•  Haʼu presiza duni hatún isin ka lae?

•  Saida mak dalan diʼak liu atu hatún isin?

•  Haʼu-nia planu

•  Ita-nia kolega hanoin saida

 Joven balu hakarak atu hatún isin. Maibé . . .

•   Joven barak hakarak hatún isin tanba hakarak haree kapás laʼós tanba sira-nia saúde. Atu hatún isin lalais, joven balu koko dalan oioin hanesan la han ka sira hemu ai-moruk atu hatún isin. Baibain dalan sira-neʼe la lori rezultadu diʼak no perigu ba saúde.

   “Joven feto balu la han atu bele hatún isin lalais. Maibé ida-neʼe estraga sira-nia saúde. No presiza tempu kleur atu sira-nia saúde sai diʼak fali.”—Hailey.

•   Tuir loloos joven barak la presiza hatún isin. Sira-nia isin pas-pas hela. Maibé karik sira sente isin bokur tanba razaun ruma, karik sira kompara sira-nia an ho sira-nia maluk ka kompara sira-nia an ho ema sira neʼebé sira haree iha média.

   “Kuandu haʼu tinan 13, haʼu kompara haʼu-nia an ho haʼu-nia kolega sira. Haʼu hanoin katak sira sei gosta liután haʼu se haʼu iha isin hanesan sira-nian, neʼe katak isin lotuk.”—Paola.

 Maibé iha mós joven sira neʼebé presiza duni hatún isin. Relatóriu husi Organização Mundial da Saúde (WHO) hatete . . .

•   Iha mundu tomak, maizumenus labarik naʼin-millaun 340 husi tinan 5 toʼo 19 mak bokur demais.

•   Iha tinan 1975, husi labarik sira ho idade 5 toʼo 19, porsentu 4 deʼit mak bokur demais. Iha tinan 2016, neʼe aumenta sai porsentu 18.

•   Iha nasaun barak, ema neʼebé isin bokur demais mak barak liu duké ema neʼebé isin krekas demais.

•   Iha nasaun sira ho saláriu kiʼik, ema barak tebes mak bokur. Ida-neʼe mós bele akontese ba ema neʼebé ninia membru ba família mak malnutrisaun.

 Dalan ida-neʼebé mak Ita sei hili?

1.   La han.

2.   Halo ezersísiu no han ai-han neʼebé diʼak ba saúde.

3.   Hemu ai-moruk hatún isin nian.

 Resposta neʼebé loos: Dalan 2: Halo ezersísiu no han ai-han neʼebé diʼak ba saúde.

 Karik Ita-nia isin tun lalais bainhira Ita koko atu la han ka la han ai-han balu. Maibé ida-neʼe la diʼak ba Ita-nia saúde. No karik bainhira Ita para ona dieta, Ita-nia isin sei saʼe liután.

 Tuir loloos, se Ita hatún isin tanba hakarak iha saúde neʼebé diʼak, Ita sei sente kontente no Ita mós sei haree kapás. Doutór ida kona-ba psikolojia naran Michael Bradley hatete: “Atu hetan rezultadu neʼebé seguru, diʼak ba saúde, no dura ba tempu kleur, . . . Ita presiza troka Ita-nia toman sira ho toman neʼebé Ita bele halaʼo durante Ita-nia moris tomak.” a Neʼe katak sá? Se Ita presiza duni atu hatún isin, duké halo deʼit dieta, diʼak liu atu troka Ita-nia toman sira ho toman neʼebé diʼak ba saúde.

 Bíblia anima ita atu “kontrola [ita-nia] hahalok” no neʼe inklui ita-nia toman atu han. (1 Timóteo 3:11) Bíblia mós haruka ita atu hadook an husi toman atu han demais. (Provérbios 23:20; Lucas 21:34) Bazeia ba matadalan sira-neʼe, koko toʼok sujestaun sira tuirmai neʼe atu Ita bele iha toman neʼebé diʼak liután:

•   Buka-hatene toman neʼebé diʼak kona-ba han mak hanesan saida.

   Ita la presiza tegas demais toʼo kuidadu demais ho ai-han. Se Ita hatene uitoan kona-ba nutrisaun, neʼe bele ajuda ita atu iha toman neʼebé diʼak kona-ba han. No ida-neʼe mak dalan diʼak liu atu iha isin neʼebé pas-pas.

•   Halo ezersísiu beibeik.

   Hanoin toʼok kona-ba atividade saida deʼit mak bele ajuda Ita atu book an nafatin. Porezemplu, duké saʼe elevadór, diʼak atu uza deʼit eskada. Ka duké halimar game durante minutu 30, diʼak atu jogging ba minutu 30.

•   Troka tiha ai-han neʼebé la diʼak ba saúde.

   Joven feto ida naran Sophia hatete: “Haʼu koko atu prepara ai-fuan no modo fresku, atu nuneʼe kuandu haʼu hakarak han buat ruma, haʼu sei han ai-han neʼebé diʼak ba saúde.”

•   Han neineik-neineik.

   Ema balu han ho ansi toʼo la nota katak sira-nia kabun bosu ona. Tan neʼe, ita presiza han neineik-neineik. Antes atu aumenta tan ai-han, diʼak atu para uitoan no hein. Karik Ita la hamlaha ona.

•   Buka-hatene kaloria hira mak Ita han.

   Lee didiʼak informasaun kona-ba nutrisaun neʼebé baibain hakerek iha ai-han nia falun atu hatene ai-han neʼe iha kaloria hira. Hanoin-hetan, hemu oioin neʼebé midar no iha kaleen laran, ai-han neʼebé sosa iha restaurante no dose sira mak ai-han neʼebé iha kaloria barak no bele halo Ita-nia isin saʼe.

•   Sai balansu.

   Sara neʼebé tinan 16 hatete: “Uluk, bainhira haree ai-han, haʼu kalkula kedas kona-ba kaloria. Haʼu hanoin deʼit kona-ba ai-han neʼe iha kaloria hira.” Kuidadu atu la sai fokus demais ba totál kaloria. Dala ruma, la problema atu han ai-han neʼebé gostu maski iha kaloria barak.

 Sujestaun: Husu sujestaun husi doutór. Doutór bele fó sujestaun kona-ba toman hanesan saida mak diʼak ba saúde no diʼak ba Ita-nia isin.