Kama ujuavyo, uwongo ni jambo unalosema huku ukijua si la kweli. Je, umewahi kudanganya?— * Hata baadhi ya watu wazima wanaompenda Mungu wamewahi kudanganya. Huenda unajua mtu fulani anayetajwa katika Biblia ambaye alidanganya. Anaitwa Petro, mmoja wa mitume 12 wa Yesu. Acheni tusikilize hadithi kuhusu kilichofanya adanganye.

Baada ya kukamatwa, Yesu anapelekwa nyumbani kwa kuhani mkuu. Ni usiku wa manane. Petro anaingia kwenye ua wa nyumba ya kuhani bila kutambulika. Kupitia mwangaza wa moto, kijakazi wa kuhani mkuu aliyemruhusu Petro aingie anamtambua. “Wewe, pia, ulikuwa pamoja na Yesu,” anasema. Kwa woga, Petro anakataa.

Biblia inasema baadaye “msichana mwingine alimwona.” Akasema: “Mtu huyu alikuwa pamoja na Yesu.” Tena, Petro anakataa. Baada ya muda mfupi, watu wengine wanamjia Petro na kumwambia: “Hakika wewe pia ni mmoja wao.”

Petro anazidi kuogopa. Hivyo, kwa mara ya tatu, anadanganya, kwa kusema: “Simjui mtu huyo!” Jogoo anawika. Yesu anamtazama Petro, na Petro anakumbuka kwamba saa kadhaa mapema, Yesu alimwambia: “Kabla ya jogoo kuwika, utanikana mara tatu.” Petro anaanza kulia kwa uchungu. Anasikitika sana!

Je, unaweza kupatwa na jambo kama hilo?— Unapokuwa shuleni, unaweza kusikia wanafunzi wakizungumza kuhusu Mashahidi wa Yehova. “Hawapigii bendera saluti,” anasema mmoja wao. “Hawapiganii nchi yao,” mwingine anaongezea. Huku mwingine akidai: “Kwa kweli si Wakristo, kwa sababu hawasherehekei Krismasi.” Kisha mmoja wao anakuangalia na kusema, “Si wewe ni mmoja wa Mashahidi wa Yehova?” Utasema nini?—

 Kabla jambo kama hilo halijatukia, unapaswa kujitayarisha ili ujibu inavyofaa. Petro hakuwa tayari. Aliposhinikizwa, alidanganya! Hata hivyo, alihuzunishwa na yale aliyofanya, na Mungu akamsamehe.

Anania ni mwanafunzi mwingine wa Yesu, ambaye pia alidanganya. Lakini Mungu hakumsamehe yeye wala Safira, mke wake. Alikuwa amekubaliana na mumewe kudanganya. Acheni tuone kwa nini Mungu hakuwasamehe Anania na Safira.

Siku kumi baada ya Yesu kuwaacha mitume na kurudi kwa Mungu mbinguni, watu 3,000 hivi wanabatizwa huko Yerusalemu. Wengi wametoka maeneo ya mbali ili kuja kusherehekea Sherehe ya Pentekoste, na baada ya kuwa wanafunzi wa Yesu, wanataka kuendelea kukaa Yerusalemu ili wajifunze mengi kuhusu imani yao mpya. Hivyo, baadhi ya wanafunzi wa Yesu wanatumia pesa zao ili kuwatunza.

Anania na mke wake wanauza mali fulani ili wapate pesa za kuwasaidia watu waliotoka tu kubatizwa. Anania anapoleta pesa hizo kwa mitume, anasema ni kiasi kamili cha pesa walizopata. Lakini si kweli! Amejiwekea kiasi fulani cha pesa! Mungu anamwezesha Petro kutambua jambo hilo, hivyo Petro anamwambia Anania: “Umedanganya, si wanadamu, bali Mungu.” Papo hapo, Anania anaanguka chini na kufa! Saa tatu hivi baadaye, mke wake anaingia. Bila kujua kilichompata mumewe, yeye pia anadanganya kisha anaanguka na kufa.

Hili ni onyo kali kwetu: Ni jambo muhimu kusema ukweli! Naam, sote tunapaswa kujifunza somo hilo! Hata hivyo, tutakosea, hasa tunapokuwa wadogo. Je, hufurahi kwamba Yehova anakupenda na atakusamehe kama alivyomsamehe Petro?— Lakini kumbuka, tunapaswa kusema ukweli. Na kama tutafanya kosa kubwa la kudanganya, tunapaswa kuomba, ndiyo, kumsihi Mungu atusamehe. Bila shaka, Petro alifanya hivyo, na alisamehewa. Tukijitahidi kabisa kutodanganya tena, Mungu atatusamehe pia!