22  பஸ்கா+ என்ற புளிப்பில்லாத ரொட்டிப் பண்டிகை நெருங்கிவந்தது.+ ²  முதன்மை குருமார்களும் வேத அறிஞர்களும் மக்களுக்குப் பயந்ததால்,+ சாமர்த்தியமான விதத்தில் இயேசுவை ஒழித்துக்கட்டுவதற்கு வழி தேடிக்கொண்டிருந்தார்கள்.+ ³  பின்பு, பன்னிரண்டு பேரில்* ஒருவனான இஸ்காரியோத்து என்ற யூதாசின் இதயத்துக்குள் சாத்தான் புகுந்தான்.+ ⁴  அவன் முதன்மை குருமார்களிடமும் ஆலயத்தின் காவல் தலைவர்களிடமும் போய் அவரைக் காட்டிக்கொடுப்பது பற்றிக் கலந்துபேசினான்.+ ⁵  அவர்கள் மனம் குளிர்ந்துபோய், அவனுக்கு வெள்ளிக் காசுகள்+ தருவதாக ஒத்துக்கொண்டார்கள். ⁶  அவனும் அதற்குச் சம்மதித்து, கூட்டம் இல்லாத சமயத்தில் அவரைக் காட்டிக்கொடுப்பதற்குச் சரியான சந்தர்ப்பத்தைத் தேட ஆரம்பித்தான். ⁷  புளிப்பில்லாத ரொட்டிப் பண்டிகை நாள் வந்தது; அதாவது, பஸ்கா பலியைக் கொடுக்க வேண்டிய நாள் வந்தது.+ ⁸  அதனால் அவர் பேதுருவிடமும் யோவானிடமும், “நாம் பஸ்கா உணவைச் சாப்பிடுவதற்கு நீங்கள் போய் ஏற்பாடு செய்யுங்கள்”+ என்று சொல்லி அனுப்பினார். ⁹  அப்போது அவர்கள், “நாங்கள் அதை எங்கே ஏற்பாடு செய்ய வேண்டும்?” என்று கேட்டார்கள். ¹⁰  அதற்கு அவர், “நீங்கள் நகரத்துக்குள் போகும்போது, மண்ஜாடியில் தண்ணீர் எடுத்துக்கொண்டு வருகிற ஒருவன் உங்களைச் சந்திப்பான். அவன் பின்னால் போய் அவன் நுழையும் வீட்டுக்குள் நுழையுங்கள்.+ ¹¹  அந்த வீட்டுச் சொந்தக்காரரிடம், ‘“என் சீஷர்களோடு நான் பஸ்கா உணவு சாப்பிடுவதற்கான விருந்தினர் அறை எங்கே?” என்று போதகர் கேட்கிறார்’ எனச் சொல்லுங்கள். ¹²  அப்போது, மாடியில் தேவையான வசதிகள் செய்யப்பட்ட ஒரு பெரிய அறையை அவர் உங்களுக்குக் காட்டுவார். அங்கே பஸ்காவுக்கு ஏற்பாடு செய்யுங்கள்” என்று சொன்னார். ¹³  சீஷர்களும் போய், அவர் சொன்னதெல்லாம் அப்படியே நடந்ததைப் பார்த்து, பஸ்காவுக்கு ஏற்பாடு செய்தார்கள். ¹⁴  நேரம் வந்தபோது, அவர் அப்போஸ்தலர்களோடு சேர்ந்து சாப்பிட உட்கார்ந்தார்.