Mane naʼin-haat neʼe ikusmai nonook. Sira rona deʼit lian husi anin neʼebé huu husi rai-fuik maran iha rai-Arábia. Job la iha tan liafuan atu koʼalia tanba nia debate tempu kleur no kole tebes. Imajina toʼok Job hateke Elifaz, Bildad, no Zofar hodi haree saida tan mak sira bele koʼalia ba nia. Maibé sira la brani atu hateke Job, tanba maski sira uza dalan oioin atu koʼalia aat hasoru Job, sira-nia “liafuan neʼebé hanesan anin” saugati deʼit. (Job 16:3, nota-rodapé) Job la husik buat ida atu estraga ninia laran-metin ba Jeová.

 Karik Job hanoin katak nia lakon ona buat hotu, nia iha deʼit ninia laran-metin ba Maromak. Nia lakon ninia rikusoin, oan naʼin-10 mate, la iha tan kolega ka viziñu neʼebé apoia no respeitu nia, no ikusmai nia mós kona moras. Job nia isin sai metan, nakonu ho kanek no ular-oan, ninia iis mós dois tebes. (Job 7:5; 19:17; 30:30) Iha situasaun hanesan neʼe mak Job nia kolega falsu naʼin-tolu koʼalia buat neʼebé aat tebes ba nia, no neʼe halo Job hirus tebes. Job defende ninia an hodi esplika katak nia laʼós ema aat hanesan buat neʼebé sira hatete. Depois Job koʼalia toʼo hotu, sira sai nonook. Ikusmai sira la iha tan liafuan atu koʼalia aat ba nia. Maibé, Job nia terus iha dalan fíziku no emosaun seidauk lakon. Nia presiza tebes atu hetan ajuda.

 Ita bele komprende tanbasá Job labele hanoin ho loloos iha tempu neʼebá. Nia presiza ema ruma atu fó matadalan no korrije ninia hanoin. Nia mós presiza ema neʼebé hanoin nia no konsola nia. Tuir loloos ninia kolega naʼin-tolu neʼe presiza atu halo nuneʼe maibé sira hakanek fali ninia laran. Ita mós iha esperiénsia hanesan neʼe ka lae? Ita-nia kolega halo Ita laran-kanek ka lae? Ita sei buka-hatene oinsá mak Jeová ajuda Job no saida mak Job halo. Hodi halo nuneʼe, ita bele aprende lisaun importante husi istória neʼe no halo ita fiar metin liután ba Jeová.

 Buat neʼebé livru Job konta tuirmai karik halo ita hakfodak. Tuir loloos iha tan mane joven ida neʼebé rona ho nonook bainhira Job ho kolega naʼin-tolu neʼe debate hela. Mane joven neʼe nia naran mak Eliú, no nia la kontente ho buat neʼebé sira koʼalia ba malu.

 Eliú hirus ho Job nia liafuan tanba Job “koko atu prova katak ninia hahalok mak loos liu fali Maromak”. Maski nuneʼe, Eliú hanoin Job nia situasaun hodi haree ninia terus no ninia hakaʼas an atu halo buat neʼebé loos. Job presiza duni ema seluk atu fó konsellu ho laran-diʼak no fó kmaan ba nia. Ita komprende katak Eliú labele tahan tan kolega falsu naʼin-tolu nia liafuan! Sira koʼalia buat neʼebé hakanek Job, koko atu estraga Job nia fiar, ninia dignidade, no ninia laran-metin. No aat liután sira mós dehan katak Maromak laran-aat. Eliú sente katak nia presiza duni atu koʼalia ba sira.—Job 32:2-4, 18.

 Eliú dehan: “Haʼu mak tinan kiʼik liu no imi mak tinan boot. Tan neʼe mak haʼu nonook deʼit hodi hatudu respeitu ba imi, no haʼu la brani atu fó-hatene ba imi buat neʼebé haʼu hatene.” Maibé nia labele nonook tan. Nia kontinua dehan: “Laʼós tan deʼit tinan boot mak halo ema sai matenek, no mós laʼós katak katuas sira deʼit mak bele komprende buat loos.” (Job 32:6, 9) Tuirmai, Eliú koʼalia kleur no hatudu katak ninia liafuan neʼe mak loos. Nia koʼalia ba Job iha dalan neʼebé la hanesan ho Elifaz, Bildad, no Zofar neʼebé la hatudu respeitu ba Job. Eliú koʼalia ba Job katak nia sei la koʼalia hodi hatún ka hamoe nia. Eliú hatudu respeitu ba Job hodi temi ninia naran. a Nia dehan: “Agora, Job, favór ida rona lai haʼu-nia liafuan.”—Job 33:1, 7; 34:7.

