A re re u qala ho etela naheng e ’ngoe. Ha u le moo, u kopana le batho bao u sa ba tsebeng, ba nang le meetlo e sa tšoaneng, ba jang lijo tseo u sa li tloaelang ebile ba sebelisa chelete e fapaneng le ea naheng ea heno. Hoa utloahala hore ebe u ka ’na ua ferekana.

Mohlomong u ikutloa joalo ha u qala ho bala Bibele kaha e bua ka lintho tsa mehleng ea khale tseo u sa li tsebeng. Ha u ntse u e bala, u utloa e bua ka batho ba bitsoang Bafilista, ka litso tse sa tloaelehang tse kang ho ‘hahola liaparo,’ u boetse u ithuta ka lijo tse bitsoang manna le chelete ea tšepe e bitsoang drakema. (Exoda 16:31; Joshua 13:2; 2 Samuele 3:31; Luka 15:9) Lintho tsena kaofela li ka u ferekanya. Ha ho potang hore u ka thabela hore motho e mong a u hlalosetse tsona, feela joalokaha u ne u ka thaba ha motho ea itseng a ne a ka u hlalosetsa lintho tseo u li bonang naheng eo u e etetseng.

Ho tloha ha mangolo a halalelang a qala ho ngoloa lilemo tse 1513 pele Jesu a hlaha, batho ba ’nile ba thusoa hore ba a utloisise. Ka mohlala, Moshe, e leng moeta-pele oa pele oa sechaba sa Iseraele o ile “a qala ho hlalosa” se neng se ngotsoe molaong.—Deuteronoma 1:5.

Lilemo tse sekete ka mor’a moo, ho ne ho ntse ho e-na le batho ba tšoanelehang ba rutang Mangolo. Ka selemo sa 455 pele Jesu a hlaha, Bajuda ba bangata ba akarelletsang bana, ba ile ba bokana lebaleng la sechaba motseng oa Jerusalema. Mesuoe ea Bibele e ne e le teng moo, e ‘bala buka e halalelang.’ Empa ha ea ka ea etsa seo feela. E ile ea “tsoela pele ho etsa hore ’malo o utloisisoe.”—Nehemia 8:1-8.

Lilemo tse makholo a mahlano hamorao, Jesu Kreste le eena o ile a tšoareha mosebetsing oa ho ruta. Ha e le hantle, o ne a tsejoa e le mosuoe. (Johanne 13:13) O ne a ruta batho ka lihlopha kapa ba le bang. Ka lekhetlo le leng, o ile a fana ka Thuto ea Thabeng ka pel’a letšoele le leholo ’me “bongata bo ile ba hlolloa ke tsela ea hae ea ho ruta.” (Matheu 5:1, 2; 7:28) Ka selemo sa 33, mehleng ea hae, Jesu o ile a bua le barutuoa ba hae ha ba ntse ba tsamaea tseleng motsaneng o haufi le Jerusalema, ‘a ba hlalosetsa Mangolo ka botlalo.’—Luka 24:13-15, 27, 32, Bibele ea Sesotho.

Barutuoa ba Jesu le bona e ne e le mesuoe ea Lentsoe la Molimo. Ka lekhetlo le leng, letona le tsoang Ethiopia le ne le bala karolo e itseng ea Mangolo. Morutuoa ea bitsoang Filipi o ile a ea ho lona ’me a re: “Na u tseba seo u se balang?” Letona leo le ile la re: “Ka sebele, nka tseba joang ntle leha e mong a ka ntataisa?” Eaba Filipi o le hlalosetsa se boleloang ke karolo eo.—Liketso 8:27-35.

Joaloka mesuoe ea Bibele ea nakong e fetileng, kajeno Lipaki Tsa Jehova li ruta batho Bibele linaheng tse 239 lefatšeng lohle. (Matheu 28:19, 20) Beke le beke li thusa batho ba fetang limilione tse robong hore ba utloisise Bibele. Bongata ba batho bao hase balumeli. Lipaki li ruta batho Bibele mahala mahaeng a bona kapa libakeng tse ling tse ba loketseng. Ho sebelisoa lifouno kapa livideo le lik’homphieutha ho ruta batho ba bang Bibele.

E le hore u fumane hore na thuto ea Bibele e tšoaroa joang, u ka ikopanya le Lipaki Tsa Jehova. Ha u ntse u ithuta, u tla hlokomela hore u ka khona ho utloisisa Bibele kaha e “molemo bakeng sa ho ruta, bakeng sa ho khalemela, bakeng sa ho otlolla lintho, bakeng sa ho laea ka ho loka,” e le hore u ka “tšoaneleha ka botlalo, [ua] hlomelloa ka ho feletseng bakeng sa mosebetsi o mong le o mong o molemo.”—2 Timothea 3:16, 17.