Aprili 8, 2024, tukio la kupatwa kwa jua lilionekana katika maeneo fulani ya Amerika ya Kaskazini. Mamilioni ya watu walikusanyika katika maeneo mbalimbali ili kuangalia tukio hilo, wengi wao wakiwa wamesafiri kwa umbali mrefu sana. Kampeni ya pekee ya kuhubiri ilipangwa kufanyika katika majiji zaidi ya 24 ambako wangeweza kuona tukio hilo. Mashahidi wa Yehova kutoka Kanada, Mexico, na Marekani walishiriki katika kampeni hiyo, wakitumia vigari vya machapisho vilivyokuwa na machapisho katika lugha zaidi ya 15.

Jijini Carbondale, Illinois, Marekani, wanafunzi wawili wa chuo walikaribia kigari chetu cha machapisho. Mmoja kati ya dada zetu alianzisha mazungumzo pamoja nao akitumia swali lililokuwa kwenye kigari cha machapisho lililosema: “Je, Uhai Uliumbwa?” Kadiri mazungumzo yalivyoendelea kijana mmoja akauliza: “Ikiwa Mungu yupo na anatupenda, kwa nini anaruhusu mateso?” Dada aliwaonyesha jinsi ya kutumia tovuti ya jw.org ili kupata jibu. Wanafunzi wote walivutiwa sana na video zetu ambazo zilijibu swali lao. Vijana hao walisema kwamba walitamani kujifunza mengi zaidi na kuwaeleza marafiki wao mambo waliyojifunza.

Mwanamume mmoja anayezungumza lugha ya Kipunjabi katika eneo la Sherbrooke, Quebec, Kanada, alivutiwa sana wakati dada aliyekuwa kwenye kigari cha machapisho alipomsalimu kwa lugha yake mwenyewe. Salamu hiyo fupi ilipelekea kuwa na mazungumzo mazuri sana, na dada yetu aliweza kuanzisha funzo la Biblia kwa kutumia Broshua Furahia Maisha Milele! Mwanamume huyo alishangaa sana kujua kwamba angeweza kujifunza Biblia kwa wakati na mahali panapomfaa, au hata kujifunza kupitia video mtandaoni. Dada yetu alifanya mipango ili ndugu aanze kujifunza Biblia a mwanamume huyo.

Dada mmoja akiwa kwenye kigari cha machapisho jijini Evansville, Indiana, Marekani, alianzisha mazungumzo na mwanamke aliyesema kwamba alihamia katika eneo hilo ili kumuuguza mama yake ambaye ni mgonjwa. Dada yetu alimpongeza sana mwanamke huyo na akamweleza kwamba anaelewa changamoto za kumtunza mama yake ambaye ni mgonjwa. Kisha dada yetu akasoma maneno yenye kufariji yanayopatikana kwenye Isaya 33:24 na Ufunuo 21:4. Akiwa amevutiwa na ahadi hizo kutoka katika Biblia, mwanamke huyo alimwomba dada yetu asome tena mistari hiyo. Mazungumzo hayo yaliendelea vizuri na wakafanya mipango ili kuendeleza mazungumzo hayo yanayotegemea Biblia.

Tunafurahi kwamba ndugu na dada zetu wa Amerika ya Kaskazini walifaulu kutumia tukio hilo la pekee kuwafundisha wengine kumhusu “Muumba [wetu] Mkuu” na ahadi zake zenye kustaajabisha.​—Mhubiri 12:1, 2.