Michezo ya Olimpiki ya 2024 ya Vijana ya Majira ya Baridi Kali ilifanywa katika miji minne ya Korea Kusini kuanzia Januari 19 hadi Februari 1, 2024. Maelfu ya wanamichezo, wanahabari, na mashabiki kutoka katika nchi zaidi ya 70 walihudhuria tukio hilo. Zaidi ya Mashahidi 2,600 wa Yehova walishiriki katika kampeni ya pekee ya kuhubiri wakati wa michezo hiyo. Vigari vya machapisho vilisimamishwa katika maeneo 34, na habari zinazotegemea Biblia zilipatikana katika lugha nne.

Kijana mmoja anayezungumza Kimandarin aliwafikia ndugu wawili na kuwaambia aliona vigari vyetu katika maeneo mbalimbali katika nchi nzima. Hata hivyo, baada ya kuona bango kuhusu furaha ya familia kwenye kigari kimoja, akaamua kusimama na kujifunza zaidi. Akina ndugu walimweleza jinsi anavyoweza kupakua broshua Unaweza Kuwa na Familia Yenye Furaha katika Kimandarin kwenye jw.org. Mwanamume huyo alitembelea tovuti yetu mara moja kwenye simu yake na kuwashukuru ndugu zetu kwa msaada wao.

Wenzi wa ndoa ambao ni Mashahidi walianzisha mazungumzo yasiyo rasmi na mwanamume kutoka Ukrainia. Kwa sababu hawafahamu Kiukrainia, waliwasiliana kupitia programu ya kutafsiri kwenye simu zao. Wakati wa mazungumzo yao, mwanamume huyo aliwaonyesha picha ya uharibifu uliosababishwa na kombora katika mji wa nyumbani kwao. Wenzi hao wa ndoa walimpa pole kwa hali yake na kumwonyesha mstari wa Biblia ulioeleza kwamba hivi karibuni vita havitakuwepo tena. Kusoma ahadi hiyo ya Kimaandiko katika lugha yake mwenyewe kulimtia moyo sana mwanamume huyo. Wenzi hao wa ndoa walifanya mipango ya kuwasiliana naye tena ili kuendeleza mazungumzo hayo.

Dada anayeitwa In-Sook alianzisha mazungumzo katika Kiingereza na msichana kutoka Finland pamoja na mama yake. Msichana huyo ni mwanamichezo wa kuteleza kwenye barafu. Walipokuwa wakizungumza, dada yetu alitaja habari kadhaa kwenye tovuti yetu chini ya kichwa “Kulea Matineja.” Mama huyo alifurahi kupata habari hizo na akasema kwamba atatembelea tovuti yetu tena.

Tunafurahi kwamba ndugu na dada zetu nchini Korea Kusini walikuwa na nafasi ya kuwafikia watu wengi wakati wa tukio hilo la kimataifa na ‘kulisifu jina la Yehova.’​—Zaburi 148:13.