng o mong ho ea ho o mong le ho tloha motsaneng o mong ho ea ho o mong, a bolela ’me a phatlalatsa litaba tse molemo tsa ’muso oa Molimo.” Hamorao, Jesu o ile a roma balateli ba hae hore ba etse mosebetsi oona oo: “Ba pholletsa le sebaka seo ho tloha motsaneng o mong ho ea ho o mong, ba bolela litaba tse molemo.”—Luka 8:1; 9:2-6.

Kajeno, bahlanka ba Jehova—banna le basali—ba chesehela mosebetsi oo Jesu a ileng a bua ka oona esale pele, ha a re: “Litaba tsena tse molemo tsa ’muso li tla boleloa lefatšeng lohle leo ho ahiloeng ho lona hore e be bopaki ho lichaba tsohle; joale e ntan’o ba hona bofelo bo tla tla.”—Matheu 24:14.