“Haʼu haree haʼu-nia kolega balu tuur deʼit iha klase laran, la lori kadernu, uza headset no rona múzika bainhira mestre esplika daudaun matéria. No estudante sira-neʼe hanoin tanbasá mak sira hetan valór aat! Estudante balu neʼebé estuda makaʼas tebes hanesan haʼu, maibé nafatin hetan valór aat iha ezame. Haʼu labele komprende tanbasá ida-neʼe akontese. Haʼu sente la kontente tebes kuandu hetan valór aat maski estuda ona toʼo kalan-boot durante semana ida.”—Yolanda.

 Ita rasik mós sente hanesan Yolanda ka lae? Klaru katak bainhira Ita hetan valór aat, neʼe bele duni halo Ita sai laran-kraik.

 Joven balu neʼebé hetan valór aat iha eskola rende an atu koko hetan valór neʼebé diʼak. Joven balu hili atu para eskola. Karik Ita rasik hanoin atu koko dalan sira-neʼe, maibé tuir loloos iha dalan seluk atu rezolve situasaun neʼe. Mai haree hakat neen oinsá Ita bele hetan valór neʼebé diʼak liu.

•  Buat neʼebé Ita bele halo

•  Ita-nia kolega hanoin saida

•   Sempre tama eskola. Karik Ita hanoin, ema hotu mós hatene kona-ba neʼe, maibé se Ita falta eskola beibeik, Ita-nia valór eskola mós sei aat.

   “Iha haʼu-nia eskola, alunu sira neʼebé la interese ho sira-nia valór iha eskola mak sempre falta eskola, tuir loloos ida-neʼe lori deʼit problema ba sira.”—Matthew.

   Bíblia nia prinsípiu: “Buat naran deʼit neʼebé ema kari, nia mós sei koʼa ida-neʼe.”—Galásia 6:7.

•   Tau atensaun tomak. Tuir aula mak hakat primeiru neʼebé diʼak, no kuandu Ita iha ona aula laran, Ita presiza aproveita tempu neʼe atu aprende didiʼak. Hakerek didiʼak Ita-nia nota. Koko atu komprende Ita-nia mestre nia esplikasaun. Se bele, husu pergunta ba mestre durante eskola.

   “Durante aula, haʼu husu pergunta barak tanba haʼu haree katak mestre sira prontu atu esplika matéria ho diʼak liután bainhira sira hatene katak alunu sira la komprende.”—Olivia.

   Bíblia nia prinsípiu: “Haree didiʼak oinsá imi rona.”—Lucas 8:18.

•   Hakaʼas an atu hatudu laran-moos. Nyontek mak hahalok neʼebé la hatudu laran-moos. Iha dalan oioin atu nyontek iha eskola. Dalan ida mak kopia fali ema seluk nia resposta ka tugas. Neʼe la hatudu laran-moos no mós la lori benefísiu ba Ita.

   “Se Ita la komprende pergunta ruma, keta kopia alunu seluk nia resposta. Se Ita nyontek, Ita la ajuda Ita-nia an. Se Ita halo nuneʼe, Ita la aprende oinsá atu rezolve rasik problema sira, maibé Ita sai toman atu sadere ba ema seluk atu rezolve problema sira.”—Jonathan.

   Bíblia nia prinsípiu: “Ami hakarak atu hatudu laran-moos iha buat hotu.”—Ebreu 13:18.

•   Halo uluk Ita-nia TPC. Se bele, halo uluk Ita-nia TPC antes atu halo atividade seluk, liuliu atividade halimar nian. a Hodi nuneʼe, kuandu Ita halo hotu TPC, Ita bele goza Ita-nia tempu halimar nian!

   “Hodi halo TPC nuʼudar prioridade, neʼe ajuda hadiʼa haʼu-nia valór iha eskola. Bainhira haʼu fila ba uma, baibain haʼu hakarak tebes atu toba uitoan ka rona múzika. Maibé haʼu koko atu halo uluk haʼu-nia TPC no tuirmai mak deskansa.”—Calvin.

   Bíblia nia prinsípiu: “Buka-hatene loloos buat sira neʼebé importante liu.”—Filipe 1:10.

•   Husu ajuda. Keta moe atu husu ajuda ba ema seluk. Husu konsellu husi Ita-nia inan-aman. Husu Ita-nia mestre kona-ba oinsá Ita bele hadiʼa Ita-nia valór. Iha situasaun balu, karik Ita bele tuir kursu ruma.

   “Koʼalia diretamente ba mestre. Husu mestre atu ajuda ita komprende matéria no hadiʼa ita-nia valór. Mestre bele haree rasik katak ita hakaʼas an duni no neʼe sei book nia atu ajuda ita.”—David.

   Bíblia nia prinsípiu: “Buat hotu sei laʼo ho diʼak kuandu ema barak fó konsellu.”—Provérbios 15:22.

•   Aproveita oportunidade hotu neʼebé Ita iha. Iha nasaun balu, baibain Ita bele tuir ezame estra atu bele aumenta Ita-nia valór. Karik Ita mós bele halo projetu ka buat seluk atu bele hadiʼa Ita-nia valór. Se Ita-nia valór ezame mak mean, karik Ita bele tuir fali ezame neʼe se Ita husu.

   “Se haʼu hakarak hetan valór diʼak ba matéria ida, haʼu presiza halo buat ruma. Haʼu husu haʼu-nia mestre se iha buat seluk neʼebé haʼu bele halo atu hadiʼa haʼu-nia valór sai diʼak liu.”—Mackenzie.

   Bíblia nia prinsípiu: “Serbisu makaʼas hotu sei lori buat diʼak.”—Provérbios 14:23.