Wasomaji Wetu Wanauliza . . .

Je, Watu Wote Wana Nafasi Sawa za Kupata Kumjua Mungu?

▪ Alipoulizwa kuhusu amri kuu zaidi ya zote, Yesu alisema hivi: “Lazima umpende Yehova Mungu wako kwa moyo wako wote na kwa nafsi yako yote na kwa akili yako yote.” (Mathayo 22:37) Hata hivyo, ili watu wampende Mungu, wanahitaji kupata ujuzi sahihi kumhusu. (Yohana 17:3) Je, kila mtu atapata nafasi sawa ya kupata ujuzi huo?

Chanzo kikuu cha ujuzi kumhusu Mungu ni Biblia. (2 Timotheo 3:16) Watu wengi wanaishi katika sehemu ambazo Biblia inapatikana kwa urahisi. Pia, huenda watu hao wanapata nafasi tena na tena ya kupata ujuzi sahihi kumhusu Mungu kupitia funzo la Biblia. (Mathayo 28:19) Baadhi yao wamelelewa na wazazi Wakristo wenye upendo, ambao kila siku wanawapa nafasi ya kujifunza kumhusu Mungu.—Kumbukumbu la Torati 6:6, 7; Waefeso 6:4.

Hata hivyo, wengine wanaishi katika hali tofauti na hizo. Kati yao kuna wale ambao wamelelewa na wazazi wenye jeuri ambao hawana upendo wa asili kuelekea watoto wao. (2 Timotheo 3:1-5) Huenda ikawa vigumu kwa watu waliolelewa katika hali kama hizo kumuona Mungu kuwa Baba wa mbinguni mwenye upendo. Wengi hawakupata elimu ya kutosha, hivyo hawana uwezo wa kusoma Biblia vizuri. Pia, akili za wengine wao zimepofushwa na mafundisho ya dini za uwongo, au wamezaliwa katika familia, jamii, au nchi ambazo haziruhusu kufundishwa kwa kweli za Biblia. (2 Wakorintho 4:4) Je, hali za watu kama hao zinawanyima nafasi ya kujifunza kumhusu Mungu na kumpenda?

Yesu alisema kuwa hali ngumu ambazo watu fulani wanakabili zitafanya iwe vigumu kwao kumpenda na kumtii Mungu. (Mathayo 19:23, 24) Hata hivyo, Yesu aliwakumbusha wanafunzi wake kuwa ingawa vizuizi fulani huenda vikaonekana kuwa vikubwa sana hivi kwamba mwanadamu hawezi kuviondoa, “kwa Mungu mambo yote yanawezekana.”—Mathayo 19:25, 26.

Fikiria mambo yafuatayo: Yehova Mungu amehakikisha kuwa Neno lake, Biblia, ni kitabu kilichosambazwa zaidi kuliko kitabu kingine chochote katika historia ya mwanadamu. Biblia ilitabiri kuwa habari njema za Mungu na kusudi lake kuhusu dunia zingehubiriwa katika “dunia yote inayokaliwa.” (Mathayo 24:14) Leo, Mashahidi wa Yehova wanahubiri habari hizo njema katika nchi zaidi ya 230 na kuchapa vitabu vinavyotegemea Biblia katika lugha 500 hivi. Hata watu ambao hawawezi kupata Biblia wanaweza kujifunza kumhusu Mungu wa kweli kwa kutazama vitu alivyoviumba.—Waroma 1:20.

Zaidi ya hayo, Neno la Mungu linasema hivi: “Yehova anaichunguza mioyo yote, naye anatambua kila mwelekeo wa fikira. Ukimtafuta, ataacha umpate.” (1 Mambo ya Nyakati 28:9) Kwa hiyo, Yehova haahidi kwamba watu wote watapata nafasi sawa ya kumjua, lakini anahakikisha kuwa wote wenye moyo mweupe wataipata. Hata atahakikisha kuwa watu ambao hawakuweza kujifunza kumhusu watapata nafasi ya kufanya hivyo watakapofufuliwa katika ulimwengu mpya.—Matendo 24:15.