UNGEHISIJE kama ungeshtakiwa kwa uwongo kuhusu uhalifu ambao hukufanya? Namna gani ikiwa uhalifu huo ungewasababishia watu wengine mateso mengi, kutia ndani watu wasio na hatia? Bila shaka, ungejitahidi kuliondolea jina lako lawama! Je, unajua kwamba Yehova anakabili hali inayolingana na hiyo? Leo, watu wengi wanamlaumu Mungu kimakosa kwa sababu ya ukosefu wa haki na mateso yaliyo ulimwenguni. Je, Yehova ataliondolea jina lake lawama? Bila, shaka, atafanya hivyo! Ona jambo linalosemwa kwenye kitabu cha Ezekieli.​—Soma Ezekieli 39:7.

Yehova anasema: “Sitaliacha tena jina langu litiwe unajisi.” Wanadamu wanapomlaumu kwa sababu ya ukosefu wa haki, wanalitia unajisi jina lake. Jinsi gani? Katika Biblia, mara nyingi “jina” huwakilisha sifa za mtu. Kitabu kimoja cha marejeo kinasema kwamba jina la Mungu linamaanisha “mambo tunayojua kumhusu, yaani, jinsi ambavyo amejifunua; pia linawakilisha sifa zake, na msimamo wake.” Jina la Yehova linatia ndani sifa zake. Yehova anaonaje ukosefu wa haki? Anauchukia! Pia, anawahurumia wale wanaotendewa isivyo haki. * (Kutoka 22:22-24) Wanadamu wanaposema kwamba Mungu ndiye anayesababisha mambo anayochukia, wanamvunjia heshima. Hivyo, ‘wanalidharau jina lake.’​—Zaburi 74:10.

Ona kwamba Yehova anatumia usemi “jina langu takatifu” mara mbili. (Mstari wa 7, Union Version) Katika Biblia, jina la Yehova linahusianishwa na maneno “takatifu” na “utakatifu” mara nyingi. Neno “takatifu” linamaanisha kuwekwa kando; pia linamaanisha usafi na utakatifu. Jina la Yehova ni takatifu kwa sababu Mungu anayeitwa kwa jina hilo ni mtakatifu, yuko kando kabisa na kitu chochote chenye dhambi na kisicho safi. Je, unaona ni kwa nini wale wanaomlaumu Yehova kwa sababu ya uovu wanalitia unajisi kwa njia kubwa sana ‘jina lake takatifu’?

Kichwa kikuu cha Biblia kinahusu kusudi la Yehova la kulitakasa jina lake kupita Ufalme wake. Kichwa hicho kinakaziwa katika kitabu cha Ezekieli, ambacho kinasema tena na tena “mataifa watalazimika kujua kwamba mimi ni Yehova.” (Ezekieli 36:23; 37:28; 38:23; 39:7) Ona kuwa mataifa hawatachagua kujua yeye ni Yehova au la. Badala yake “watalazimika kujua.” Kwa maneno mengine, Yehova anakusudia kuchukua hatua ambayo itachochea mataifa yaliyo duniani kumtambua yeye ni nani, yaani, yeye ni Yehova, Bwana Mwenye Enzi Kuu, ambaye jina lake linawakilisha mambo yote yaliyo matakatifu na yaliyo safi.

Ahadi hii ambayo hurudiwa tena na tena, “mataifa watalazimika kujua kwamba mimi ni Yehova,” ni habari njema kwa wale wanaotamani kuona mwisho wa ukosefu wa haki na mateso. Hivi karibuni, Yehova atatimiza ahadi hiyo na kuliondolea jina lake lawama zote. Ataondolea mbali uovu na watu waovu lakini hatawaangamiza wale wanaotambua na kuliheshimu jina lake na maana ya jina hilo. (Methali 18:10) Je, unachochewa kumkaribia zaidi Yehova, Mungu mtakatifu, ambaye ni “mpenda-haki”?​—Zaburi 37:9-11, 28.