Bíblia la fó sai ho espesífiku Jesus Kristu nia data moris, hanesan ho buat neʼebé referénsia balu hatete:

•   “Ita la hatene Kristu nia data moris.”—New Catholic Encyclopedia.

•   “Ita la hatene ho loloos Kristu nia data moris.”—Encyclopedia of Early Christianity.

 Maski Bíblia la fó resposta neʼebé klaru ba pergunta: ‘Bainhira mak Jesus moris?’ maibé Bíblia esplika akontesimentu rua neʼebé liga ho loron neʼebé Jesus moris no neʼe halo ema barak fiar katak Jesus la moris iha data 25 Dezembru.

Laʼós iha tempu malirin a

1.   Tempu tau naran. Lakleur antes Jesus moris, César Augusto fó sai mandamentu ida atu “ema hotu iha mundu tomak bá tau naran”. Ema ida-idak tenke bá tau naran iha “sira ida-idak nia sidade”. Atu halo nuneʼe, dala ruma sira presiza halo viajen ba semana ida ka liu. (Lucas 2:1-3) Mandamentu neʼe karik iha ligasaun ho taxa ka tropa sira, no povu la gosta ida-neʼe. Tan neʼe, klaru katak César Augusto sei la obriga povu atu laʼo dook durante tempu malirin tanba neʼe bele halo povu sai hirus liután.

2.   Bibi-lubun. “Bibi-atan balu hein hela sira-nia bibi-lubun iha rai-luan durante kalan tomak.” (Lucas 2:8) Livru ida (Daily Life in the Time of Jesus) hatete katak bibi-atan sira hein sira-nia bibi-lubun iha rai-luan durante “semana ida antes Páskua [iha fulan-Marsu nia rohan]” toʼo fulan-Novembru nia klaran. Livru neʼe hatutan tan: “Durante tempu malirin, sira hein iha fatin mahon, hodi hetan protesaun husi klima malirin. Ida-neʼe hatudu katak data ba Natál neʼebé monu iha tempu malirin mak la loos, tanba Evanjellu sira hatete katak bibi-atan sira hein bibi-lubun iha rai-luan.”

Tempu outonu foin hahú b

 Ita bele kalkula kona-ba tempu neʼebé Jesus moris hodi sura ba kotuk hahú husi tempu neʼebé Jesus mate iha tempu Páskua, 14 Nisan tinan 33 EC. (João 19:14-16) Bainhira Jesus komesa ninia serbisu haklaken durante tinan tolu ho balu, nia maizumenus tinan 30, entaun neʼe katak karik nia moris iha tempu outonu foin hahú iha tinan 2 AEC.—Lucas 3:23.

 Se la iha evidénsia katak Jesus moris iha data 25 Dezembru, tanbasá mak ema selebra Natál iha data neʼe? Livru ida (Encyclopædia Britannica) hatete katak karik ulun-naʼin sira iha igreja mak hili data neʼe “atu liga ho festa neʼebé ema jentiu Roma sira halo atu selebra ‘loro-matan nia moris’”. Iha data neʼe, loron mak badak liu se kompara ho kalan. Tuir livru ida (The Encyclopedia Americana), matenek-naʼin barak fiar katak ulun-naʼin sira halo nuneʼe atu “halo kontente ema jentiu sira neʼebé sai ema Kristaun”.