Kira-kira 3.500 taun katukang, teu lila saacan bangsa Israil asup ka Tanah Perjangjian, Allah ngomong yén Mantenna bakal ngalindungan éta bangsa tina panyakit-panyakit parah nu harita aya di Mesir. (Pamindo 7:15) Salah sahiji carana nyaéta ku masihan pituduh nu rinci ngeunaan cara ngajaga kabersihan, carana nyegah panyakit, sarta carana supaya panyakit teu népa ka batur. Contona:

•   Hukum ngawajibkeun éta bangsa pikeun mandi jeung nyeuseuh pakéan.—Imamat 15:4-27.

•   Ngeunaan kotoran manusa, Allah méré paréntah, ”Di luareun pasanggrahan kudu aya tempat paranti miceun. Ana maraneh aya kaperluan ka dinya kudu mawa cocokel keur nyieun lombang kotoran, urutna kudu dirimbunan.”—Pamindo 23:12, 13.

•   Jalma nu dianggap boga panyakit nu népa kudu dikarantina pikeun sababaraha waktu. Saacan balik ka kumpulan, jalma nu geus cageur kudu nyeuseuh pakéanana jeung mandi supaya teu najis deui.—Imamat 14:8, 9.

•   Nu nyabak bangké atawa mayit kudu dikarantina.—Imamat 5:2, 3; Bilangan 19:16.

 Hukum-hukum nu dibikeun ka bangsa Israil némbongkeun yén cara maranéhna ngajaga kaséhatan jeung kabersihan téh leuwih unggul ti batan bangsa séjén di jaman éta.

 Ari di tempat-tempat séjén, jalma-jalma ngajaga kabersihan ku cara nu kuno. Contona:

•   Lingkungan nu teu bersih. Lantaran cai jeung kadaharan nu kotor sarta rupa-rupa runtah, loba jalma keuna ku panyakit jeung loba orok nu paraéh.

•   Harita, tabib-tabib teu boga loba élmu atawa malah teu nyaho nanaon ngeunaan kuman, baktéri, jeung virus. Urang Mesir ngagunakeun getih kadal, kotoran manuk pelikan, bangké beurit, cikiih, jeung roti nu geus bulukan pikeun dijadikeun ubar. Kotoran manusa jeung sato gé osok dipaké pikeun ngubaran panyakit.

•   Loba urang Mesir kuno gering lantaran aya rupa-rupa parasit dina cai Walungan Nil jeung saluran irigasi nu kotor. Salian ti éta, loba orok maot lantaran diare jeung panyakit séjénna nu disababkeun ku kadaharan nu teu bersih.

 Sabalikna, bangsa Israil mah tetep séhat jeung meunang mangpaat lantaran ngajalankeun Hukum Allah ngeunaan ngajaga kabersihan jeung kaséhatan.