Biblia Inabadili Maisha

MWANAMUME fulani kutoka Scotland alipata kitu gani chenye thamani kuliko kufuatia biashara yenye mafanikio? Ni nini kilichomsaidia mwanamume mmoja huko Brazili kuacha maisha mapotovu kiadili na kuacha kuvuta kokeini kali? Mwanamume fulani huko Slovenia aliwezaje kuacha zoea lake la kunywa pombe kupindukia? Soma mambo ambayo watu hao wanasema.

“Maisha Yangu Yalionekana Kuwa Mazuri.”​—JOHN RICKETTS

MWAKA WA KUZALIWA: 1958

NCHI: SCOTLAND

HISTORIA: MFANYABIASHARA MWENYE MAFANIKIO

MAISHA YANGU YA ZAMANI: Niliishi maisha ya starehe tangu utotoni. Baba yangu alikuwa ofisa katika jeshi la Uingereza, hivyo, familia yetu ilihama mara nyingi. Mbali na Scotland, tuliishi Uingereza, Ujerumani, Kenya, Malasia, Ireland, na Saiprasi. Tangu nilipokuwa na umri wa miaka minane, nilisomea katika shule za bweni nchini Scotland. Mwishowe nilihitimu katika Chuo Kikuu cha Cambridge.

Nilipokuwa na umri wa miaka 20, nilianza kazi ya miaka minane katika biashara ya mafuta. Mwanzoni nilifanya kazi hiyo huko Amerika Kusini, kisha Afrika, na baadaye Magharibi mwa Australia. Baada ya kuhamia Australia, nilianzisha kampuni ya uwekezaji na hatimaye nikaiuza.

Pesa nilizopata baada ya kuuza kampuni hiyo ziliniwezesha kustaafu nikiwa na umri wa miaka 40. Sasa nilitumia muda niliokuwa nao kusafiri. Niliendesha pikipiki kuzunguka Australia mara mbili, na nikasafiri kuzunguka dunia. Maisha yangu yalionekana kuwa mazuri.

JINSI BIBLIA ILIVYOBADILI MAISHA YANGU: Hata kabla ya kustaafu, nilitamani kupata njia ya kumshukuru Mungu kwa sababu ya maisha niliyokuwa nikifurahia. Nilianza kwenda kwenye Kanisa la Anglikana ambalo nilikuwa nikihudhuria tangu utotoni. Lakini kanisa hilo halikufundisha mambo mengi kutoka katika Biblia. Kisha, nilijifunza na watu wa dini ya Mormon, lakini nikakata tamaa kwa sababu hawakutegemea Biblia.

Siku moja, Mashahidi wa Yehova walibisha mlango wangu. Mara moja niliona kwamba mafundisho yao yalitegemea kabisa Biblia. Andiko moja ambalo walinisomea ni 1 Timotheo 2:3, 4. Andiko hilo linasema mapenzi ya Mungu ni kwamba “watu wa namna zote waokolewe na kupata ujuzi sahihi wa kweli.” Nilifurahi kujua kwamba Mashahidi hawakukazia tu ujuzi bali ujuzi sahihi unaotegemea Biblia.

Kujifunza Biblia na Mashahidi wa Yehova kulinisaidia kupata ujuzi huo sahihi. Kwa mfano, nilijifunza kwamba Mungu na Yesu si sehemu ya Utatu usioeleweka; badala yake, wao ni watu  wawili tofauti. (Yohana 14:28; 1 Wakorintho 11:3) Nilifurahi kujifunza ukweli huo rahisi. Pia, nilikasirika kwa sababu wakati uliopita nilikuwa nimejitahidi sana kuelewa fundisho hilo lisiloeleweka!

Punde si punde, nilianza kuhudhuria mikutano ya Mashahidi wa Yehova. Niliguswa moyo na urafiki na viwango vya juu vya maadili vya kila mtu aliyekuwa huko​—walionekana kama watakatifu. Upendo wao wa kweli ulinisadikisha kwamba nilikuwa nimeipata dini ya kweli.​—Yohana 13:35.

