“Bainhira haʼu joven, haʼu gosta mane. Neʼe mak buat neʼebé susar tebes ba haʼu. Uluk haʼu hanoin katak haʼu-nia sentimentu gosta ba mane sei lakon, maibé toʼo agora, sentimentu neʼe nafatin iha.”​—David, 23.

 Nuʼudar ema Kristaun ida, David hakarak halo Maromak kontente. Maibé nia bele duni halo Maromak kontente se nia gosta ba mane ka lae? Maromak hanoin oinsá kona-ba hahalok omoseksuál?

•  Saida mak Bíblia hanorin?

•  Neʼe katak . . . ?

•  Maibé, oinsá se . . . ?

 Ema ida-idak iha hanoin neʼebé la hanesan kona-ba hahalok omoseksuál tanba sira-nia kultura ka tanba sira moris iha tempu neʼebé la hanesan. Maibé ema Kristaun la hetan influénsia husi ema barak nia hanoin ka hanorin oioin hodi “la sai hanesan ró iha tasi laran neʼebé anin no laloran baku bá-mai”. (Éfeso 4:14) Ema Kristaun nia hanoin kona-ba hahalok omoseksuál (no kona-ba hahalok seluk tan) mak bazeia ba Bíblia nia hanorin.

 Bíblia nia prinsípiu kona-ba hahalok omoseksuál mak klaru tebes. Bíblia hatete:

•  “Ó labele toba ho mane ida hanesan ó toba ho feto ida.”​—Levítico 18:22.

•  “Maromak husik sira atu tuir deʼit sira-nia hakarak seksuál neʼebé aat tebes, tanba feto sira iha sira-nia leet husik ona hakarak seksuál neʼebé hanesan baibain hodi halo fali buat neʼebé la loos.”​—Roma 1:24, 26.

•  “Keta lohi imi-nia an. Ema neʼebé halo sala seksuál, adora estátua, halo adultériu, mane neʼebé fó an ba mane seluk atu halo hahalok omoseksuál no mane neʼebé halo hahalok omoseksuál, naʼok-teen, kaan-teen, lanu-teen, ema neʼebé gosta koʼalia liafuan kroʼat, ka ema neʼebé hamatak ema seluk, sira sei la simu Maromak nia Ukun nuʼudar liman-rohan.”​—1 Korinto 6:9, 10.

 Realidade mak Maromak nia prinsípiu aplika ba ema hotu, neʼe inklui ema neʼebé iha hakarak omoseksuál ka lae. Klaru katak ema ida-idak presiza kontrola ninia an bainhira nia hakarak atu halo buat neʼebé halo Maromak la kontente.​—Koloso 3:5.

 Neʼe katak Bíblia hanorin ita atu odi ema omoseksuál sira ka?

 Lae. Bíblia la hanorin ita atu odi ema ruma, neʼe inklui ema omoseksuál ka ema neʼebé laʼós omoseksuál. Maibé Bíblia anima ita atu “buka dame ho ema hotu”, maski sira-nia dalan moris la hanesan ita-nian. (Ebreu 12:14) Tan neʼe, ita labele hatún, halo aat ka halo hahalok aat seluk ba ema omoseksuál sira.

 Neʼe katak ema Kristaun presiza kontra hasoru lei neʼebé fó lisensa ema omoseksuál atu kaben ka lae?

 Bíblia hatudu ho klaru katak arranju kaben nian mak ba deʼit mane no feto. (Mateus 19:4-6) Maibé asuntu kona-ba governu halo lei hodi fó lisensa ema omoseksuál atu kaben mak asuntu polítiku, laʼós kona-ba morál. Bíblia haruka ema Kristaun atu nafatin neutrál iha dalan polítiku. (João 18:36) Tan neʼe, sira sei la apoia ka kontra governu nia lei kona-ba ema omoseksuál nia direitu atu kaben ka sira-nia hahalok neʼe.

 Maibé oinsá se ema ida mak moris ona nuʼudar ema omoseksuál? Ema neʼe bele troka ka lae?

 Bele. Tuir loloos, antes sai ema Kristaun, ema balu iha apóstolu sira-nia tempu mak ema omoseksuál. Depois temi tiha katak ema sira neʼebé halo hahalok omoseksuál labele simu Maromak nia Ukun nuʼudar liman-rohan, Bíblia hatete: “Uluk imi balu mós halo hanesan neʼe.”​—1 Korinto 6:11.

 Neʼe katak ema neʼebé la halo tan hahalok omoseksuál halakon hotu sira-nia hakarak omoseksuál ka lae? Lae. Bíblia hatete: “Tau fali hahalok foun nuʼudar imi-nia roupa, . . . hahalok neʼe sai foun ba beibeik liuhusi koñesimentu neʼebé loos.” (Koloso 3:10) Ema ida presiza kontinua hakaʼas atu troka ninia hahalok.

 Maibé, oinsá se ema ida neʼebé hakarak atu halo tuir Maromak nafatin iha hakarak omoseksuál?

 Ita hotu bele hili atu la hanoin beibeik kona-ba ita-nia hakarak no la halo tuir ita-nia hakarak. Oinsá? Bíblia hatete: “Kontinua moris tuir Maromak nia espíritu hodi imi la halo tuir hakarak isin nian hotu.”​—Galásia 5:16.

 Haree toʼok eskritura neʼe la dehan katak ema ida nia hakarak isin nian sei lakon. Maibé, se nia toman atu estuda Bíblia no halo orasaun beibeik, nia sei hetan forsa atu tahan hasoru ninia hakarak isin nian.

 David, neʼebé ohin temi ona bele sente katak liafuan neʼe mak loos, liuliu bainhira nia konta ninia situasaun susar neʼe ba ninia inan-aman. Nia hatete: “Haʼu sente kmaan loos. Se husi uluk kedas haʼu fó sai ida-neʼe ba sira, haʼu-nia tempu joven sei sai diʼak liu.”

 Maibé ikusmai, ita sei sente kontente liu bainhira ita halo tuir Jeová nia ukun-fuan. Ita bele fiar katak Maromak nia ukun-fuan “mak loos, halo ema nia laran haksolok” no ema neʼebé “halo tuir desizaun sira-neʼe sei simu kolen boot”.​—Salmo 19:8, 11.