Kecap ”aborsi” nu digunakeun dina sababaraha tarjamahan Alkitab lain ngamaksudkeun dikaluarkeunana jabang bayi sacara paksa. Ayat-ayat Alkitab ngajelaskeun pandangan Allah kana kahirupan manusa, kaasup kahirupan jabang bayi.

 Kahirupan téh kurnia ti Allah. (Kajadian 9:6; Jabur 36:10) Mantenna nganggap unggal kahirupan téh penting, kaasup kahirupan orok di jero kandungan. Jadi, lamun aya jalma nu ngahaja ngalakukeun aborsi, éta sarua siga maéhan jalma.

 Hukum Allah ka bangsa Israil nyebutkeun, ”Upama aya anu garelut terus nyilakakeun awéwé nu keur ngandung nepi ka manéhna ngalahirkeun saacan waktuna, tapi euweuh nu maot, jalma nu nyilakakeunana kudu didengda sakumaha paménta salaki éta awéwé, sarta mayarna kudu disatujuan ku para hakim. Tapi lamun nepi ka aya nu maot, hukumna nyawa dibayar ku nyawa.”—Budalan 21:22, 23, Terjemahan Dunia Baru (NW). a

•  Iraha kahirupan saurang jalma dimimitian?

•  Naha Allah bakal ngahampura jalma nu pernah ngalakukeun aborsi?

•  Naha salah pikeun ngalakukeun aborsi, lamun kahirupan indung atawa jabang bayina kaancam?

 Dina pandangan Allah, jabang bayi di jero kandungan téh geus mangrupa jalma nu hirup. Firman-Na, nyaéta Alkitab, nunjukkeun yén dina pandangan Mantenna, jabang bayi téh dianggap saurang jalma. Pikirkeun sababaraha conto nu nunjukkeun yén Allah teu ngabédakeun kahirupan jabang bayi jeung orok nu geus lahir.

•   Waktu keur meunang ilham, Raja Daud ngomong ka Allah, ”Memeh abdi lahir ku Gusti parantos katingali.” (Jabur 139:16) Saacan Daud lahir gé, Allah geus nganggap Daud saurang jalma.

•   Salian ti éta, Allah geus boga rencana pikeun méré tugas nu istiméwa keur Nabi Yérmia sanajan Yérmia can lahir. Allah ngomong ka manéhna, ”Maneh, ti memeh ku Kami dihirupkeun, ku Kami geus kapilih, geus ditangtukeun ti memeh dijurukeun keur pinabieun bangsa-bangsa.”—Yermia 1:5.

•   Lukas, saurang dokter nu nulis Alkitab, ngagunakeun kecap Yunani nu sarua pikeun ngagambarkeun jabang bayi jeung orok nu geus lahir.—Lukas 1:41; Lukas 2:12, 16, NW.

 Jalma nu pernah ngalakukeun aborsi bisa narima panghampura ti Allah. Lamun ayeuna manéhna geus boga pandangan nu sarua jeung Allah ngeunaan kahirupan, manéhna teu perlu teterusan ngarasa salah. ”Estu PANGERAN teh welas asih, lautan kurnia, . . . Sakumaha anggangna wetan ti kulon, nya sakitu jauhna dosa-dosa urang dijauhkeunana ti urang.” b (Jabur 103:8-12) Yéhuwa bakal ngahampura dosa kabéh jalma nu bener-bener tobat, kaasup nu pernah ngalakukeun aborsi.—Jabur 86:5.

 Saluyu jeung pandangan Alkitab ngeunaan kahirupan jabang bayi, saurang jalma teu meunang ngalakukeun aborsi ngan ku lantaran kaséhatan indung atawa orokna bisa jadi kaancam.

 Tapi, kumaha lamun aya kaayaan darurat? Misalna pas prosés ngalahirkeun, aya masalah nepi ka kapaksa kudu milih rék nyalametkeun indung atawa orokna. Mun kitu masalahna, kulawargana kudu nyieun putusan, saha nu rék disalametkeun.