•  Tanbasá mak ema gosta atu iha tato?

•  Pergunta saida deʼit mak Ita presiza husu ba Ita-nia an?

•  Bíblia nia matadalan saida deʼit mak Ita presiza hanoin?

 Joven mane ida naran Ryan hatete: “Tato mak hanesan dezeñu furak.”

 Dala ruma ema nia hanoin kona-ba atu iha tato ka lae bele troka, depende ba sira-nia razaun atu iha tato. Porezemplu, joven feto ida naran Jillian hatete: “Uluk haʼu eskola ho feto ida, bainhira feto neʼe sei kiʼik ninia inan mate. Entaun bainhira feto neʼe sai joven nia hetan tato ida iha ninia kanuruk ho ninia inan nia naran. Haʼu hanoin tato hanesan neʼe diʼak.”

 Maski Ita iha razaun diʼak atu iha tato, maibé Ita presiza hanoin didiʼak antes Ita atu hetan tato ida tanba neʼe permanente! Pergunta saida deʼit mak Ita presiza husu ba Ita-nia an se Ita hakarak iha tato? Bíblia nia matadalan saida deʼit mak bele ajuda Ita atu halo desizaun kona-ba atu iha tato ka lae?

 Tato perigu ba saúde ka lae? Sítiu ida kona-ba buat médiku (Mayo Clinic) esplika: “Bainhira ita hetan tato, ida-neʼe hakanek ita-nia kulit no bele hamosu infesaun no mós moras seluk tan. Dala ruma ita-nia kulit bele bubu no sai fitar.” Laʼós neʼe deʼit, sítiu neʼe mós esplika: “Se ekipamentu neʼebé ema uza atu halo tato mak la moos ka kontamina ho ema seluk nia raan, neʼe bele daʼet moras oioin.”

 Tato bele estraga Ita-nia naran diʼak ka lae? Dalan neʼebé Ita hadiʼa Ita-nia an bele book ema seluk nia hanoin kona-ba Ita. Neʼe sei book ema atu hanoin Ita maduru ka lae, bele tau fiar ba Ita ka lae? Joven feto ida naran Samantha hatete: “Bainhira haʼu haree ema ida neʼebé iha tato haʼu hanoin kedas katak ema neʼe mak gosta hemu tua demais no festa hela deʼit.”

 Feto ida naran Melanie ho tinan 18 esplika: “Ba haʼu, ema neʼebé iha tato koko atu subar sira-nia an. Sira lakohi ema hatene sira loloos mak ema hanesan saida.”

 Ita sei gosta tato neʼe ba nafatin ka lae? Bainhira ita-nia isin saʼe ka ita-nia idade aumenta ita-nia tato bele iha mudansa no la haree hanesan uluk ona. Mane joven ida hatete: “Haʼu haree ona tato sira neʼebé ema iha ona ba tempu kleur, tato sira-neʼe sai tuan no la jeitu liu.”

 Mane ida naran Allen ho tinan 21 esplika: “Tato sira mós bele sai tuan tanba liutiha tinan balu tato nia signifika la importante ona ba ema neʼe.”

 Buat neʼebé Allen koʼalia mak loos duni. Bainhira ema nia idade aumenta sira-nia hanoin no buat neʼebé sira gosta troka, maibé sira la bele troka sira-nia tato. Joven feto ida naran Teresa hatete: “Haʼu lakohi hetan tato tanba ikusmai haʼu-nia sentimentu sei troka no haʼu sei arrepende an kona-ba tato neʼebé haʼu la gosta ona.”

 Ema neʼebé maduru hanoin didiʼak antes nia halo desizaun ruma. (Provérbios [Amsal] 21:5; Ebreu 5:14) Entaun mai ita hanoin lai kona-ba Bíblia nia matadalan balu neʼebé bele book ita-nia desizaun atu hetan tato.

•  Koloso 3:​20: “Imi oan sira, halo tuir imi-nia inan-aman iha buat hotu, tanba ida-neʼe monu loos ba Naʼi nia laran.”

    Rezultadu saida deʼit mak Ita sei hetan sei Ita hela ho Ita-nia inan-aman maibé la halo tuir sira?

•  1 Pedro 3:​3, 4: “Keta hafurak imi-nia an tuir deʼit buat neʼebé ema haree, katak fuuk ho modelu oioin ka tau osan-mean ka roupa furak, maibé buat neʼebé imi tenke hafurak mak imi-nia laran, hodi tau hatais neʼebé la bele mohu, katak hahalok laran-maus no laran-diʼak.”

    Tuir Ita-nia hanoin, tanbasá mak Bíblia dehan katak importante liu atu ‘hafurak ita-nia laran’?

•  1 Timóteo 2:9: “Haʼu hakarak katak feto sira hatais . . . ho respeitu no ho hanoin loos.”

    “Hatais ho respeitu” katak sá? Tanbasá hatais ho respeitu mak diʼak liu fali tato sira?

•  Roma 12:1: “Fó imi-nia isin nuʼudar prezente neʼebé moris, santu, no neʼebé Maromak simu, katak halo serbisu santu ho imi-nia kbiit atu hanoin.”

    Tanbasá mak dalan neʼebé Ita tau matan ba Ita-nia isin-lolon importante ba Maromak?

 Ema barak deside atu la hetan tato tanba informasaun sira-neʼe. Tuir loloos, sira hetan buat neʼebé diʼak liu fali tato sira. Teresa, neʼebé temi tiha ona hatete: “Bainhira ita hadomi tebes ema ruma ka ema neʼe mak importante tebes ba ita, diʼak liu ita fó-hatene ema neʼe katak ita hadomi sira, duké hetan tato neʼebé fó sai sentimentu neʼe.”