JINSI AMBAVYO NIMEFAIDIKA: Baada ya kubatizwa, nilikutana na mwanamke mzuri sana anayeitwa Diane. Alikuwa amelelewa katika familia ya Mashahidi wa Yehova, na alikuwa na sifa nyingi nzuri ambazo zilinivutia. Baada ya muda, tulioana. Urafiki wa Diane na utegemezo wake umekuwa baraka ya kweli kutoka kwa Yehova.

Mimi na Diane tulikuza tamaa kubwa ya kutaka kuhamia eneo lenye uhitaji mkubwa zaidi wa wahubiri wa habari njema za Biblia. Mwaka wa 2010, tulihamia nchi ya Belize, Amerika ya Kati. Huku tunawahubiria watu wanaompenda Mungu na ambao wanataka kujifunza mengi zaidi kumhusu.

Nimepata amani ya akili kwa kuwa sasa ninajua ukweli kumhusu Mungu na Neno lake, Biblia. Nikiwa mhubiri wa wakati wote, nimepata shangwe kwa kuwafundisha watu wengi Biblia. Hakuna jambo zuri kuliko kuona kweli za Biblia zikifanya maisha ya mtu yawe bora, kama zilivyonisaidia. Hatimaye nimepata njia bora ya kumshukuru Mungu kwa sababu ya maisha ninayofurahia.

“Walinitendea kwa Fadhili Sana.”​—MAURÍCIO ARAÚJO

MWAKA WA KUZALIWA: 1967

NCHI: BRAZILI

HISTORIA: MAISHA MAPOTOVU KIADILI

MAISHA YANGU YA ZAMANI: Nililelewa huko Avaré, mji mdogo wenye utulivu ulio katika jimbo la São Paulo. Wakaaji wengi wa mji huo wanafanya kazi ya kuajiriwa.

Baba yangu alikufa mama yangu alipokuwa karibu kunizaa. Nilipokuwa mvulana mdogo, nilivalia mavazi ya mama yangu alipokuwa ameondoka nyumbani. Niliiga tabia za kike, na watu wakaanza kufikiri kwamba nilikuwa nikilala na wanaume. Baada ya muda nilianza kufanya ngono na wavulana na vilevile wanaume.

Nilipokuwa katika miaka ya mwisho-mwisho ya utineja, nilikuwa nikitafuta kwa bidii popote watu (wanaume na wanawake) wa kufanya nao ngono, iwe kwenye mabaa, vilabu vya usiku, na hata makanisani. Wakati wa sherehe, nilivalia kama mwanamke na kucheza kwenye maonyesho ya wacheza-dansi wa samba. Nilijulikana sana.

Marafiki wangu walitia ndani wanaume waliolala na wanaume, makahaba, na watumiaji wa dawa za kulevya. Wengine wao walinishawishi nitumie kokeini kali, na baada ya muda mfupi nikawa mraibu. Nyakati nyingine tulivuta kokeini kali usiku kucha. Pindi nyingine, ningejitenga na kuvuta peke yangu kokeini kali mchana  kutwa. Nilikonda sana hivi kwamba watu wakaanza kusema nilikuwa na UKIMWI.

JINSI BIBLIA ILIVYOBADILI MAISHA YANGU: Karibu na kipindi hicho, nilikutana na Mashahidi wa Yehova. Walinitendea kwa fadhili sana. Andiko moja ambalo walinisomea ni Waroma 10:13, linalosema: “Kila mtu anayeliitia jina la Yehova ataokolewa.” Maneno hayo yalinisaidia kujua umuhimu wa kutumia jina la Yehova. Pindi nyingi, baada ya kuvuta kokeini kali usiku kucha, nilifungua dirisha, nikatazama mbinguni, na kusali kwa Yehova huku nikitokwa na machozi, nikimsihi anisaidie.