 Eliú fó konsellu ba Job hodi dehan: “Haʼu rona ona Ita koʼalia, . . . ‘Haʼu mak laran-moos, la iha sala ida, haʼu mak moos, la halo sala ida. Maibé Maromak buka razaun oioin hodi kontra haʼu.’” Eliú temi kedas problema nia hun hodi husu: “Ita fiar an duni katak Ita mak loos ka? Toʼo Ita dehan: ‘Haʼu mak loos liu fali Maromak.’” Eliú lakohi Job atu kontinua hanoin sala hanesan neʼe. Entaun nia dehan: “Ita-nia liafuan sira-neʼe mak la loos.” (Job 33:8-12; 35:2) Eliú hatene katak Job sente hirus tebes tanba nia lakon buat hotu, no kolega naʼin-tolu neʼe koʼalia aat hasoru nia maski loloos sira presiza fó kmaan ba nia. Maibé Eliú fó-hanoin ba Job hodi dehan: “Kuidadu bá, labele husik Ita-nia hirus sai fali odi.”—Job 36:18.

 Eliú esplika katak Maromak Jeová mak sempre loos. Ho liafuan simples no klaru, Eliú esplika lia-loos importante: “Maromak neʼebé loos nunka halo buat neʼebé aat, Ida neʼebé Kbiit Boot Liu Hotu nunka halo sala! . . . Ida neʼebé Kbiit Boot Liu Hotu sempre halo tuir justisa.” (Job 34:10, 12) Eliú ajuda Job atu komprende katak Jeová mak Maromak neʼebé hatudu justisa ho laran-sadiʼa. Porezemplu, maski Job koʼalia liafuan arbiru neʼebé la hatudu respeitu ba Jeová, maibé Jeová la fó kastigu kedas ba nia. (Job 35:13-15) Eliú mós nafatin haraik an no la finje katak nia komprende buat hotu kona-ba Maromak. Nia dehan: “Maromak boot tebes toʼo ita labele hatene.”—Job 36:26.

 Maski Eliú fó konsellu ba Job, nia mós hatudu laran-diʼak ba Job. Nia koʼalia esperansa neʼebé furak katak loron ida Jeová sei kura Job nia moras. Maromak sei dehan ba ninia atan neʼebé laran-metin: “Husik ninia isin sai forte liu fali tempu joven nian, husik nia fila fali ba loron sira neʼebé nia sei iha forsa joven nian.” Eliú mós hatudu laran-diʼak ba Job iha dalan seluk tan. Nia laʼós deʼit fó konsellu ba Job, maibé nia mós hakarak rona buat neʼebé Job hatete. Eliú dehan: “Koʼalia bá, tanba haʼu hakarak hatudu katak Ita mak loos.” (Job 33:25, 32) Maibé Job la hatán. Karik nia sente la presiza koʼalia atu defende an tanba Eliú nia konsellu mak laran-diʼak tebes no anima nia. Karik Job tanis tanba sente kmaan.

 Ita bele aprende lisaun importante husi Eliú no Job. Eliú nia ezemplu hanorin ita oinsá mak bele fó konsellu no kmaan ba ema neʼebé presiza ajuda. Belun neʼebé diʼak la dada an atu fó avizu ba ninia maluk se nia iha fraku neʼebé bele lori problema. (Provérbios 27:6) Ita hakarak sai belun hanesan neʼe. Ita hakarak fó konsola no hatudu laran-diʼak ba ita-nia maluk neʼebé presiza ajuda maski dala ruma sira koʼalia liafuan arbiru tanba estrese demais. Kuandu ita hetan konsellu, ita bele halo tuir Job nia ezemplu atu rona ba konsellu ho haraik an. Ita hotu presiza konsellu no matadalan. Se ita hakarak simu konsellu, neʼe bele salva ita-nia moris.—Provérbios 4:13.

 Bainhira Eliú koʼalia, nia temi beibeik kona-ba anin, kalohan, no rai-tarutu. Nia hatete: ‘Rona didiʼak ba Jeová nia lian neʼebé tarutu makaʼas.’ Depois Eliú mós koʼalia kona-ba “anin-fuik”. (Job 37:2, 9) Parese iha tempu neʼebé Eliú koʼalia ba Job, anin-fuik komesa sai makaʼas. Lakleur anin neʼe sai makaʼas liután. Ikusmai buat ruma akontese neʼebé halo sira hakfodak liu. Jeová koʼalia husi anin-fuik laran!—Job 38:1.

