Je, Kufunga Ni Njia ya Kumkaribia Mungu?

‘Kufunga ni jambo linalomsaidia mtu kutafakari kuhusu mambo ya kiroho na kumkumbusha kwamba kuna mambo muhimu maishani kuliko mali na chakula.’—MWANAMKE MKATOLIKI.

‘Kufunga humsaidia mtu kuwa na uhusiano pamoja na Mungu.’—RABI MYAHUDI.

‘Katika dini yangu, kufunga ni takwa, ni njia kuu ya kumshukuru Mungu na kuonyesha kwamba mtu amejitoa kwake. Ninafunga kwa sababu ninampenda Mungu.’—MFUASI WA DINI YA BAHA’I.

KUFUNGA ni desturi ya kawaida katika dini nyingi duniani kote kama vile Dini ya Kiyahudi, Ubudha, Uhindu, Uislamu, na Ujaini. Watu wengi wanaamini kwamba wanaweza kumkaribia Mungu kwa kuacha kula katika kipindi fulani.

Maoni yako ni nini? Je, unapaswa kufunga? Neno la Mungu, Biblia, linasema nini kuhusu kufunga?

Pindi za Kufunga Nyakati za Biblia

Nyakati za Biblia, watu walifunga kwa sababu mbalimbali zilizokubaliwa na Mungu. Baadhi yao walifunga kwa sababu ya huzuni au toba (1 Samweli 7:4-6), wengine walifunga ili kuomba mwongozo wa Mungu au ili wapate kukubaliwa naye (Waamuzi 20:26-28; Luka 2:36, 37), au ili kukaza fikira walipotafakari.—Mathayo 4:1, 2.

Hata hivyo, Biblia inataja pia visa vya kufunga ambavyo Mungu hakuvikubali. Mfalme Sauli alifunga kabla ya kwenda kumwona mwanamke aliyewasiliana na pepo. (Mambo ya Walawi 20:6; 1 Samweli 28:20) Watu waovu, kama vile Yezebeli na watu washupavu ambao walitaka kumuua mtume Paulo, waliamua kufunga au kuwaamuru wengine wafunge. (1 Wafalme 21:7-12; Matendo 23:12-14) Mafarisayo walijulikana sana kwa kufunga kwa ukawaida. (Marko 2:18) Hata hivyo, Yesu aliwashutumu na hawakumpendeza Mungu. (Mathayo 6:16; Luka 18:12) Yehova alikataa vilevile kufunga kwa Waisraeli fulani kwa sababu ya mwenendo na nia zao mbaya.—Yeremia 14:12.

Visa hivyo vinaonyesha kwamba si tendo la kufunga hasa linalompendeza Mungu. Hata  hivyo, watumishi wengi wa Mungu waliofunga kwa moyo mweupe walikubaliwa naye. Basi, je, Wakristo wanapaswa kufunga?

Je, Kufunga Ni Takwa kwa Wakristo?

Sheria ya Musa iliwaamuru Wayahudi ‘wazitese nafsi zao,’ yaani, wafunge mara moja kwa mwaka katika Siku ya Upatanisho. (Mambo ya Walawi 16:29-31; Zaburi 35:13) Yehova hakuwaamuru watu wake wafunge katika siku yoyote nyingine ila Siku ya Upatanisho. * Kwa hiyo, Wayahudi walioshika Sheria ya Musa walipaswa kufunga katika siku hiyo. Lakini kushika Sheria ya Musa si takwa kwa Wakristo.—Waroma 10:4; Wakolosai 2:14.

Ijapokuwa Yesu alifunga kupatana na takwa la Sheria, hakuwa na zoea la kufunga. Aliwaambia wanafunzi wake jinsi ya kufunga kwa njia inayofaa, lakini hakuwaamuru kamwe wafunge. (Mathayo 6:16-18; 9:14) Kwa nini, basi, Yesu alisema kwamba wanafunzi wake wangefunga baada ya kifo chake? (Mathayo 9:15) Maneno haya si amri, bali yanamaanisha kwamba Yesu alipokufa wanafunzi wake wangekuwa na huzuni nyingi sana hivi kwamba wangepoteza hamu ya chakula.

Masimulizi mawili katika Biblia kuwahusu Wakristo wa karne ya kwanza waliofunga, yanaonyesha kwamba mtu mwenye nia nzuri akiamua kufunga, ana kibali cha Mungu. (Matendo 13:2, 3; 14:23) * Kwa hiyo, kufunga si takwa kwa Wakristo. Lakini yule ambaye anaamua kufunga anapaswa kufikiria mambo kadhaa.

Mambo ya Kuepuka

Jambo moja ambalo mtu anayefunga anapaswa kuepuka ni kujiona kuwa mwadilifu. Biblia inatuonya tusiwe wenye “unyenyekevu wa kujifanya.” (Wakolosai 2:20-23) Mfano wa Yesu kumhusu yule Farisayo mwenye kiburi aliyejiona kuwa bora kuliko wengine kwa sababu alifunga kwa ukawaida, unaonyesha wazi kwamba Mungu anakataa mtazamo kama huo.—Luka 18:9-14.

