எனக்கு ஆறுதல் தருகிற வார்த்தைகள் பைபிளில் இருக்கிறதா?
பைபிள் தரும் பதில்
ஆம், இருக்கிறது. (ரோமர் 15:4) கஷ்டமான சூழ்நிலைமைகளோடும் உணர்ச்சிகளோடும் போராடிக் கொண்டிருக்கிறவர்களுக்கு ஆறுதல் தருகிற நிறைய வசனங்கள் பைபிளில் இருக்கின்றன. அதில் சிலவற்றை இப்போது பார்க்கலாம்.
இந்தக் கட்டுரையில்...
கஷ்டகாலம்
சங்கீதம் 23:4: “பயங்கர இருட்டான பள்ளத்தாக்கிலே நான் நடந்தாலும், எந்த ஆபத்தையும் நினைத்துப் பயப்பட மாட்டேன். ஏனென்றால், நீங்கள் என்னோடு இருக்கிறீர்கள்.”
அர்த்தம்: நீங்கள் கடவுளிடம் ஜெபம் செய்யும்போதும் அவருடைய வார்த்தையாகிய பைபிளில் இருக்கிற ஆலோசனையைக் கேட்டு நடக்கும்போதும் பிரச்சினைகளை சமாளிப்பதற்கான தைரியம் உங்களுக்குக் கிடைக்கும்.
பிலிப்பியர் 4:13: “என்னைப் பலப்படுத்துகிறவர் மூலம் எல்லாவற்றையும் செய்ய எனக்குப் பலம் இருக்கிறது.”
அர்த்தம்: உங்களுக்கு எப்படிப்பட்ட பிரச்சினைகள் வந்தாலும் அதை சமாளிப்பதற்கு கடவுள் உங்களுக்குப் பலம் கொடுப்பார்.
நேசிக்கிற ஒருவரை மரணத்தில் பறிகொடுப்பது
பிரசங்கி 9:10: “நீ போய்ச்சேரும் கல்லறையில் வேலை செய்யவோ திட்டம் போடவோ முடியாது; அங்கே அறிவோ ஞானமோ இல்லை.”
அர்த்தம்: இறந்துபோனவர்கள் எங்கேயும் போய்க் கஷ்டப்படுவதில்லை. அவர்களால் நமக்குக் கெடுதல் பண்ணவும் முடியாது. அவர்கள் ஒன்றுமே செய்ய முடியாத நிலைமையில் இருக்கிறார்கள்.
அப்போஸ்தலர் 24:15: “[இறந்தவர்கள்] உயிரோடு எழுப்பப்படுவார்கள்.”
அர்த்தம்: இறந்துபோன நம்முடைய அன்பானவர்களை கடவுள் திரும்பவும் உயிரோடு கொண்டு வருவார்.
அளவுக்கு மீறிய குற்ற உணர்ச்சி
சங்கீதம் 86:5: “யெகோவாவே, a நீங்கள் நல்லவர், மன்னிக்கத் தயாராக இருக்கிறவர். உங்களிடம் வேண்டிக்கொள்கிறவர்களுக்கு மாறாத அன்பை அளவில்லாமல் காட்டுகிறவர்.”
அர்த்தம்: கடந்த காலத்தில் செய்த தவறை நினைத்து ஒருவர் உண்மையிலேயே வருத்தப்பட்டு அதை திரும்பவும் செய்யக் கூடாது என்று தீர்மானமாக இருந்தால் கடவுள் அவரை நிச்சயம் மன்னிப்பார்.
சங்கீதம் 103:12: “கிழக்குக்கும் மேற்குக்கும் எவ்வளவு தூரமோ, அவ்வளவு தூரத்துக்கு நம்முடைய குற்றங்களை அவர் தூக்கியெறிந்திருக்கிறார்.”
அர்த்தம்: கடவுள் நம்மை மன்னிக்கும்போது நம்மால் கற்பனையே பண்ண முடியாத அளவுக்கு ரொம்ப தூரத்தில் நம்முடைய பாவங்களை தூக்கிப் போட்டுவிடுவார். நம்மைக் குற்றப்படுத்துவதற்காகவோ அல்லது நம்மைத் தண்டிப்பதற்காகவோ திரும்பத் திரும்ப அதை சொல்லி குத்திக் காட்ட மாட்டார்.