 Ita sente kmaan tebes atu lee kapítulu sira husi livru Job neʼebé fó sai Jeová nia liafuan ba Job. Hanesan anin-fuik neʼebé halakon foʼer hotu, Jeová nia liafuan bele halakon liafuan la loos hotu neʼebé Elifaz, Bildad, no Zofar koʼalia. Loloos Jeová koʼalia uluk ba Job no la koʼalia ba sira naʼin-tolu. Agora Jeová hakarak koʼalia deʼit ba ninia atan Job hodi fó konsellu ho domin ba nia, hanesan aman neʼebé fó konsellu ba ninia oan ho domin.

 Jeová komprende Job nia terus. Nia hanoin tebes Job, hanesan nia sempre hanoin ninia atan sira kuandu sira hetan susar. (Isaias 63:9; Zacarias 2:8) Maibé nia mós hatene katak Job “koʼalia la ho matenek”, tan neʼe ninia situasaun sai susar liután. Entaun Jeová korrije Job hodi husu pergunta barak atu nia bele hanoin didiʼak. Jeová husu: “Ó iha neʼebé bainhira haʼu halo mundu? Fó-hatene mai haʼu se ó hanoin ó hatene duni.” Bainhira Jeová kria “fitun dadeer nian hotu”, anju sira “hahú hasai lian hodi hahiʼi Maromak” tanba buat furak sira neʼebé nia kria. (Job 38:2, 4, 7) Job la hatene buat ida kona-ba neʼe.

 Tuirmai, Jeová koʼalia kona-ba ninia kriasaun. Jeová fó esplikasaun simples ba Job kona-ba buat neʼebé ohin loron ita hatene nuʼudar siénsia naturais, hanesan astronomia, biolojia, jeolojia, no fízika. Jeová mós koʼalia kona-ba animál barak hanesan leaun, manu-metan, bibi-timur foho nian, kuda-burru fuik, karau-aman fuik, manu-avestrús, kuda, manu-falkaun, manu-makikit, Behemot (karik ipopótamu), no ikusmai leviatan (karik lafaek). Imajina toʼok, Job hetan priviléjiu atu tuir klase siénsia naturais no ninia mestre mak Kriadór ba universu! b

 Tanbasá mak Jeová hanorin iha dalan hanesan neʼe? Jeová hakarak Job atu haraik an. Job muramura tanba nia hanoin katak Jeová mak hamosu susar oioin ba nia, maibé neʼe aumenta deʼit ninia terus tanba halo fraku ninia relasaun ho Jeová. Entaun Jeová husu beibeik pergunta ba Job: Bainhira Jeová kria buat oioin neʼebé furak, Job iha neʼebé? Job bele fó-han no tau matan ba animál sira neʼebé Maromak kria ka lae? Se Job la komprende buat ida kona-ba kriasaun sira-neʼe, oinsá mak nia bele tesi-lia ba Kriadór? Jeová nia hanoin no hahalok mak aas liu Job nian, loos ka lae?

 Buat hotu neʼebé Jeová koʼalia hatudu katak loloos nia hadomi tebes Job. Neʼe hanesan Jeová dehan: ‘Haʼu-nia oan, haʼu kria no tau matan ba buat sira-neʼe hotu. Tanbasá mak ó hanoin katak haʼu labele tau matan ba ó? Ó hanoin katak Apá ho neon husik hela ó, halakon ó-nia oan sira, estraga ó-nia futuru no ó-nia saúde ka? Apá bele kura ó-nia laran-susar no fó fali buat hotu neʼebé ó lakon tiha ona, loos ka lae?’

 Job hatán dala rua deʼit ba Jeová nia pergunta. Job la buka razaun oioin atu hatudu katak nia mak loos. Nia ho haraik an rekoñese katak tuir loloos iha buat barak neʼebé nia seidauk hatene. Nia mós arrepende ninia liafuan sira. (Job 40:4, 5; 42:1-6) Job nia fiar mak ezemplu kapás tebes mai ita. Maski hetan terus boot oioin, nia nafatin tau fiar metin ba Jeová no prontu atu simu Jeová nia konsellu. Ita mós bele husu ba Ita-nia an: “Haʼu haraik an hodi prontu atu simu konsellu ka lae?” Ita hotu presiza hetan ajuda hanesan neʼe. Kuandu ita simu ho laran, ita banati-tuir Job nia fiar.

 Agora Jeová halo buat ruma atu fó kmaan ba Job. Jeová dehan ba Elifaz, neʼebé idade boot liu husi kolega falsu naʼin-tolu nia leet: “Haʼu hirus makaʼas hasoru ó ho ó-nia kolega naʼin-rua, tanba imi la koʼalia buat loos kona-ba haʼu hanesan haʼu-nia atan Job koʼalia.” (Job 42:7) Hanoin toʼok liafuan neʼe. Jeová la dehan katak buat hotu neʼebé kolega naʼin-tolu neʼe koʼalia mak sala no buat hotu neʼebé Job dehan mak loos. c Maski nuneʼe, Job ho mane naʼin-tolu neʼe iha diferensa boot. Kolega falsu sira akuza Job ho razaun la loos, no neʼe halo Job triste, laran-susar no ikusmai nia koʼalia arbiru. Maibé, Elifaz no ninia kolega naʼin-rua la hasoru susar hanesan Job hasoru, maski nuneʼe sira ho neon koʼalia buat neʼebé aat tebes ho foti an, tanba sira-nia fiar fraku. Buat neʼebé sira koʼalia laʼós ataka deʼit Job, maibé aat liután, hatún Maromak hodi dehan katak Maromak mak laran-aat!