Kwa kuwa nilihangaika kumwona mama yangu mwenye huzuni akiteseka sana alipokuwa akiona nikiharibu maisha yangu kwa kutumia dawa za kulevya, niliamua kuacha kuzitumia. Muda mfupi baadaye, nilikubali kujifunza Biblia na Mashahidi wa Yehova. Walinihakikishia kwamba kwa kujifunza Biblia ningeimarisha azimio langu la kuacha kutumia dawa za kulevya, na ndivyo ilivyokuwa!

Nilipoendelea kujifunza Biblia nilitambua kwamba nilihitaji kubadili maisha yangu. Ilikuwa vigumu hasa kuacha zoea la kulala na wanaume, kwa sababu nilizoea kufanya hivyo tangu nilipokuwa mvulana. Hata hivyo, jambo lililonisaidia ni kuepuka maeneo fulani na watu nilioshirikiana nao. Nilijitenga na marafiki wangu wa zamani na nikaacha kwenda kwenye mabaa na vilabu vya usiku.

Ingawa haikuwa rahisi kufanya mabadiliko hayo, nilifarijiwa kwa kujifunza kwamba Yehova alinijali na kwamba alielewa hali niliyokuwa nikikabiliana nayo. (1 Yohana 3:19, 20) Kufikia mwaka wa 2002, nilikuwa nimeacha kabisa zoea la kulala na wanaume, na mwaka huohuo nikabatizwa na kuwa Shahidi wa Yehova.

JINSI AMBAVYO NIMEFAIDIKA: Mama yangu alifurahi sana kuona mabadiliko niliyofanya hivi kwamba akaanza kujifunza Biblia. Jambo la kusikitisha ni kwamba alishikwa na ugonjwa wa kiharusi. Hata hivyo, ameendelea kusitawisha upendo wake kwa Yehova na kweli za Biblia.

Kwa miaka minane iliyopita, nimekuwa mhubiri wa wakati wote, nikitumia muda wangu mwingi kuwafundisha wengine Biblia. Ninakubali kwamba nyakati nyingine nimelazimika kupambana na tamaa zisizofaa. Lakini ninafarijika kujua kwamba kwa kuepuka kuongozwa na tamaa hizo, ninaweza kumpendeza Yehova.

Kumkaribia Yehova na kuishi kwa njia ambayo inampendeza kumefanya nijiheshimu zaidi. Leo, mimi ni mwanamume mwenye furaha.

“Nilikuwa Mtungi wa Pombe Usiojaa.”​—LUKA ŠUC

MWAKA WA KUZALIWA: 1975

NCHI: SLOVENIA

HISTORIA: MLEVI KUPINDUKIA

MAISHA YANGU YA ZAMANI: Nilizaliwa Ljubljana, mji mkuu wa Slovenia. Nilikuwa na maisha mazuri ya utotoni hadi nilipofikia umri wa miaka minne. Kisha baba yangu akajiua. Baada ya msiba huo, mama yangu alilazimika kufanya kazi kwa bidii ili kuwalea wavulana wawili, mimi na kakangu.

Nilipokuwa na umri wa miaka 15, nilianza kuishi na nyanya yangu. Nilifurahia kuishi naye, kwa kuwa rafiki zangu wengi waliishi karibu na nyumba  yake. Pia, nilikuwa na uhuru mwingi zaidi kuliko nilipokuwa nikiishi na mama yangu. Nilipokuwa na umri wa miaka 16, nilianza kushirikiana na watu ambao walikunywa pombe kila mwisho-juma. Nilifuga nywele ndefu, nikaanza kuvalia kama mwasi, na baadaye nikaanza kuvuta sigara.

Ingawa nilitumia na kuacha dawa mbalimbali za kulevya, niliendelea kunywa pombe kwa kuwa nilifurahia sana kunywa. Mwanzoni nilikunywa glasi chache tu za divai lakini baada ya muda mfupi, nikaanza kunywa zaidi ya chupa moja. Nilikuwa stadi wa kuficha kiasi cha pombe nilichokunywa. Mara nyingi, harufu ya pombe tu ndiyo iliyofanya watu wajue kwamba nilikuwa nimetoka kunywa. Hata ingawa walisikia harufu, hakuna mtu aliyejua kwamba labda nilikuwa nimekunywa lita kadhaa za divai au bia na kuzichanganya na pombe kali inayoitwa vodka!

