Jifunze Kutoka Katika Neno La Mungu
Je, Mungu Ataleta Serikali Itakayotawala Ulimwengu Mzima?
Makala hii inazungumzia maswali ambayo huenda umeuliza na inakuonyesha mahali unapoweza kupata majibu katika Biblia yako. Mashahidi wa Yehova watafurahi kuzungumzia majibu hayo pamoja nawe.
1. Kwa nini wanadamu wanahitaji serikali moja ulimwenguni?
Leo, matatizo yanayowapata wanadamu yameenea ulimwenguni pote. Katika mataifa mengi watu wengi ni maskini na wamekandamizwa. Katika nchi nyingine, watu wengi wanaonekana kuwa na vitu vingi kuliko wanavyovihitaji. Ni usimamizi tu wa ulimwenguni pote unaoweza kusawazisha matumizi ya rasilimali za dunia.—Soma Mhubiri 4:1; 8:9.
2. Ni nani anayeweza kutawala serikali ya ulimwenguni pote?
Watu wengi hawakubali kwamba inawezekana kuwa na mtawala mmoja ulimwenguni kwa sababu hakuna mwanamume au mwanamke anayeweza kufanya kazi hiyo vizuri. Vilevile, hakuna mwanadamu anayeweza kukubaliwa na kila mtu. Pia, wanadamu wana mwelekeo wa kuwa wafisadi wanapopata mamlaka. Wazo la kuwa na mtawala mmoja wa kimabavu ni lenye kuogopesha sana.—Soma Methali 29:2; Yeremia 10:23.
Yehova Mungu amemchagua Mwana wake, Yesu, awatawale wanadamu milele. (Luka 1:32, 33) Yesu aliwahi kuishi duniani. Alipokuwa duniani, aliwaponya wagonjwa, akawafundisha wapole, na alitumia muda fulani pamoja na watoto. (Marko 1:40-42; 6:34; 10:13-16) Kwa hiyo, Yesu ndiye Mtawala anayefaa.—Soma Yohana 1:14.
3. Je, kweli inawezekana kuwa na serikali moja ulimwenguni pote?
Mungu amemchagua Mwanawe atawale dunia akiwa mbinguni. (Danieli 7:13, 14) Kama vile tu mtawala wa kibinadamu asivyohitaji kuwa katika kila jiji analotawala, ndivyo Yesu asivyohitaji kuwa kila mahali duniani ili awatawale wanadamu.—Soma Mathayo 8:5-9, 13.
Je, kila mtu atamkubali Yesu kuwa Mtawala? Hapana. Ni wale tu wanaopenda mema ndio watakaomkubali. Yehova atawaondoa watu wanaomkataa Mtawala mwenye upendo na mwadilifu ambaye amemchagua.—Soma Mathayo 25:31-33, 46.
4. Mtawala huyo wa ulimwengu atafanya nini?
Kama mchungaji anavyowakusanya kondoo wake, tayari Yesu anawakusanya watu wapole kutoka kwa mataifa yote na kuwafundisha njia za Mungu za upendo. (Yohana 10:16; 13:34) Watu kama hao wanakuwa wafuasi wenye bidii wa Yesu na utawala wake. (Zaburi 72:8; Mathayo 4:19, 20) Ulimwenguni pote, raia wanyoofu wa Yesu wanatangaza kwa umoja kwamba Yesu amekuwa Mfalme.—Soma Mathayo 24:14.
Hivi karibuni, Yesu atatenda kwa uwezo ili kuwaondolea wanadamu serikali zenye ufisadi. Amechagua baadhi ya wafuasi wake washikamanifu watawale dunia pamoja naye wakiwa wafalme mbinguni. (Danieli 2:44; 7:27) Ufalme wa Yesu utaijaza dunia ujuzi kumhusu Yehova na kuleta paradiso ambayo ilipotea mwanzoni mwa historia ya wanadamu.—Soma Isaya 11:3, 9; Mathayo 19:28.