 Entaun, ita komprende tanbasá mak Jeová haruka mane naʼin-tolu neʼe atu fó sakrifísiu neʼebé folin-boot. Sira tenke fó karau-aman hitu no bibi-malae aman hitu nuʼudar sakrifísiu. Liutiha tempu balu, Moisés nia Ukun-Fuan fó sai katak se amlulik boot ida halo sala no halo povu tomak hetan sala, nia tenke hasaʼe karau-aman ida nuʼudar sakrifísiu sala nian. (Levítico 4:3) Tuir Moisés nia Ukun-Fuan, karau-aman mak animál neʼebé folin-boot liu atu hasaʼe nuʼudar sakrifísiu. Laʼós neʼe deʼit, Jeová dehan katak nia sei simu sakrifísiu neʼe só deʼit se Job harohan ba nia hodi husu ninia laran-sadiʼa ba sira. d (Job 42:8) Ita fiar katak neʼe halo Job sente kmaan tanba Jeová halo moos Job nia naran no lori justisa!

 Jeová fiar katak Job sei halo buat neʼebé nia husu hodi perdua mane naʼin-tolu neʼebé hakanek ninia laran. No Job halo nuneʼe duni. (Job 42:9) Job hatudu katak nia laran-metin duni ba Maromak Jeová liuhusi ninia hahalok, laʼós deʼit ho liafuan. No tanba Job halo tuir, Jeová haraik bensaun barak ba nia.

 Jeová hatudu “domin neʼebé boot tebes no laran-sadiʼa” ba Job. (Tiago 5:11) Oinsá? Jeová halo Job hetan fali saúde diʼak. Imajina toʼok Job sente oinsá bainhira nia rekoñese katak ninia isin “sai forte liu fali tempu joven” hanesan Eliú hatete nanis! Ikusmai Job nia família no kolega sira hakbesik fali ba Job hodi apoia no fó prezente ba nia. Jeová fó rikusoin barak ba Job, barak liu dala rua kompara ho uluk. Maibé oinsá ho Job nia sentimentu triste tanba ninia oan hotu mate? Maski Job no ninia feen hanoin tebes sira-nia oan naʼin-sanulu neʼebé mate ona, maibé sira sente haksolok fali bainhira sira hetan bensaun hodi iha oan naʼin-10 tan! Jeová mós halo Job moris naruk. Job moris tinan 140 tan. Entaun nia bele haree ninia bei-oan sira toʼo jerasaun haat. Bíblia dehan: “Job moris naruk, haksolok ho ninia moris, no ikusmai nia mate.” (Job 42:10-17) Iha mundu foun, Job no ninia feen sei hamutuk fali ho sira-nia família hotu, neʼe inklui sira-nia oan naʼin-10 neʼebé Satanás mak oho.—João 5:28, 29.

 Tanbasá mak Jeová haraik bensaun furak hanesan neʼe ba Job? Bíblia dehan: “Imi rona ona oinsá Job tahan terus toʼo rohan.” (Tiago 5:11) Terus oioin neʼebé Job tahan mak buat neʼebé susar ba ita atu imajina. Husi liafuan “tahan”, ita bele aprende katak Job laʼós deʼit hasoru terus no liu ida-neʼe. Nia tahan duni terus oioin hodi mantein nafatin ninia fiar no domin ba Jeová. Duké hirus no odi ema neʼebé hakanek nia ho neon, Job prontu atu fó perdua ba sira. Job la lakon ninia esperansa no laran-metin nafatin ba Maromak maski hasoru susar naran deʼit.—Job 27:5.

 Ita hotu presiza tahan terus. Ita hatene katak Satanás sei koko atu halo ita laran-kraik, hanesan nia halo ona ba Job. Maibé se ita tahan ho fiar, haraik an nafatin, prontu atu fó perdua, no laran-metin nafatin ba Maromak, ita mós bele iha esperansa neʼebé furak. (Ebreu 10:36) Mai ita banati-tuir Job nia fiar. Kuandu ita halo nuneʼe, Satanás sei sai hirus tebes, maibé Jeová neʼebé nakonu ho domin sei kontente tebes ho ita.