Tempu joven mak tempu neʼebé ita iha saúde neʼebé diʼak no enerjia barak. Maibé joven balu la hanesan neʼe, sira iha limitadu tanba moras. Ita mós hanesan neʼe ka lae? Se nuneʼe, karik V’loria, Justin no Nisa nia esperiénsia bele anima Ita. Sira naʼin-tolu mak Testemuña ba Jeová. Haree oinsá sira bele tahan maski sira iha problema saúde.

•  V’loria

•  Justin

•  Nisa

 Kuandu haʼu tinan 14, doutór hatete katak haʼu iha moras fibromialgia. Bainhira haʼu tinan 20, haʼu mós iha moras artrite, moras lúpus, no moras Lyme. Susar atu halo buat hotu tuir Ita-nia hakarak bainhira Ita-nia isin sempre fraku. Dala ruma, haʼu-nia kidan toʼo ain matek no haʼu presiza uza kadeira-roda.

 Buat neʼebé aat liu husi haʼu-nia moras mak haʼu-nia sentimentu la iha folin tanba haʼu labele halo buat neʼebé simples hanesan hakerek ka loke botir. Haʼu haree labarik seluk laʼo no haʼu hanoin tanbasá susar tebes mai haʼu atu halo nuneʼe. Haʼu sente la iha duni folin.

 Maibé haʼu agradese tanba haʼu hetan ajuda husi haʼu-nia família, no mós irmaun-irmán husi kongregasaun Testemuña ba Jeová. Irmaun-irmán sira mai vizita haʼu, no neʼe halo haʼu la sente mesamesak. Irmaun-irmán balu konvida haʼu atu ransu iha sira-nia uma, maski la fasil atu hiʼit haʼu tama-sai ba karreta no kadeira-roda.

 Ferik-katuas sira iha kongregasaun mak ajuda boot mai haʼu tanba sira komprende ho didiʼak situasaun kuandu ita hetan moras ruma. Sira ajuda haʼu atu simu haʼu-nia situasaun no la sente triste tanba labele halo buat barak hanesan ema seluk. Bainhira haʼu tuir reuniaun no bá haklaken, haʼu sente kontente tebes. (Ebreu 10:25) Iha tempu sira-neʼe, haʼu komprende katak maski haʼu moras, maibé loloos haʼu hanesan deʼit ho ema seluk.

 Haʼu nafatin fó-hanoin ba haʼu-nia an katak Jeová fó buat neʼebé ita presiza atu bele tahan. Porezemplu, Bíblia hatete katak maski karik ita-nia isin sai fraku daudaun iha liʼur, maibé iha laran ita “simu kbiit foun loron ba loron”. (2 Korinto 4:16) Neʼe mak buat neʼebé haʼu sente duni!

 Hanoin toʼok: Se Ita iha moras todan, tanbasá importante atu kontaktu malu ho ema seluk? Se Ita mak iha saúde diʼak, oinsá Ita bele ajuda ema neʼebé moras?​—Provérbios 17:17.

 Haʼu monu no labele hamriik fali. Haʼu-nia hirus-matan sente aperta no haʼu labele book an. Haʼu-nia família lori kedas haʼu ba sala emerjénsia. Foufoun doutór la hatene haʼu moras saida. Maibé depois akontesimentu oioin, doutór sira hatete katak haʼu iha moras Lyme.

 Moras Lyme afeta ita-nia sistema nervu, ka ita-nia uat sira. Tuir loloos, maski tinan barak liu ona, haʼu-nia isin nafatin nakdedar, dala ruma haʼu rasik labele kontrola ida-neʼe. Dala ruma haʼu-nia isin-lolon tomak sente moras no haʼu-nia liman-fuan sira moras tebes toʼo haʼu labele book sira. Haʼu sente haʼu-nia ruin-fukun toos hanesan besi neʼebé ferrujen ona.

