Kwa kuwa kila mwaka mamia ya maelfu ya watu wanabatizwa, kuna uhitaji mkubwa zaidi wa majengo ya kitheokrasi. Ili kushughulikia ukuzi huo, Idara za Usanifu-Majengo na Ujenzi ulimwenguni pote zilipanga kujenga au kukarabati zaidi ya maeneo 2,700 ya ibada katika mwaka wa utumishi wa 2020. a

 Kwa kusikitisha, mipango hiyo ilizuiwa na ugonjwa wa virusi vya corona (COVID-19). Ili kuwalinda ndugu na dada zetu na kutii mwelekezo uliotolewa na serikali, Halmashauri ya Utangazaji ya Baraza Linaloongoza ilisitisha sehemu kubwa ya miradi ya ujenzi ulimwenguni pote. Hata hivyo, katika mwaka wa utumishi wa 2020, kabla ya ugonjwa wa corona kuanza zaidi ya maeneo 1,700 ya ibada yalijengwa na kufanyiwa ukarabati. Mbali na hilo, zaidi ya miradi mikubwa 100 ya ofisi za tawi ilikamilishwa. Fikiria jinsi miradi miwili ya ujenzi imewanufaisha ndugu zetu.

 Ofisi ya tawi ya Kamerun. Ofisi ya awali, iliyokuwa Douala, ilikuwa ndogo sana na ilihitaji marekebisho mengi sana. Halmashauri ya Utangazaji ilifikiria kurekebisha upya ofisi hiyo ya tawi, lakini gharama za kufanya hivyo zingezidi thamani ya jengo lenyewe. Pia, walichunguza uwezekano wa kujenga katika eneo jipya au kununua jengo ambalo tayari limejengwa sehemu nyingine na kulikarabati, lakini haikuwezekana kufanya jambo lolote kati ya hayo mawili.

 Wakati huohuo, akina ndugu waligundua kwamba Kaskazini ya Douala, serikali ilikuwa ikipanga kujenga barabara kando ya mojawapo ya Majumba yetu ya Kusanyiko. Barabara hiyo ingesaidia kuhakikisha kwamba mahitaji ya msingi yanafika kwenye eneo hilo. Hilo lingefaa kabisa mahitaji ya ofisi ya tawi. Kwa hiyo, Baraza Linaloongoza liliidhinisha ujenzi wa ofisi mpya ya tawi katika eneo fulani la uwanja wa Jumba la Kusanyiko.

 Mashahidi pamoja na wanakandarasi walifanya kazi pamoja katika mradi huo—mbinu ambayo iliokoa wakati na pesa. Isitoshe, mradi huo ulitumia pesa kidogo zaidi ya ilivyokadiriwa, kwani ulipokamilishwa kulikuwa na dola milioni mbili zilizokuwa zimesalia kwenye bajeti! Familia ya Betheli ilihamia kwenye majengo hayo muda mfupi tu kabla ya ugonjwa wa COVID-19 kulipuka.

 Wanabetheli nchini Kamerun wamenufaika kutokana na hali mpya na sehemu mpya za kufanyia kazi, na wanaiona ofisi hiyo mpya ya tawi kuwa baraka kutoka kwa Yehova. Wenzi fulani wa ndoa walisema, “Tunataka kufanya kazi kwa bidii zaidi na kuonyesha kwamba tunathamini zawadi hii.”

 Ofisi ya Utafsiri ya Tojolabal (RTO), Mexico. Kwa miaka mingi, kikundi cha watafsiri wa Tojolabal walifanyia kazi katika ofisi ya tawi ya Amerika ya Kati, iliyo karibu na Mexico City. Hata hivyo, lugha ya Tojolabal inazungumzwa hasa katika maeneo ya Altamirano na Las Margaritas—yaliyo umbali wa kilomita 1,000 hivi! Kwa sababu hiyo, ilikuwa vigumu kwa watafsiri wa lugha ya Tojolabal kufahamu jinsi lugha yao ilivyokuwa ikibadilika. Ilikuwa vigumu kwa ofisi ya tawi kupata ndugu na dada katika eneo la karibu wanaostahili kutafsiri na kutokeza rekodi za sauti katika lugha ya Tojolabal.

 Kwa sababu hizo, Halmashauri ya Uandikaji ya Baraza Linaloongoza ilitaka kuhamisha kikundi hicho cha utafsiri kwenye eneo linalozungumza lugha ya Tojolabal. Ili kufaulu, ofisi ya tawi iliamua kununua na kukarabati jengo. Kufanya hivyo kulikuwa gharama nafuu kuliko kujenga au kukodi ofisi.

 Mtafsiri mmoja anaeleza jinsi alivyonufaika: “Katika miaka kumi ambayo nilifanya kazi nikiwa mtafsiri katika ofisi ya tawi, sikukutana na familia hata moja iliyozungumza lugha yangu. Sasa ofisi yetu inapatikana katikati ya eneo ambalo watu wanazungumza Kitojolabal. Mimi huchangamana na watu wanaozungumza Kitojolabal kila siku. Hilo limenisaidia kuboresha msamiati wangu na kazi yangu.”

 Katika mwaka wa 2021, mipango imefanywa ya kushughulikia majengo 75 ya ofisi za utafsiri na shule za Biblia, ikiwa hali zitaruhusu. Kazi itaendelea katika miradi minane mikubwa ya ofisi za tawi, kutia ndani mradi mpya kwenye makao makuu ya ulimwenguni pote wa Ramapo, New York, na pia miradi ya kuhamisha ofisi za tawi za Argentina na Italia. Mbali na hilo, kuna uhitaji wa Majumba 1,000 ya Ufalme, maeneo 6,000 yanayotumiwa kwa ajili ya kukutania hayafai, na Majumba 4,000 ya Ufalme yanahitaji kufanyiwa ukarabati.

 Gharama kwa ajili ya kazi yote hiyo ya ujenzi na ya ukarabati inashughulikiwaje? Ndugu Lázaro González, mshiriki wa Halmashauri ya Tawi ya Amerika ya Kati, alijibu swali hilo alipokuwa akizungumzia mradi wa ujenzi wa Ofisi ya Utafsiri ya Tojolabal. Alisema hivi: “Katika ofisi yetu ya tawi, hatuna uwezo mkubwa wa kifedha. Kwa hiyo, bila msaada wa ushirika mzima wa ndugu zetu, hatungeweza kujenga ofisi za utafsiri kwa ajili ya waamini wenzetu wa lugha za kienyeji. Pesa zinazotolewa na akina ndugu ulimwenguni pote zimefanya iwezekane kuwaleta watafsiri karibu na jamii ambazo zinazungumza lugha yao. Tunawashukuru ndugu na dada zetu ulimwenguni pote kwa utegemezo wao wenye ukarimu.” Naam, miradi hiyo ya ujenzi inafaulu kwa sababu ya michango unayotoa kwa ajili ya kazi ya ulimwenguni pote, ambayo sehemu kubwa inatolewa kupitia donate.mt1130.com.