“Bainhira haʼu tinan 15, haʼu la iha problema ho regra neʼebé haʼu-nia inan-aman halo, maibé agora haʼu-nia tinan 19 ona no haʼu presiza hetan liberdade liután.”​—Sylvia.

 Ita mós sente hanesan ho Sylvia ka lae? Se nuneʼe, informasaun neʼe bele ajuda Ita atu koʼalia ho Ita-nia inan-aman kona-ba regra neʼebé sira halo.

•  Buat neʼebé Ita presiza hatene

•  Buat neʼebé Ita bele halo

•  Ita-nia kolega hanoin saida

 Antes koʼalia ho Ita-nia inan-aman, hanoin uluk kona-ba buat sira tuirmai neʼe:

•  Se la iha regra, moris sei sai runguranga. Imajina toʼok kona-ba estrada ida neʼebé iha karreta barak. Saida mak sei akontese kuandu estrada neʼe la iha sinál tránzitu, la iha lampu merah no la iha marka kona-ba velosidade másimu? Lei tránzitu ajuda ema atu lori karreta ho kuidadu no la runguranga. Nuneʼe mós ho regra husi Ita-nia inan-aman, neʼe ajuda Ita-nia moris laʼo ho diʼak no la runguranga.

•  Regra hatudu katak Ita-nia inan-aman hadomi Ita. Se Ita-nia inan-aman la halo regra ba Ita, karik neʼe katak sira ladún interese ho Ita. Ita lakohi Ita-nia inan-aman hanesan neʼe loos ka lae?

 HATENE KA LAE? Inan-aman sira mós presiza halo tuir regra sira. Oinsá Ita bele hatete nuneʼe? Se Ita la fiar, koko lee Génesis 2:24; Deuteronómio 6:6, 7; Éfeso 6:4; no 1 Timóteo 5:8.

 Entaun, agora Ita hatene ona katak regra mak importante. Maibé oinsá se Ita sente katak Ita-nia inan-aman halo regra barak demais?

 Hanoin uluk, antes koʼalia. Baibain Ita sempre halo tuir Ita-nia inan-aman nia regra ka lae? Se Ita ladún halo tuir, karik agora laʼós tempu neʼebé diʼak atu husu sira fó liberdade liután ba Ita. Diʼak atu lee informasaun ho títulu “Saida mak haʼu bele halo atu haʼu-nia inan-aman tau fiar mai haʼu?”

 Maibé se Ita mak halo tuir beibeik regra neʼebé Ita-nia inan-aman halo, diʼak atu hanoin uluk kona-ba saida mak Ita sei hatete bainhira koʼalia ho Ita-nia inan-aman. Ita mós bele koko atu hakerek uluk Ita-nia liafuan sira. Se Ita halo nuneʼe, neʼe fó tempu ba Ita atu hanoin fali buat neʼebé Ita sei husu ba sira. Tuirmai, husu ba Ita-nia inan-aman kona-ba tempu no fatin neʼebé diʼak ba sira atu koʼalia hamutuk. Bainhira koʼalia ho Ita-nia inan-aman, hanoin-hetan atu:

 Hatudu respeitu. Bíblia hatete: “Liafuan neʼebé makaʼas halo ema hirus liután.” (Provérbios 15:1) Tan neʼe hanoin-hetan: Se Ita diskute malu no duun katak sira-nia regra mak demais, neʼe sei la lori rezultadu diʼak.

 “Kuandu haʼu respeitu haʼu-nia inan-aman, sira mós sei respeitu haʼu. Se ami hatudu respeitu ba malu, fasil liu ba ami atu konkorda malu.”​—Bianca, 19.

 Rona. Bíblia haruka ita atu “tenke lalais atu rona, la ansi atu koʼalia”. (Tiago 1:19) Hanoin-hetan, Ita koʼalia daudaun ba Ita-nia inan-aman, laʼós fó diskursu ba sira.

 “Nuʼudar ita sai boot daudaun, ita bele sente katak ita hatene barak liu duké ita-nia inan-aman. Maibé neʼe la loos. Ita nafatin presiza sira-nia matadalan no konsellu.”​—Devan, 20.

 Hanoin Ita-nia inan-aman nia sentimentu. Koko atu komprende sira-nia hanoin no razaun. Halo tuir Bíblia nia matadalan atu ‘keta buka diʼak deʼit ba ita-nia an rasik, maibé buka mós ema seluk [ka, ita-nia inan-aman nia hanoin] nia diʼak’.​—Filipe 2:4.

 “Uluk, haʼu sempre hanoin katak haʼu-nia inan-aman mak inimigu, laʼós kolega. Maibé agora haʼu komprende katak sira aprende daudaun oinsá atu sai inan-aman neʼebé diʼak hanesan ho haʼu neʼebé aprende daudaun oinsá atu sai ema boot neʼebé hatene kaer responsabilidade. Buat hotu neʼebé sira halo mak tanba sira hadomi haʼu.”​—Joshua, 21.

 Buka solusaun. Porezemplu, Ita-nia inan-aman la fó lisensa ba Ita atu tuir festa ida neʼebé Ita hakarak atu tuir tanba festa neʼe halaʼo iha kalan. Buka-hatene tuir loloos sira hanoin barak kona-ba saida, kona-ba tempu atu halaʼo festa ka kona-ba festa neʼe?

•   Se sira hanoin barak tanba festa halaʼo iha kalan, karik sira bele sente kmaan se Ita bolu kolega ida atu hamaluk Ita, loos ka lae?

•   Se sira hanoin barak kona-ba festa neʼe, karik sira sei sente kalma se Ita fó-hatene sira kona-ba sé-sé deʼit mak sei tuir festa neʼe no sé mak organiza festa neʼe, loos ka lae?

 Hanoin-hetan, Ita presiza koʼalia ho respeitu ba Ita-nia inan-aman no rona didiʼak ba sira ho pasiénsia. Hatudu liuhusi Ita-nia hahalok no liafuan katak Ita ‘respeitu Ita-nia inan-aman’. (Éfeso 6:2, 3) Sira sei troka sira-nia desizaun ka lae? Karik sin. Karik mós lae. Maski nuneʼe, . . .

 Respeitu Ita-nia inan-aman nia desizaun. Neʼe mak hakat neʼebé importante neʼebé dala ruma Ita haluha. Se Ita-nia inan-aman lakohi halo tuir Ita-nia hakarak no imi diskute malu, ikusmai saida mak sei akontese? Susar ba Ita atu koʼalia ho sira kona-ba hetan liberdade liután iha tempu seluk. Maibé se Ita halo tuir sira-nia desizaun, karik Ita-nia inan-aman sei fó Ita liberdade liután iha tempu seluk.