+ ¹⁵  அப்போது அவர், “நான் பாடுகள் படுவதற்கு முன்பு உங்களோடு சேர்ந்து இந்த பஸ்கா உணவைச் சாப்பிட மிகவும் ஆசையாக இருந்தேன். ¹⁶  ஏனென்றால், கடவுளுடைய அரசாங்கத்தில் இது நிறைவேறும்வரை இனி இதைச் சாப்பிட மாட்டேன் என்று நான் உங்களுக்குச் சொல்கிறேன்” என்றார். ¹⁷  பின்பு, கிண்ணத்தை வாங்கி கடவுளுக்கு நன்றி சொல்லி, “ஒவ்வொருவராக இதை வாங்கிக் குடியுங்கள். ¹⁸  நான் உங்களுக்குச் சொல்கிறேன், கடவுளுடைய அரசாங்கம் வரும்வரை இனி திராட்சமதுவைக் குடிக்க மாட்டேன்” என்று சொன்னார். ¹⁹  பின்பு ரொட்டியை+ எடுத்து, கடவுளுக்கு நன்றி சொல்லி, அதைப் பிட்டு அவர்களிடம் கொடுத்து, “இது உங்களுக்காகக் கொடுக்கப்படும்+ என் உடலைக் குறிக்கிறது.+ என் நினைவாக இதைத் தொடர்ந்து செய்யுங்கள்”+ என்று சொன்னார். ²⁰  உணவு சாப்பிட்ட பின்பு, அதேபோல் கிண்ணத்தையும் கொடுத்து, “இந்தக் கிண்ணம் உங்களுக்காகச் சிந்தப்படப்போகிற+ என் இரத்தத்தின் அடிப்படையிலான+ புதிய ஒப்பந்தத்தைக்+ குறிக்கிறது. ²¹  இதோ! என்னைக் காட்டிக்கொடுப்பவன் என்னோடு சாப்பிட உட்கார்ந்திருக்கிறான்.+ ²²  முன்பே தீர்மானிக்கப்பட்டபடி,+ மனிதகுமாரன் உங்களைவிட்டுப் போகிறார்; ஆனாலும் அவரைக் காட்டிக்கொடுக்கிறவனுக்குக் கேடு வந்தே தீரும்!”+ என்று சொன்னார். ²³  அப்போது, தங்களில் யார் அப்படிச் செய்வார் என்று அவர்கள் பேசிக்கொண்டார்கள்.+ ²⁴  பின்பு, தங்களில் யார் மிக உயர்ந்தவர் என்பதைப் பற்றி அவர்களுக்குள் கடுமையான வாக்குவாதம் ஏற்பட்டது.+ ²⁵  அதனால் அவர் அவர்களிடம், “மற்ற தேசத்து ராஜாக்கள் மக்களை அடக்கி ஆளுகிறார்கள், மக்கள்மேல் அதிகாரம் உள்ளவர்கள் ‘மக்கள் தொண்டர்கள்’ என்று அழைக்கப்படுகிறார்கள்.+ ²⁶  நீங்களோ அப்படி இருக்கக் கூடாது.+ உங்களில் மிக உயர்ந்தவராக இருப்பவர் எல்லாருக்கும் சிறியவரைப் போல் இருக்க வேண்டும்,+ உங்களை வழிநடத்துகிறவர் பணிவிடைக்காரரைப் போல் இருக்க வேண்டும். ²⁷  யார் உயர்ந்தவர்? சாப்பிட உட்கார்ந்திருப்பவரா அல்லது பணிவிடை செய்பவரா? சாப்பிட உட்கார்ந்திருப்பவர்தானே? அப்படியிருந்தும், நான் உங்கள் மத்தியில் பணிவிடை செய்பவனாக இருக்கிறேன்.+ ²⁸  ஆனாலும், எனக்குச் சோதனைகள்+ வந்தபோது என்னோடுகூட நிலைத்திருந்தவர்கள் நீங்கள்தான்.+ ²⁹  அதனால், ஒரு அரசாங்கத்துக்காக+ என் தகப்பன் என்னோடு ஒப்பந்தம் செய்திருப்பதுபோல் நானும் உங்களோடு ஒரு ஒப்பந்தம் செய்கிறேன். ³⁰  என்னுடைய அரசாங்கத்தில் நீங்கள் என்னோடு உட்கார்ந்து உணவும் பானமும் சாப்பிடுவீர்கள்.