KATI ya wanyama wote wenye kuishi leo, imevumbuliwa kuwa mamba ndiye mwenye uwezo mukubwa zaidi wa kuuma. Kwa mufano, uwezo wa kuuma wa mamba mwenye kuishi katika maji yenye chumvi karibu na Australia, unapita karibu mara tatu uwezo wa kuuma wa simba, ao wa simbamarara (tigre). Lakini, mufupa wa mamba wenye kubeba meno uko tena na uwezo mukubwa sana wa kutambua vitu, uwezo huo unapita hata zaidi uwezo wa vidole vya mwanadamu. Hilo linawezekana namna gani ijapokuwa ngozi ya mamba iko nguvu-nguvu sana?

Mufupa wa mamba wenye kubeba meno unajaa maelfu ya viungo vya kutambua. Kisha kuchunguza viungo hivyo, mwanasayansi Duncan Leitch alisema hivi: “Kila sehemu ya mwisho ya mishipa yenye kupeleka habari kwenye ubongo inatoka katika shimo lenye kuwa katika mufupa wenye kufunika ubongo.” Hilo linalinda nyuzi-nyuzi za mishipa katika mufupa wenye kubeba meno, na linafanya sehemu fulani zikuwe na uwezo mwingi sana wa kutambua ambao vyombo vya wanasayansi haviwezi kupima. Kwa hiyo, mamba anaweza kutambua ikiwa ni chakula ao uchafu ndio unaingia katika kinywa chake. Ndiyo sababu mamba mama anaweza kubeba watoto wake katika kinywa bila kuwaumiza. Mufupa wa mamba wenye kubeba meno unashangaza kwa sababu ya nguvu zake na uwezo wake wa kutambua.

Unawaza namna gani? Mufupa wa mamba wenye kubeba meno, ulijifanya wenyewe? Ao uliumbwa?