Mara nyingi, niliwasaidia rafiki zangu kutembea baada ya kukesha kwenye disko, hata ingawa huenda nilikuwa nimekunywa pombe mara mbili zaidi ya kiasi walichokunywa. Siku moja, nilimsikia mmoja wa rafiki zangu akisema kwamba nilikuwa mtungi wa pombe usiojaa—usemi huo wa Kislovenia wa dharau unatumiwa kumaanisha mtu ambaye anakunywa pombe kwa wingi kuliko wengine. Maneno hayo yaliniumiza sana.

Nilianza kufikiria jinsi nilivyokuwa nikitumia maisha yangu. Nililemewa na hisia za kutofaa. Nilihisi kwamba kila jambo nililokuwa nikifanya maishani halikuwa na maana.

JINSI BIBLIA ILIVYOBADILI MAISHA YANGU: Karibu na kipindi hicho, nilitambua kwamba mmoja kati ya wanafunzi wenzangu alikuwa amebadilika na kuwa mpole zaidi. Kwa kuwa nilitaka kujua mengi kuhusu mabadiliko hayo, nilimwomba twende kwenye mkahawa fulani. Tulipokuwa tukizungumza, alinieleza kwamba alikuwa ameanza kujifunza Biblia na Mashahidi wa Yehova. Alinieleza mambo fulani aliyokuwa akijifunza, na yote yalikuwa mapya kabisa kwangu kwa sababu sikuwa mfuasi wa dini yoyote tangu utotoni. Nilianza kuhudhuria mikutano ya Mashahidi wa Yehova na kujifunza Biblia pamoja nao.

Kupitia kujifunza Biblia, nilifahamu kweli nyingi muhimu na zenye kuchochea. Kwa mfano, nilijifunza kwamba tunaishi katika kipindi ambacho Biblia inakiita “siku za mwisho.” (2 Timotheo 3:1-5) Pia, nilijifunza kwamba hivi karibuni Mungu atawaondoa watu waovu duniani na kuwapa watu wazuri nafasi ya kufurahia uzima wa milele katika Paradiso. (Zaburi 37:29) Nilitamani sana kubadili maisha yangu ili niwe miongoni mwa watu hao wazuri.

Nilianza kuwaeleza marafiki wangu kuhusu kweli za Biblia ambazo nilikuwa nikijifunza. Wengi walinidhihaki kwa sababu ya mambo niliyowaambia, lakini hilo lilithibitika kuwa baraka kwa njia isiyotazamiwa. Itikio lao lilinisaidia kutambua kwamba hawakuwa marafiki wa kweli. Niligundua kuwa tatizo langu la kunywa kupita kiasi lilihusiana sana na watu nilioshirikiana nao. Kila siku, walingojea kwa hamu mwisho-juma ufike ili walewe tena.

Nilikatiza urafiki pamoja nao na nikaanzisha urafiki wenye kujenga pamoja na Mashahidi wa Yehova. Nilitiwa moyo sana niliposhirikiana nao, kwa kuwa, hawa ndio watu waliompenda Mungu kikweli na ambao walijaribu kabisa kuishi kulingana na viwango vyake. Hatua kwa hatua, nilifaulu kuacha zoea langu la kunywa pombe kupindukia.

JINSI AMBAVYO NIMEFAIDIKA: Ninamshukuru Yehova kwa kuwa sasa sihitaji kunywa pombe ili niwe na furaha. Kwa kweli sijui ingekuwaje ikiwa ningeendelea na maisha yangu ya zamani. Hata hivyo, nina hakika kwamba maisha yangu ni bora sasa.

Kwa miaka saba iliyopita, nimekuwa na pendeleo la kutumikia katika ofisi ya tawi ya Mashahidi wa Yehova nchini Slovenia. Kumjua Yehova na kumtumikia kumefanya niwe na maisha yenye kusudi kwelikweli.