Kajeno batho lefatšeng ka bophara ba na le mathata. Linaheng tse ling batho ba bangata ba futsanehile ebile baa hatelloa. Ho tse ling, batho ba bangata ba bonahala ba ruile haholo hoo ba sa hlokeng letho. Ke ’muso o busang lefatše lohle feela o ka etsang hore batho bohle ba fumane lintho ka ho lekana o sa sebelise leeme.—Bala Moeklesia 4:1; 8:9.

Batho ba bangata ha ba lumellane le taba ea hore ho be le motho a le mong feela ea busang lefatše hobane ha ho na monna kapa mosali ea ka khonang ho etsa mosebetsi oo hantle. Ha ho na hore motho a ka amoheloa ke batho kaofela. Batho ba hlōleha ho etsa lintho ka toka ha ba le maemong a bolaoli. Hoa tšosa ho nahana hore lefatše lohle le ka busoa ke batho ba khahlapetsang ba bang.—Bala Liproverbia 29:2; Jeremia 10:23.

Jehova Molimo o khethile Mora oa hae, Jesu, hore a buse moloko oa batho ka ho sa feleng. (Luka 1:32, 33) Jesu o kile a phela lefatšeng. Ha a ntse a le lefatšeng mona, o ile a folisa ba kulang, a ruta batho ba bonolo ’me a ipha nako ea bana. (Mareka 1:40-42; 6:34; 10:13-16) Kahoo Jesu ke eena ’Musi ea tšoanelehang.—Bala Johanne 1:14.

Molimo o khethile Mora oa hae hore a buse lefatše a le leholimong. (Daniele 7:13, 14) Joalokaha ’musi oa motho a sa hloke hore a be motseng o mong le o mong o tlas’a puso ea hae, ha ho hlokahale hore Jesu a lule lefatšeng e le hore a buse batho.—Bala Matheu 8:5-9, 13.

Na batho bohle ba tla amohela Jesu joaloka ’Musi? Che. Ke batho ba ratang se molemo feela ba tla mo amohela. Jehova o tla felisa batho bohle ba sa batleng ho amohela ’Musi ea lerato le ea lokileng eo a mo khethileng.—Bala Matheu 25:31-33, 46.

Joalokaha molisa a bokella linku tsa hae, Jesu o se a ntse a bokella batho ba bonolo ho tsoa lichabeng tsohle ’me o ba ruta litsela tsa Molimo tsa lerato. (Johanne 10:16; 13:34) Batho ba joalo ba tšehetsa Jesu le bobusi ba hae ka cheseho. (Pesaleme ea 72:8; Matheu 4:19, 20) Lefatšeng ka bophara, bafo bohle ba Jesu ba phatlalatsa hore Jesu ke Morena.—Bala Matheu 24:14.

Haufinyane Jesu o tla sebelisa matla a hae ho imolla batho mebusong e tletseng bobolu. O khethile ba bang ba balateli ba hae ba tšepahalang hore ba buse lefatše le eena joaloka marena, ba le leholimong. (Daniele 2:44; 7:27) ’Muso oa Jesu o tla tlatsa lefatše lohle ka tsebo ea Jehova ’me o tla tlisa paradeise e ileng ea lahleha qalong ea histori ea batho.—Bala Esaia 11:3, 9; Matheu 19:28.