சோகம்
சங்கீதம் 31:7: “நான் படுகிற கஷ்டத்தை நீங்கள் பார்த்திருக்கிறீர்கள். என் அடிமனதிலுள்ள வேதனையை அறிந்திருக்கிறீர்கள்.”
அர்த்தம்: நீங்கள் படுகிற கஷ்டங்கள் எல்லாம் கடவுளுக்கு நன்றாகவே தெரியும். மற்றவர்கள் புரிந்துகொள்ளவில்லை என்றாலும் கூட நீங்கள் அனுபவிக்கிற வேதனையையும் வலியையும் கடவுள் நன்றாகவே புரிந்துகொள்கிறார்.
சங்கீதம் 34:18: “உள்ளம் உடைந்துபோனவர்களின் பக்கத்திலேயே யெகோவா இருக்கிறார். மனம் நொந்துபோனவர்களை அவர் காப்பாற்றுகிறார்.”
அர்த்தம்: நீங்கள் சோகத்தில் துவண்டுபோகும்போது உங்களை தாங்கிப் பிடிப்பதாக கடவுள் வாக்குறுதி கொடுத்திருக்கிறார். நீங்கள் அனுபவிக்கிற வலியை தாங்குவதற்கான பலத்தையும் அவர் தருவார்.
நோய்
சங்கீதம் 41:3: “அவன் சுகமில்லாமல் படுத்துக் கிடக்கும்போது யெகோவா அவனைத் தாங்குவார்.”
அர்த்தம்: நீங்கள் தீராத வியாதியால் கஷ்டப்பட்டுக் கொண்டிருந்தால் கடவுள் உங்களுக்கு மன சமாதானம் தருவார். அதோடு, அதை தாங்குவதற்கான சக்தியையும் சகிப்புத்தன்மையையும் தருவார். நல்ல தீர்மானங்கள் எடுப்பதற்கும் உதவி செய்வார்.
ஏசாயா 33:24: “’எனக்கு உடம்பு சரியில்லை’ என்று யாருமே சொல்ல மாட்டார்கள்.”
அர்த்தம்: எல்லாரும் நல்ல ஆரோக்கியத்தை அனுபவிக்கிற ஒரு காலம் வரும் என்று கடவுள் வாக்குறுதி கொடுத்திருக்கிறார்.
டென்ஷன், கவலை
சங்கீதம் 94:19: “கவலைகள் என்னைத் திணறடித்தபோது, நீங்கள் எனக்கு ஆறுதல் தந்து, என் இதயத்துக்கு இதமளித்தீர்கள்.”
அர்த்தம்: நாம் மன அழுத்தத்தில் இருக்கும்போது கடவுளிடம் உதவி கேட்டால் அவர் நமக்கு மன அமைதி தருவார்.
1 பேதுரு 5:7: “அவர் உங்கள்மேல் அக்கறையாக இருக்கிறார். அதனால், உங்கள் கவலைகளையெல்லாம் அவர்மேல் போட்டுவிடுங்கள்.”
அர்த்தம்: நாம் கஷ்டப்படுவதைப் பார்க்கும்போது கடவுளுக்கும் ரொம்ப கஷ்டமாக இருக்கும். அதனால் நம்முடைய கவலைகளை எல்லாம் மனம் திறந்து அவரிடம் கொட்டச் சொல்லி நமக்கு அழைப்பு கொடுக்கிறார்.
போர்
சங்கீதம் 46:9: “அவர் பூமி முழுவதும் போர்களுக்கு முடிவுகட்டுகிறார்.”
அர்த்தம்: கடவுளுடைய அரசாங்கம் சீக்கிரத்தில் எல்லா போர்களுக்கும் முடிவுகட்டும்.
