•  Ita bele halo buat oioin iha tempu hanesan ka lae?

•  Ideia falsu sira

•  Dalan neʼebé diʼak liu

•  Ita-nia kolega hanoin saida

 Ita rasik hatene oinsá atu halo buat oioin iha tempu hanesan ka lae? Ema barak hanoin katak ema neʼebé husi kiʼik kedas uza teknolojia mak matenek liu atu halo buat oioin iha tempu hanesan, duké ema sira neʼebé aprende kona-ba teknolojia bainhira sira sai boot ona. Maibé hanoin neʼe loos ka lae?

 LOOS ka SALA?

•   Bainhira halo buat oioin iha tempu hanesan, neʼe ajuda Ita uza didiʼak tempu.

•   Se Ita sai toman atu halo buat oioin iha tempu hanesan, Ita bele halo ida-neʼe ho diʼak liu.

•   Se kompara ferik-katuas sira, joven sira matenek liu atu halo buat oioin iha tempu hanesan.

 Se Ita hatán “loos” ba fraze sira-neʼe ida, karik Ita fiar ona ba ideia falsu katak Ita bele halo buat oioin iha tempu hanesan.

 Tuir Ita-nia hanoin, Ita bele halo buat rua iha tempu hanesan ka lae? Karik Ita bele halo buat balu iha tempu neʼebé hanesan se buat ida la presiza uza Ita-nia konsentrasaun. Porezemplu, karik Ita rona múzika bainhira Ita hamoos Ita-nia kuartu, no Ita-nia kuartu bele moos.

 Maibé se Ita koko atu halo buat rua neʼebé presiza konsentrasaun iha tempu neʼebé hanesan, karik Ita sei la halo ho didiʼak buat rua neʼe. Joven feto ida naran Katherine hatete katak bainhira ita halo buat oioin iha tempu hanesan, baibain rezultadu mak ita la halo ida-neʼe iha dalan neʼebé diʼak.

 “Haʼu koʼalia daudaun ho kolega mane ida bainhira mensajen importante ida tama ba haʼu-nia telemovel. Haʼu koko atu koʼalia ho nia no mós hatán mensajen neʼebé haʼu simu. No rezultadu mak haʼu la rona didiʼak bainhira haʼu-nia kolega koʼalia no haʼu hakerek mensajen neʼebé sala.”—Caleb.

 Matenek-naʼin kona-ba teknolojia naran Sherry Turkle hakerek: “Bainhira ita halo buat oioin iha tempu ida deʼit, . . . ikusmai buat neʼebé ita halo ladún iha rezultadu neʼebé diʼak. Kuandu ita halo buat oioin iha tempu neʼebé hanesan, neʼe halo ita sente ita iha enerjia no kumpre serbisu ho didiʼak, maibé loloos ita la halo ho didiʼak.” a

 “Dala ruma, haʼu hanoin katak haʼu bele haruka mensajen no iha tempu hanesan koʼalia ho ema seluk toʼo ikusmai haʼu temi buat neʼebé tuir loloos haʼu presiza haruka liuhusi mensajen no ketik liafuan neʼebé tuir loloos haʼu presiza koʼalia ba haʼu-nia kolega!”—Tamara.

 Ema neʼebé koko halo buat oioin iha tempu ida deʼit, halo susar sira-nia moris. Porezemplu, baibain sira presiza tempu kleur liután atu halo hotu sira-nia TPC. Ka karik sira presiza halo fali serbisu neʼebé sira hanoin hotu ona. Maski sira uza tempu kleur liután ka tenke halo fali, maibé baibain sira ladún iha tempu livre atu halo buat neʼebé sira hakarak halo!

 Ema nia kakutak bele kompara hanesan gaveta, fatin atu rai informasaun importante sira ho kabeer. Maibé se ema hakarak atu halo buat oioin iha tempu hanesan, sira-nia kakutak mak atu hanesan ho gaveta neʼebé nakonu no runguranga. b

 “Bainhira Ita koko atu halo buat barak iha tempu hanesan, Ita sei la tau atensaun ba buat importante sira. Ikusmai, Ita karik presiza hakaʼas an liután, no ida-neʼe han tempu barak liután.”—Teresa.

•   Treinu Ita-nia an atu tau fokus deʼit ba buat ida. Karik Ita hanoin neʼe mak buat neʼebé susar tebes, liuliu se Ita toman atu halo buat balu iha tempu hanesan, porezemplu, Ita haruka mensajen ba Ita-nia kolega bainhira halo daudaun TPC. Maibé Bíblia haruka ita atu “buka-hatene loloos buat sira neʼebé importante liu”. (Filipe 1:10) Laʼós buat hotu neʼebé ita halo mak importante. Tan neʼe deside ida-neʼebé mak importante liu no tau fokus ba ida-neʼe toʼo ita halo hotu.

   “Neon neʼebé la fokus mak atu hanesan ho labarik kiʼik ida neʼebé ezije atu hetan buat ruma, maski Ita dehan labele; Ita presiza obriga Ita-nia kakutak atu fokus nafatin.”—Maria.

•   Hadook an husi buat naran deʼit neʼebé bele dada Ita-nia atensaun. Bainhira estuda daudaun, Ita hakarak atu cek Ita-nia telemovel ka lae? Tau Ita-nia telemovel iha fatin seluk. Hamate televizaun no lalika hanoin kona-ba Ita-nia média sosiál. Bíblia hatete: “Uza didiʼak imi-nia tempu.”—Koloso 4:5.

   “Haʼu deskobre katak diʼak liu atu haʼu tau fokus deʼit ba buat ida. Hodi halo nuneʼe, haʼu sente kontente liu atu kumpre haʼu-nia knaar ida-idak. No neʼe halo haʼu kontente tebetebes.”—Onya.

•   Tau atensaun tomak bainhira konversa ho ema. Se Ita haree ba Ita-nia telemovel bainhira Ita koʼalia daudaun ba ema ida, Ita la hatudu respeitu ba ema neʼe no neʼe bele lori rezultadu la diʼak. Bíblia haruka Ita atu trata ema seluk iha dalan neʼebé Ita hakarak sira trata Ita.—Mateus 7:12.

   “Dala ruma bainhira haʼu koʼalia ho haʼu-nia feton, nia haruka hela mensajen ba ema ruma ka halo buat seluk ho ninia telemovel. Ida-neʼe halo haʼu sente estrese. Maibé tuir loloos dala ruma, haʼu mós halo buat neʼebé hanesan.”—David.