+ இஸ்ரவேலின் 12 கோத்திரங்களையும் நியாயந்தீர்க்க+ சிம்மாசனங்களில் உட்காருவீர்கள்.+ ³¹  சீமோனே, சீமோனே, இதோ! கோதுமையைப் புடைத்தெடுப்பதுபோல் உங்கள் எல்லாரையும் புடைத்தெடுக்க வேண்டும் என்று சாத்தான் கேட்டிருக்கிறான்.+ ³²  ஆனால், நீ விசுவாசத்தை விட்டுவிடாமல் இருக்க வேண்டுமென்று உனக்காக மன்றாடியிருக்கிறேன்.+ நீ மனம் திருந்தியதும் உன் சகோதரர்களைப் பலப்படுத்து”+ என்று சொன்னார். ³³  அப்போது பேதுரு, “எஜமானே, உங்களோடு சிறைக்குப் போவதற்கும் சாவதற்கும் நான் தயாராக இருக்கிறேன்”+ என்று சொன்னார். ³⁴  ஆனால் அவர், “பேதுரு, நான் உனக்குச் சொல்கிறேன், இன்று சேவல் கூவுவதற்கு முன்பு, என்னைத் தெரியாதென்று நீ மூன்று தடவை சொல்லிவிடுவாய்”+ என்றார். ³⁵  பின்பு அவர் சீஷர்களிடம், “பணப் பையும் உணவுப் பையும் செருப்புகளும் இல்லாமல் நான் உங்களை அனுப்பியபோது,+ உங்களுக்கு ஏதாவது குறை இருந்ததா?” என்று கேட்டார். அவர்கள், “இல்லை!” என்று சொன்னார்கள். ³⁶  அதற்கு அவர், “இப்போதோ, பணப் பையை வைத்திருப்பவன் அதைக் கொண்டுபோகட்டும், அதுபோல உணவுப் பையையும் கொண்டுபோகட்டும். வாள் இல்லாதவன் தன்னுடைய மேலங்கியை விற்று ஒரு வாளை வாங்கிக்கொள்ளட்டும். ³⁷  ‘அக்கிரமக்காரர்களில் ஒருவராக அவர் கருதப்பட்டார்’+ என்று எழுதப்பட்டிருக்கிற வேதவசனம் என்னில் நிறைவேற வேண்டும் என்பதற்காக இதை நான் உங்களுக்குச் சொல்கிறேன். என்னைப் பற்றி எழுதப்பட்டதெல்லாம் நிறைவேறி வருகிறது”+ என்று சொன்னார். ³⁸  அப்போது அவர்கள், “எஜமானே, இதோ! இங்கே இரண்டு வாள்கள் இருக்கின்றன” என்று சொன்னார்கள். அதற்கு அவர், “இது போதும்” என்று சொன்னார். ³⁹  பின்பு அங்கிருந்து புறப்பட்டு, தன்னுடைய வழக்கத்தின்படியே ஒலிவ மலைக்குப் போனார். அவருடைய சீஷர்களும் அவருக்குப் பின்னால் போனார்கள்.+ ⁴⁰  அந்த இடத்துக்கு வந்ததுமே அவர்களிடம், “சோதனைக்கு இணங்கிவிடாதபடி தொடர்ந்து ஜெபம் செய்யுங்கள்”+ என்று அவர் சொன்னார். ⁴¹  பின்பு, அவர்களைவிட்டுக் கல்லெறி தூரம் போய் மண்டிபோட்டு, ⁴²  “தகப்பனே, உங்களுக்கு விருப்பமானால் இந்தக் கிண்ணத்தை* என்னிடமிருந்து எடுத்துவிடுங்கள். ஆனால் என்னுடைய விருப்பத்தின்படி* அல்ல, உங்களுடைய விருப்பத்தின்படியே* நடக்கட்டும்”+ என்று சொன்னார். ⁴³  அப்போது, பரலோகத்திலிருந்து ஒரு தேவதூதர் அவருக்குத் தோன்றி அவரைப் பலப்படுத்தினார்.