Kutoka kwa Wasomaji Wetu

Makala za Vijana Nina umri wa miaka 12, nami hufurahia sana kusoma magazeti yenu. Kabla sijaanza kusoma magazeti yenu, ilikuwa vigumu sana kupatana na rafiki zangu kwa sababu wote walikuwa na umri mkubwa kuliko mimi. Lakini baada ya kusoma makala “Vijana Huuliza . . . ,” imekuwa rahisi kupatana nao. Asanteni kwa magazeti yenu. Yanasaidia sana.

N. I., Urusi

Kujifunza Lugha Asanteni kwa ajili ya madokezo muhimu katika makala “Je, Wataka Kujifunza Lugha ya Kigeni?” (Januari 8, 2000) Nilianza kujifunza Kihispania miaka miwili iliyopita, na kujua lugha hiyo kumethibitika kuwa msaada mkubwa. Wakati wa mkusanyiko wa kimataifa uliofanywa hivi majuzi, niliweza kusaidia Wakristo wenzangu wengi kutoka nchi nyingine.

K. L. R., Brazili

Nimekuwa nikijifunza Kifaransa kwa miaka mitatu iliyopita sasa, sina budi kuwashukuru kwa ajili ya makala hiyo. Ilikuwa yenye kutia moyo sana! Nahisi azimio jipya la kuendelea na masomo yangu, nasali na kutumaini kwamba siku moja nitaweza kutumia ustadi wangu wa lugha ya kigeni katika nyanja fulani za huduma ya Kikristo.

L. C., Marekani

Hapa Bavaria, kuna wageni wengi. Ijapokuwa wengi huzungumza Kijerumani, wao huitikia vizuri habari njema za Biblia wanapoisikia katika lugha yao ya mama. Kwa kuwa wengi wanatoka Urusi, niliamua kujifunza lugha yao. Hamjakosea msemapo kwamba jambo hilo ni gumu. Hata hivyo, nimeshinda kizuizi cha kwanza, yaani, kujifunza alfabeti—na sasa sioni herufi hizo kuwa ngumu sana kueleweka.

B. K., Ujerumani

Mlipendekeza kwamba mtu atumie kaseti kujifunza lugha anapoendesha gari. Sidhani inafaa kupendekeza kwamba tufanye jambo linalohitaji kukaziwa fikira tunapoendesha gari. Hilo laweza kusababisha aksidenti.

K. S., Japani

Tuliuliza mashirika kadhaa ya usalama wa magari, na hakuna hata moja ambalo liliandaa utafiti unaoonyesha kwamba ni hatari kusikiliza kaseti zenye kuelimisha, kusikiliza muziki au kuzungumza na watu unaowabeba unapoendesha gari. Ijapokuwa hivyo, twashukuru sana kwa kikumbusha hicho cha kutahadhari unapoendesha gari.—Mhariri.

Upasuaji Bila Damu Ningependa kuwashukuru kwa ajili ya mfululizo “Tiba na Upasuaji Bila Damu—Uhitaji Unaoongezeka.” (Januari 8, 2000) Kwa kadiri fulani ulisaidia kushinda ubaguzi wa watu dhidi ya Mashahidi wa Yehova. Nilienda na magazeti kadhaa ofisini mwangu na kuwapa wafanyakazi wenzi. Wakati wa mapumziko ya mchana, niliona mfanyakazi mwenzi akisoma gazeti hilo kwa hamu. Baadaye alinijia na kusema: “Sijawahi kuwazia namna gazeti hilo lilivyo na makala nyingi zenye kupendeza!”

I. S., Jamhuri ya Cheki

Wadudu Asanteni kwa ajili ya makala “Wadudu Wenye Kustaajabisha.” (Januari 8, 2000) Habari hiyo ambayo bila shaka imefanyiwa utafiti mwingi, ilishughulikiwa ifaavyo. Nilitaka kutazama televisheni, lakini badala yake nikasoma toleo hilo la Amkeni! Baada ya kusoma makala hiyo, nilijua kwamba nilikuwa nimefanya uamuzi ufaao.

O. K., Ufaransa

Kwa sababu singeweza kueleza kwa njia yenye kueleweka kuwapo kwa wadudu, nilifikia mkataa wa kwamba Yehova aliwaumba ili kuhakikisha watu wanatunza nyumba zao zikiwa safi. Lakini makala hiyo ilinionyesha kwamba wadudu ni sehemu nyingine ya uumbaji inayoweza kutufunza mengi kuhusu Muumba wetu mtukufu.

A. A., Marekani