சங்கீதம் 37:11, 29: “தாழ்மையானவர்கள் இந்தப் பூமியைச் சொந்தமாக்கிக்கொள்வார்கள். அவர்கள் அளவில்லாத சமாதானத்தையும், முடிவில்லாத சந்தோஷத்தையும் அனுபவிப்பார்கள். . . . நீதிமான்கள் இந்தப் பூமியைச் சொந்தமாக்கிக்கொள்வார்கள். அவர்கள் என்றென்றும் அதில் வாழ்வார்கள்.”
அர்த்தம்: நல்ல ஆட்கள் பூமியில் சமாதானமாக என்றென்றும் வாழ்வார்கள்.
எதிர்காலத்தைப் பற்றிய பயம்
எரேமியா 29:11: “யெகோவா சொல்வது இதுதான்: ‘நீங்கள் அழிந்துபோக வேண்டும் என்றல்ல, நிம்மதியாக வாழ வேண்டும் என்றுதான் நான் நினைக்கிறேன். உங்களுக்கு நல்ல எதிர்காலத்தையும் நம்பிக்கையையும் கொடுக்கவே ஆசைப்படுகிறேன்.’”
அர்த்தம்: நமக்கு ஒளிமயமான எதிர்காலத்தைத் தருவதாக கடவுள் நம்பிக்கை கொடுத்திருக்கிறார்.
வெளிப்படுத்துதல் 21:4: “அவர்களுடைய கண்ணீரையெல்லாம் கடவுள் துடைத்துவிடுவார். இனிமேல் மரணம் இருக்காது, துக்கம் இருக்காது, அழுகை இருக்காது, வேதனை இருக்காது. முன்பு இருந்தவை ஒழிந்துபோய்விட்டன.”
அர்த்தம்: நம்மை சுற்றி நடந்துகொண்டிருக்கிற எல்லா கெட்ட காரியங்களையும் அடியோடு ஒழித்துக்கட்டப் போவதாக கடவுள் வாக்குறுதி கொடுத்திருக்கிறார்.
a யெகோவா என்பது கடவுளுடைய பெயர். (சங்கீதம் 83:18) “யெகோவா யார்?” என்ற கட்டுரையைப் பாருங்கள்.
இவற்றையும் அலசிப் பார்க்கலாமே!
காவற்கோபுரம்
கடவுள் அக்கறை காட்டுவதால் கிடைக்கும் நன்மைகள்
அருமையான எதிர்காலத்தைப் பற்றிக் கடவுள் கொடுத்திருக்கும் வாக்குறுதிகள்மீது நம்முடைய விசுவாசத்தை வளர்த்துக்கொள்ள பைபிள் நமக்கு உதவும்.
பைபிள் கேள்விகளுக்கான பதில்கள்
உண்மையான நம்பிக்கை எங்கிருந்து கிடைக்கும்?
இப்போதே சந்தோஷமாக வாழ்வதற்கும் எதிர்காலத்தை நம்பிக்கையோடு எதிர்நோக்கி இருப்பதற்கும் பைபிள் உதவும்.
வேறுசில தலைப்புகள்
தாங்க முடியாத துக்கத்தைத் தாங்க...
அன்பானவரைப் பறிகொடுக்கும்போது நம் மனம் வலியில் துடிக்கிறது. அந்த வலியை யாராலும் புரிந்துகொள்ள முடியாது என்று நாம் நினைக்கலாம். ஆனால், கடவுள் புரிந்துகொள்கிறார். அவரால் நமக்கு உதவி செய்யவும் முடியும்.
காவற்கோபுரம்
வாழ்க்கையே வெறுத்துவிட்டதா?
எப்படிப்பட்ட பிரச்சினை வந்தாலும், நாம் வாழ்வதில் ஒரு அர்த்தம் இருக்கிறது.
முக்கியப் போதனைகள்
கடவுள் ஏன் இன்னும் கஷ்டத்தை தீர்க்காமல் இருக்கிறார்?
திருப்தியான, ஆறுதலான பதிலை பைபிள் கொடுக்கிறது.
பைபிள் போதனைகள்
எங்களோடு பைபிளைப் படித்துப் பாருங்கள்
ஒருவரின் உதவியோடு தனிப்பட்ட விதமாக பைபிளைக் கற்றுக்கொள்ளுங்கள், அதுவும் இலவசமாக!