Bibele ha e bue ka ho toba ka pornography, kapa ho buisana ka thobalano Inthaneteng le ka litsela tse ling. Empa e bolela ka ho hlaka hore na Molimo o ikutloa joang ka lintho tse khothalletsang batho ba sa nyalanang ho kopanela liphate kapa tse fanang ka maikutlo a fosahetseng ka hona. Nahana ka litemana tsena tsa Bibele:

•   “Ka hona, le bolaee litho tsa ’mele ea lōna tse lefatšeng mabapi le bohlola, ho se hloeke, takatso ea botona kapa ea botšehali.” (Bakolose 3:5) Ho e-na le ho bolaea litakatso tse fosahetseng, pornography e ea li tsosa. E etsa hore motho e be ea sa hloekang kapa ea litšila mahlong a Molimo.

•   “E mong le e mong ea ntseng a tsoela pele ho sheba mosali e le hore a be le takatso e matla bakeng sa hae o se a febile le eena ka pelong ea hae.” (Matheu 5:28) Litšoantšo tse litšila tsa ho kopanela liphate li tsosa maikutlo a fosahetseng a lebisang boitšoarong bo bobe.

•   “Bohlola le ho se hloeke ha mofuta o mong le o mong kapa meharo le ho boleloa li se ke tsa boleloa har’a lōna.” (Baefese 5:3) Ha rea lokela ho bua ka boitšoaro bo bobe ba ho kopanela liphate, re se re sa re letho ka ho bo shebella kapa ho bala ka bona.

•   “Mesebetsi ea nama ea bonahala, ’me ke bohlola, ho se hloeke, . . . le lintho tse joalo ka tsena. Ha e le ka lintho tsena ke le lemosa esale pele, ka tsela e tšoanang le eo ke ileng ka fela ka le lemosa ka eona esale pele, hore ba tloaetseng ho etsa lintho tse joalo ba ke ke ba rua ’muso oa Molimo.” (Bagalata 5:​19-​21) Molimo o nka batho ba shebellang pornography le ba romellanang melaetsa e buang ka thobalano ka Inthanete kapa ka selefouno, ba sa hloeka ’me ba silafetse boitšoarong. Haeba re itloaetsa ho etsa lintho tseo, Molimo a ke ke a re amohela.