Maisha Katika Paradiso Iliyorudishwa

YESU alizungumza kwa uhakika kuhusu tarajio la watu kuishi tena, na akawaambia wanafunzi wake kwamba jambo hilo lingetendeka hakika. “Katika uumbaji-mpya,” akasema, ‘mtarithi uzima wa milele.’ Yesu alimaanisha nini aliposema “katika uumbaji-mpya”?—Mathayo 19:25-29.

Kulingana na simulizi kama hilo lililoandikwa na Luka, mwandikaji wa Biblia, Yesu alisema kwamba “katika mfumo wa mambo unaokuja,” wanafunzi wake wangepata “uzima wa milele.” (Luka 18:28-30) Kwa nini Biblia inazungumza kuhusu “mfumo wa mambo unaokuja” kuwa sawa na “uumbaji-mpya”?

Inaonekana ilisema hivyo ili kukazia kwamba Yehova Mungu atahakikisha kusudi lake la wanadamu kufurahia paradiso duniani litatimia. Wanadamu watarudishiwa ukamilifu ambao Adamu na Hawa walikuwa nao kabla ya kufanya dhambi. Hivyo, “katika mfumo wa mambo unaokuja,” kutakuwa na “uumbaji-mpya” wa hali za Paradiso zilizokuwa katika bustani ya Edeni.

Jinsi Paradiso Itakavyorudishwa

Alipokuwa duniani Yesu aliwafundisha wafuasi wake wasali kuhusu serikali ambayo Mungu atatumia kurudisha hali za uadilifu duniani pote. Yesu alisema tunapaswa kusali hivi: “Ufalme wako na uje. Mapenzi yako na yatendeke duniani kama ilivyo mbinguni.” (Mathayo 6:10) Mungu alimweka rasmi Mwana wake awe Mtawala wa Ufalme huo ambao utahakikisha kwamba dunia yote itakuwa Paradiso kulingana na kusudi la Mungu.

Kuhusu Yule ambaye Mungu amemweka rasmi awe Mtawala, Biblia inasema hivi: “Kuna mtoto ambaye amezaliwa kwetu, kuna mwana ambaye tumepewa; na utawala wa ukuu utakuwa juu ya bega lake. Naye ataitwa jina . . . Mkuu wa Amani. Hakutakuwa na mwisho kwa habari ya wingi wa huo utawala wa kifalme na kwa amani.” (Isaya 9:6, 7) Hata hivyo, chini ya ‘utawala huo wa kifalme,’ serikali hiyo itatimizaje kusudi la Mungu?

Biblia inatoa jibu inaposema: “Katika siku za wafalme hao, Mungu wa mbinguni atausimamisha ufalme [utawala wa kifalme] ambao hautaharibiwa kamwe. Na ufalme huo hautapewa watu wengine wowote. Utazivunja na kuzikomesha falme hizi zote, nao utasimama mpaka wakati usio na kipimo.”—Danieli 2:44.

Hebu tuchunguze hali zitakazokuwa duniani katika Paradiso iliyorudishwa, naam, “katika uumbaji-mpya,” Mwana wa Mungu atakapotawala akiwa ‘Mtawala wa kifalme’ katika Ufalme wa Baba yake.

 Maisha Yatakuwaje Katika Paradiso?

Ufufuo wa wafu

“Saa inakuja ambayo wale wote waliomo ndani ya makaburi ya ukumbusho wataisikia sauti yake na kutoka.”—Yohana 5:28, 29.

“Kutakuwa na ufufuo wa waadilifu na wasio waadilifu pia.”—Matendo 24:15.

Hakutakuwa na magonjwa, uzee, au kifo

“Wakati huo macho ya vipofu yatafunguliwa, na masikio ya viziwi yatazibuliwa. Wakati huo kilema atapanda juu kama vile paa anavyofanya, na ulimi wa bubu utapaaza sauti kwa furaha.”—Isaya 35:5, 6.

“Mungu mwenyewe atakuwa pamoja nao. Naye atafuta kila chozi kutoka katika macho yao, na kifo hakitakuwapo tena, wala maombolezo wala kilio wala maumivu hayatakuwapo tena. Mambo ya zamani yamepitilia mbali.”—Ufunuo 21:3, 4.

 Vyakula vingi vizuri

“Hakika dunia itatoa mazao yake; Mungu, Mungu wetu, atatubariki.”—Zaburi 67:6.

“Kutakuwa na wingi wa nafaka duniani; juu ya milima kutakuwa na mafuriko.” —Zaburi 72:16.

Kila mtu atakuwa na nyumba nzuri na kazi yenye kufurahisha

“Hakika wao watajenga nyumba na kukaa ndani yake; na hakika wao watapanda mashamba ya mizabibu na kula matunda yake. Hawatajenga na mtu mwingine akae ndani yake; hawatapanda na mtu mwingine ale.”—Isaya 65:21, 22.

 Hakutakuwa tena na uhalifu, jeuri na vita

“Nao waovu, watakatiliwa mbali kutoka duniani; nao wenye hila, watang’olewa kutoka ndani yake.”—Methali 2:22.

“Watafua panga zao ziwe majembe na mikuki yao iwe miundu. Taifa halitainua upanga juu ya taifa, wala hawatajifunza vita tena.”—Isaya 2:4.

Hakutakuwa na woga, na kutakuwa na amani kila mahali

“Kwa kweli watakaa katika usalama, pasipo mtu yeyote wa kuwatetemesha.”—Ezekieli 34:28.

“Hawatasababisha madhara yoyote wala kusababisha uharibifu wowote katika mlima wangu wote mtakatifu; kwa maana dunia hakika itajawa na kumjua Yehova kama vile maji yanavyoifunika bahari.”—Isaya 11:9.

Itapendeza kama nini kuishi wakati ambapo hali hizo zitaenea duniani pote, wakati kila mtu atampenda Mungu na mwanadamu mwenzake! (Mathayo 22:37-39) Unaweza kuwa na hakika kwamba ahadi zote za Mungu zitatimizwa wakati huo. “Mimi nimesema hilo,” Mungu anasema, “pia nitalitenda.”—Isaya 46:11.

Huenda bado kuna mambo mengi unayohitaji kujifunza kumhusu Yehova Mungu na ulimwengu wake ulioahidiwa. Kwa mfano, kuna uthibitisho gani kwamba ulimwengu huo mpya uko karibu? Ufalme wa Mungu utaondoaje serikali zote za dunia? Na ni matukio gani yatakayoongoza kwenye tukio hilo? Mashahidi wa Yehova watafurahi kukusaidia kujibu maswali kama hayo. Kwa habari zaidi, ona ukurasa wa 32 wa gazeti hili.

Tamaa ambayo wanadamu wamekuwa nayo kwa miaka mingi ya kuishi katika ulimwengu mpya wa uadilifu itatimizwa hivi karibuni. Kwa wanadamu wengi ambao wamekufa, kifo si mwisho. Si eti tu wanadamu wanaweza kuishi tena; bali hilo ni kusudi la Mungu. Kwa kweli, wafu wataishi tena! Ndiyo, watapata “uzima ulio wa kweli,” yaani, “ule utakaokuja.”—1 Timotheo 4:8; 6:19.

[Picha katika ukurasa wa 7]

Paradiso iliyopotezwa kwa sababu ya kutotii kwa wanadamu wa kwanza itarudishwa