Nuʼudar tinan sira liu ba daudaun, kaben-naʼin balu nia domin ba malu bele sai menus. Se agora ida-neʼe akontese ba Ita, neʼe problema boot ka lae?

•  Buat neʼebé Ita presiza hatene

•  Buat neʼebé Ita bele halo

 Hatudu domin ba malu mak importante tebes hodi bele iha moris kaben nian neʼebé metin. Hanesan ita presiza han-hemu beibeik atu iha isin neʼebé forte no diʼak, ita mós presiza kontinua hatudu domin ba malu beibeik atu iha moris kaben nian neʼebé metin. Maski kaben ba tinan barak ona, maibé feen no laʼen sira presiza hatudu ba sira-nia pár katak sira hadomi no hanoin malu tebetebes.

 Domin neʼebé loos la hanoin an deʼit. Domin neʼebé loos tau uluk ema seluk nia kontente. Nuneʼe, duké hatudu domin só deʼit kuandu Ita rasik hakarak, kaben-naʼin sira neʼebé laran-diʼak tau uluk sira-nia pár nia presiza.

 Baibain, feen sira presiza simu hahalok domin nian barak liu fali laʼen sira. Karik laʼen ida hadomi tebes ninia feen, maibé se nia hatudu domin neʼe só deʼit bainhira nia atu sai ka kuandu fila uma, ka só deʼit kuandu sira atu halaʼo relasaun seksuál, ninia feen bele sente duvida kona-ba ninia laʼen hadomi duni nia ka lae. Diʼak liu atu hatudu domin iha tempu hotu.

 Hatudu domin liuhusi liafuan. Liafuan sira hanesan “Haʼu hadomi ó” ka “Haʼu hafolin tebes ó” bele halo Ita-nia pár sente katak Ita hadomi duni nia.

 Bíblia nia matadalan: “Buat neʼebé sai husi ema nia ibun mai husi laran.”​—Mateus 12:34.

 Sujestaun: La presiza hatudu Ita-nia domin liuhusi koʼalia deʼit. Bele mós hakerek liafuan sira-neʼe iha karta, e-mail, ka mensajen.

 Hatudu domin liuhusi hahalok. Kuandu hakoʼak, reʼi, ka kaer liman, neʼe bele hatudu katak Ita-nia liafuan “Haʼu hadomi ó” mak loos duni. Ita mós bele hatudu domin ba Ita-nia pár bainhira Ita hamaus nia, hateke ba nia ho domin, ka fó prezente ruma. Se Ita mak laʼen ida, Ita mós bele halo serbisu ruma atu ajuda Ita-nia feen, hanesan ajuda lori sasán bainhira kompras, loke odamatan ba nia, fase bikan, fase roupa ka teʼin. Feen barak sente katak neʼe laʼós buat baibain deʼit, maibé neʼe hatudu katak Ita hadomi tebes nia.

 Bíblia nia matadalan: “Ita tenke hatudu domin laʼós ho liafuan ka ibun deʼit, maibé ho hahalok.”​—1 João 3:18.

 Sujestaun: Hatudu domin ba Ita-nia pár hanesan Ita hatudu iha tempu neʼebé imi namora hela.

 Gasta tempu hamutuk nuʼudar kaben-naʼin. Kuandu Ita gasta tempu hamutuk, ida-neʼe sei hametin Ita-nia moris kaben nian no hatudu ba Ita-nia pár katak Ita kontente kuandu Ita hamutuk ho nia. Maski susar atu arranja tempu hamutuk tanba Ita iha oan ka presiza koʼalia kona-ba buat neʼebé importante, maibé se bele, planu hodi halo buat simples hamutuk loroloron hanesan laʼo pasiar nuʼudar kaben-naʼin deʼit.

 Bíblia nia matadalan: “Buka-hatene loloos buat sira neʼebé importante liu.”​—Filipe 1:10.

 Sujestaun: Kaben-naʼin balu fó tempu atu han-kalan espesiál hamutuk ka arranja buat espesiál iha findesemana atu sira bele gasta tempu hamutuk.

 Koñese didiʼak Ita-nia pár. Ema ida-idak nia presiza kona-ba domin la hanesan. Kaben-naʼin sira presiza koʼalia hamutuk kona-ba dalan saida mak sira hakarak hatudu domin ba malu, no se sira presiza hatudu domin liután ka lae. Tuirmai, sira presiza kumpre sira-nia pár nia hakarak. Loloos, domin mak importante tebes hodi hametin ita-nia moris kaben nian.

 Bíblia nia matadalan: “Domin . . . la buka diʼak ba ninia an rasik.”​—1 Korinto 13:4, 5.

 Sujestaun: Duké obriga Ita-nia pár atu hatudu domin, husu Ita-nia an, ‘Saida mak haʼu bele halo hodi haʼu-nia pár hakarak hatudu domin liután mai haʼu?’