+ ⁴⁴  ஆனால், அவர் ரொம்பவே வேதனையில் இருந்ததால் இன்னும் அதிக உருக்கமாக ஜெபம் செய்துகொண்டிருந்தார்.+ அவருடைய வியர்வைத் துளிகள் இரத்தத் துளிகள்போல் தரையில் விழுந்தன. ⁴⁵  ஜெபம் செய்த பின்பு அவர் எழுந்து சீஷர்களிடம் போனார். அங்கே அவர்கள் துக்கத்தில் துவண்டுபோய்த் தூங்கிக்கொண்டிருப்பதைப் பார்த்து,+ ⁴⁶  “ஏன் தூங்கிக்கொண்டிருக்கிறீர்கள்? எழுந்திருங்கள், சோதனைக்கு இணங்கிவிடாதபடி தொடர்ந்து ஜெபம் செய்யுங்கள்” என்று சொன்னார்.+ ⁴⁷  அவர் பேசிக்கொண்டிருந்தபோதே, ஆட்கள் கூட்டமாக வந்தார்கள். பன்னிரண்டு பேரில் ஒருவனாகிய யூதாஸ் அவர்களைக் கூட்டிக்கொண்டு வந்தான்; அவன் இயேசுவுக்கு முத்தம் கொடுக்க அவர் பக்கத்தில் வந்தான்.+ ⁴⁸  ஆனால் இயேசு அவனிடம், “யூதாஸ், மனிதகுமாரனை முத்தம் கொடுத்தா காட்டிக்கொடுக்கிறாய்?” என்று கேட்டார். ⁴⁹  அவரோடு நின்றுகொண்டிருந்தவர்கள் நடக்கப்போவதை உணர்ந்து, “எஜமானே, நாங்கள் வாளால் வெட்டலாமா?” என்று கேட்டார்கள். ⁵⁰  அவர்களில் ஒருவர் தலைமைக் குருவின் வேலைக்காரனைத் தாக்கினார், அவனுடைய வலது காது அறுந்துபோனது.+ ⁵¹  அப்போது இயேசு, “இதோடு நிறுத்திக்கொள்ளுங்கள்” என்று சொன்னார். பின்பு, அந்த வேலைக்காரனுடைய காதைத் தொட்டு அவனைக் குணப்படுத்தினார். ⁵²  அதன் பின்பு, இயேசு தன்னைப் பிடிக்க வந்திருந்த முதன்மை குருமார்களையும் ஆலயத்தின் காவல் தலைவர்களையும் பெரியோர்களையும்* பார்த்து, “ஒரு கொள்ளைக்காரனைப் பிடிக்க வருவது போல வாள்களோடும் தடிகளோடும் என்னைப் பிடிக்க வந்திருக்கிறீர்களா?+ ⁵³  நான் தினமும் ஆலயத்தில் உங்களோடு இருந்தபோதெல்லாம்+ நீங்கள் என்மேல் கை வைக்கவில்லை.+ ஆனால், இது உங்களுடைய நேரம், இருள் அதிகாரம் செலுத்துகிற நேரம்”+ என்று சொன்னார். ⁵⁴  அவர்கள் அவரைக் கைது செய்து, தலைமைக் குருவின் வீட்டுக்குள் கொண்டுபோனார்கள்.+ ஆனால், பேதுரு தூரத்திலிருந்தபடி அவர்களைப் பின்தொடர்ந்து போனார்.+ ⁵⁵  முற்றத்தின் நடுவில் நெருப்பு மூட்டி அதைச் சுற்றி உட்கார்ந்திருந்தவர்களோடு அவரும் உட்கார்ந்துகொண்டார்.