 Uluk haʼu toman atu hanoin: ‘Haʼu joven deʼit tanbasá haʼu tenke moras hanesan neʼe?’ No neʼe halo haʼu hirus. Haʼu tanis ba Maromak loron-loron no husu ba nia: “Tanbasá haʼu hasoru terus hanesan neʼe?” Haʼu mós komesa sente katak Maromak husik hela haʼu. Maibé tuirmai haʼu hanoin kona-ba Job neʼebé temi iha Bíblia laran. Job la hatene ho loloos razaun tanbasá nia hetan terus oioin, maski nuneʼe nia nafatin laran-metin ba Maromak. Se Job deʼit bele halo hanesan neʼe, maski hasoru susar boot oioin, haʼu mós bele.

 Katuas sira iha kongregasaun ajuda tebes haʼu. Sira sempre vizita haʼu no sempre husu haʼu-nia kondisaun. Katuas ida hatete mai haʼu katak haʼu bele bolu nia iha tempu naran deʼit neʼebé haʼu presiza ema ida atu koʼalia. Haʼu agradese ba Jeová loroloron tanba nia fó mai haʼu belun diʼak sira!​—Isaias 32:1, 2.

 Dala ruma bainhira ita hetan moras, ita haluha katak Jeová hatene susar neʼebé ita hasoru. Bíblia hatete: “Entrega ó-nia laran-susar ba Jeová, no nia sei apoia ó.” (Salmo 55:22) Haʼu koko atu halo ida-neʼe loroloron.

 Hanoin toʼok: Oinsá ema sira neʼebé hadomi Ita bele ajuda Ita tahan kuandu moras?​—Provérbios 24:10; 1 Tesalónika 5:11.

 Kuandu haʼu sei joven, doutór hatete katak haʼu hetan moras ida naran Marfan. Moras neʼe afeta haʼu-nia ruin sira no halo haʼu sente fraku. Moras Marfan bele mós afeta fuan, matan, no orgaun sira seluk. Haʼu la sente moras loroloron, maski nuneʼe bainhira moras neʼe mosu, haʼu terus loos.

 Foufoun bainhira haʼu deskobre katak haʼu moras, haʼu tanis barak. Haʼu hanoin barak katak haʼu sei labele tan halo buat oioin neʼebé haʼu gosta. Porezemplu, haʼu gosta atu dansa no kuandu haʼu imajina katak loron ida haʼu labele dansa tan, ka labele laʼo tan, neʼe halo haʼu taʼuk atu hanoin kona-ba futuru.

 Haʼu-nia biin ajuda haʼu. Nia ajuda haʼu bainhira haʼu sente la iha folin. Nia hatete mai haʼu atu la moris ho taʼuk, tanba neʼe bele estraga haʼu-nia moris. Nia mós anima haʼu atu halo orasaun beibeik, tanba só Jeová deʼit mak hatene ho didiʼak no komprende haʼu-nia situasaun.​—1 Pedro 5:7.

 Eskritura ida neʼebé fó laran-manas mai haʼu mak Salmo 18:6 neʼebé hatete: “Haʼu bolu Jeová iha haʼu-nia susar laran, haʼu kontinua bolu haʼu-nia Maromak hodi husu ajuda. Nia rona haʼu-nia lian husi ninia templu, no haʼu-nia halerik atu husu ajuda toʼo ninia tilun.” Versíkulu neʼe ajuda haʼu komprende katak bainhira haʼu halo orasaun ba Jeová no husu nia atu ajuda haʼu atu tahan, nia sei rona ba haʼu no mós ajuda haʼu. Nia sempre iha ba haʼu.

 Haʼu aprende katak la sala atu sente triste no hirus bainhira ita hasoru susar, tanba neʼe mak sentimentu neʼebé normál, naran katak ita la husik sentimentu sira-neʼe atu domina ita-nia moris no hadook ita husi Maromak. Laʼós Maromak mak hamosu susar ba ita no nia sei nunka husik hela ita se ita kontinua tau uluk nia iha ita-nia moris.​—Tiago 4:8.

 Hanoin toʼok: Terus mai husi Maromak ka lae?​—Tiago 1:13.