Pia, haifai kuwaambia wengine kwamba umefunga, au kufunga kwa sababu mtu mwingine anakuambia ufunge. Katika andiko la Mathayo 6:16-18, Yesu alieleza kwamba kufunga ni jambo la kibinafsi, kati yako na Mungu, na hupaswi kuwaambia wengine kwamba umefunga.

Ni makosa kufikiri kwamba kufunga kunaweza kulipia dhambi. Ili tendo la kufunga likubaliwe na Mungu, ni lazima yule anayefunga atii sheria zake. (Isaya 58:3-7) Msamaha haupatikani kwa kufunga bali kwa toba ya kweli. (Yoeli 2:12, 13) Biblia inakazia  kwamba tunapata msamaha kwa sababu Yehova alionyesha fadhili zisizostahiliwa kwa kumtoa Kristo kuwa dhabihu. Haiwezekani kustahili kupata msamaha kwa sababu ya matendo kama vile kufunga.—Waroma 3:24, 27, 28; Wagalatia 2:16; Waefeso 2:8, 9.

Andiko la Isaya 58:3 linaonyesha maoni mengine yenye makosa. Waisraeli walikuwa na maoni kwamba Yehova alikuwa na deni kwao kwa sababu walikuwa wakifunga, kana kwamba kwa kufunga walimtendea Mungu fadhili. Waliuliza hivi: “Kwa nini tulifunga nawe hukuona, tukazitesa nafsi zetu nawe ukawa huangalii?” Watu wengi leo pia wanatarajia kwamba Mungu atawatendea fadhili kwa njia fulani kwa sababu wanafunga. Tusiige kamwe mtazamo huo usio na heshima na usiopatana na Maandiko!

Wengine wanaamini kwamba watastahili kupata thawabu fulani kwa kutesa mwili wao kwa kufunga, kujipigapiga, na kadhalika. Neno la Mungu linakataa maoni haya linaposema kwamba mambo kama “kuutendea mwili kwa ukali,” hayana “thamani yoyote katika kuzuia” tamaa mbaya.—Wakolosai 2:20-23.

Maoni Yanayofaa

Kufunga si takwa kwa Wakristo, wala si vibaya kufunga. Nyakati fulani, kufunga kunaweza kuwa na manufaa ikiwa mambo ambayo yametajwa yanaepukwa. Hata hivyo, kufunga si jambo kuu katika ibada ya kweli. Yehova ni “Mungu mwenye furaha,” naye anataka watumishi wake wawe wenye furaha. (1 Timotheo 1:11) Neno lake linasema hivi: “Hakuna jambo lingine bora kwao kuliko . . . kila mtu ale, naam, anywe na kuona mema kwa ajili ya kazi yake yote iliyo ngumu. Hiyo ndiyo zawadi ya Mungu.”—Mhubiri 3:12, 13.

Tunapaswa kumwabudu Mungu kwa furaha, lakini Biblia haihusianishi kamwe kufunga na hali ya furaha. Isitoshe, ikiwa kufunga kungeathiri afya yetu au kufanya tukose nguvu za kufanya kwa shangwe kazi ambayo Muumba wetu amewapa Wakristo wa kweli, yaani, kuhubiri habari njema za Ufalme, basi, kule kufunga kwetu kungekuwa bure.

Basi, tufunge tusifunge, hatupaswi kuwahukumu wengine. Wakristo wa kweli hawapaswi kubishania habari ya kufunga, “kwa maana ufalme wa Mungu haumaanishi kula na kunywa, bali unamaanisha uadilifu na amani na shangwe pamoja na roho takatifu.”—Waroma 14:17.

[Maelezo ya chini]

[Blabu katika ukurasa wa 28]

Mafarisayo walifunga ili kujionyesha kuwa waadilifu

[Blabu katika ukurasa wa 29]

“Ufalme wa Mungu haumaanishi kula na kunywa, bali unamaanisha uadilifu na amani na shangwe”

[Sanduku katika ukurasa wa 29]

Namna Gani Kwaresima?

Inasemekana kwamba watu wanafunga siku 40 wakati wa Kwaresima, ili kukumbuka kwamba Kristo alifunga kwa siku 40. Lakini, Yesu hakuwaamuru wanafunzi wake wakumbuke pindi hiyo, na hakuna uthibitisho wa kwamba waliiadhimisha. Kufunga kwa siku 40 kabla ya Ista kunatajwa kwa mara ya kwanza katika barua za Athanasio zilizoandikwa katika mwaka wa 330 W.K.

Desturi ya kuadhimisha Kwaresima kabla ya Ista, inaweza kumchanganya mtu kwa sababu Yesu hakufunga kabla ya kifo chake, bali alifunga baada ya ubatizo wake. Hata hivyo, Wababiloni, Wagiriki, na Wamisri wa kale walikuwa na desturi ya kufunga kwa siku 40 mapema katika mwaka. Bila shaka, desturi ya Kwaresima ambayo watu fulani wanadai kuwa ya “Kikristo,” ilitokana na desturi za watu hao.