+ ⁵⁶  எரிந்துகொண்டிருந்த நெருப்புக்குப் பக்கத்தில் அவர் உட்கார்ந்திருந்ததை ஒரு வேலைக்காரப் பெண் கண்டு, அவரை உற்றுப் பார்த்து, “இந்த ஆளும் அவரோடு இருந்தான்” என்று சொன்னாள். ⁵⁷  ஆனால் பேதுரு, “இல்லை, எனக்கு அவரைத் தெரியாது” என்று சொல்லி மறுத்தார். ⁵⁸  சிறிது நேரம் கழித்து இன்னொருவன் அவரைப் பார்த்து, “நீயும் அவர்களில் ஒருவன்தான்” என்று சொன்னான். ஆனால் பேதுரு, “இல்லவே இல்லை”+ என்று சொன்னார். ⁵⁹  சுமார் ஒரு மணிநேரம் கழித்து வேறொரு ஆள், “நிச்சயமாகவே இந்த மனுஷனும் அவரோடு இருந்தான், இவன் ஒரு கலிலேயன்தான்!” என்று அடித்துச் சொல்ல ஆரம்பித்தான். ⁶⁰  ஆனால் பேதுரு, “நீ என்ன சொல்கிறாய் என்றே எனக்குத் தெரியவில்லை” என்றார். இப்படி அவர் சொல்லிக்கொண்டிருந்தபோதே, உடனடியாக ஒரு சேவல் கூவியது. ⁶¹  அப்போது இயேசு திரும்பி, பேதுருவை நேராகப் பார்த்தார். “இன்று சேவல் கூவுவதற்கு முன்பு, என்னைத் தெரியாதென்று நீ மூன்று தடவை சொல்லிவிடுவாய்” என்று இயேசு தன்னிடம் சொன்னது பேதுருவின் ஞாபகத்துக்கு வந்தது.+ ⁶²  அதனால், அவர் வெளியே போய்க் கதறி அழுதார். ⁶³  இயேசுவைக் காவல் காத்த ஆட்கள் அவரைக் கேலி செய்யவும்+ அடிக்கவும்+ ஆரம்பித்தார்கள். ⁶⁴  அவருடைய முகத்தை மூடி, “நீ ஒரு தீர்க்கதரிசியாக இருந்தால் உன்னை அடித்தது யார் என்று சொல் பார்க்கலாம்” என்றார்கள். ⁶⁵  அவருக்கு எதிராக இன்னும் பலவற்றைச் சொல்லி நிந்தித்தார்கள். ⁶⁶  பொழுது விடிந்தபோது, முதன்மை குருமார்களும் வேத அறிஞர்களும் அடங்கிய பெரியோர் குழுவினர் ஒன்றுகூடி,+ நியாயசங்க மன்றத்தில் அவரைக் கொண்டுவந்து நிறுத்தினார்கள். ⁶⁷  அவரிடம், “நீ கிறிஸ்துவா? எங்களுக்குச் சொல்”+ என்றார்கள். அதற்கு அவர், “நான் அதை உங்களுக்குச் சொன்னாலும் நீங்கள் நம்பப் போவதில்லை. ⁶⁸  உங்களிடம் நான் கேள்வி கேட்டாலும் நீங்கள் பதில் சொல்லப்போவதில்லை. ⁶⁹  ஆனால், இப்போதுமுதல் மனிதகுமாரன்+ வல்லமையுள்ள கடவுளின் வலது பக்கத்தில் உட்கார்ந்திருப்பார்”+ என்று சொன்னார். ⁷⁰  அதற்கு அவர்கள் எல்லாரும், “அப்படியானால், நீ கடவுளுடைய மகனா?” என்று கேட்டார்கள். அதற்கு, “நான் அவர்தான் என்று நீங்களே சொல்லிவிட்டீர்கள்” என்றார். ⁷¹  அப்போது அவர்கள், “இனி நமக்கு வேறு சாட்சி எதற்கு? இவனுடைய வாயிலிருந்து நாமே கேட்டுவிட்டோம்”+ என்று சொன்னார்கள்.