Oinsá mak ita bele ‘hatudu respeitu ba ita-nia inan no aman’?

LOKE

Bíblia nia resposta

Mandamentu atu “hatudu respeitu ba imi-nia inan-aman” mosu beibeik iha Bíblia laran. (Éxodo 20:12; Deuteronómio 5:16; Mateus 15:4; Éfeso 6:2, 3) Hatudu respeitu ba inan-aman envolve buat haat tuirmai.

Hafolin sira. Ita hatudu respeitu ba Ita-nia inan-aman kuandu Ita hatudu katak Ita agradese ba buat hotu neʼebé sira halo ona. Ita bele hatudu agradese ba sira hodi hafolin sira-nia mandamentu hotu. (Provérbios 7:1, 2; 23:26) Bíblia anima Ita atu haree Ita-nia inan-aman nuʼudar buat neʼebé lori “naran diʼak” ba Ita, neʼe katak Ita orgullu tanba sira mak Ita-nia inan-aman.—Provérbios 17:6.
Rekoñese sira-nia autoridade. Ita hatudu respeitu ba Ita-nia inan-aman, liuliu bainhira Ita sei kiʼik, hodi rekoñese katak Ita-nia inan-aman simu autoridade husi Maromak. Koloso 3:20 hatete ba labarik sira: “Halo tuir imi-nia inan-aman iha buat hotu, tanba ida-neʼe halo Naʼi kontente tebes.” Bainhira Jesus sei labarik, nia mós sempre prontu atu halo tuir ninia inan-aman.—Lucas 2:51.
Hatudu respeitu ba sira. (Levítico 19:3; Ebreu 12:9) Atu halo ida-neʼe, Ita presiza kuidadu ho Ita-nia liafuan no mós dalan neʼebé Ita koʼalia. Dala ruma susar atu hatudu respeitu ba inan-aman, karik tanba sira-nia hahalok ladún diʼak. Maski nuneʼe, oan sira nafatin hatudu respeitu ba sira-nia inan-aman hodi koʼalia iha dalan neʼebé diʼak ba sira. (Provérbios 30:17) Bíblia hanorin katak koʼalia aat inan-aman mak sala neʼebé sériu tebes.—Mateus 15:4.
Tau matan sira. Bainhira inan-aman nia idade aumenta, sira presiza ajuda. Ita bele hatudu respeitu ba sira hodi hakaʼas as atu tau matan ba sira no fó buat neʼebé sira presiza. (1 Timóteo 5:4, 8) Porezemplu, antes Jesus mate nia husu ema seluk hodi tau matan ninia inan.—João 19:25-27.

Hanoin neʼebé sala kona-ba hatudu respeitu ba inan-aman

Hanoin neʼebé sala: Atu hatudu respeitu ba inan-aman, Ita presiza husik sira atu kontrola Ita-nia moris kaben nian.

Hanoin neʼebé loos: Bíblia hanorin katak moris kaben nian mak importante liu fali relasaun sira seluk. Génesis 2:24 hatete: “Mane ida sei husik ninia inan-aman no nia sei hela hamutuk ho ninia feen.” (Mateus 19:4, 5) Kaben-naʼin sira bele hetan duni benefísiu bainhira rona ba inan-aman nia matadalan sira. (Provérbios 23:22) Maibé kaben-naʼin sira presiza deside nanis bainhira mak sira-nia inan-aman bele fó matadalan.—Mateus 19:6.

Hanoin neʼebé sala: Ita tenke halo tuir buat hotu neʼebé inan-aman haruka Ita atu halo.

Hanoin neʼebé loos: Maski Maromak fó autoridade ba inan-aman iha umakain ida, maibé Maromak nia autoridade mak boot liu. Porezemplu, bainhira tribunál ida haruka Jesus nia dixípulu sira atu la halo tuir Maromak, sira hatán: “Ami tenke halo tuir Maromak nuʼudar ukun-naʼin duké halo tuir ema.” (Apóstolu 5:27-29) Nuneʼe mós ho labarik sira, sira presiza halo tuir sira-nia inan-aman “hodi tuir Naʼi nia hakarak”, neʼe katak Ita presiza halo tuir se neʼe la kontra Maromak nia ukun-fuan sira.—Éfeso 6:1.

Hanoin neʼebé sala: Atu hatudu respeitu ba Ita-nia inan-aman, Ita presiza iha fiar hanesan ho sira.

Hanoin neʼebé loos: Bíblia anima Ita atu koko Ita-nia fiar atu haree buat neʼebé Ita fiar mak loos ka lae. (Apóstolu 17:11; 1 João 4:1) Karik ema neʼebé halo hanesan neʼe ikusmai sei iha fiar neʼebé la hanesan ho ninia inan-aman. Bíblia temi fiar-naʼin barak neʼebé la tuir sira-nia inan-aman nia relijiaun, neʼe inklui Abraão, Rute no apóstolu Paulo.—Josué 24:2, 14, 15; Rute 1:15, 16; Galásia 1:14-16, 22-24.

Hanoin neʼebé sala: Atu hatudu respeitu ba Ita-nia inan-aman, Ita presiza halo tuir sira-nia lisan.

Hanoin neʼebé loos: Bíblia hatete: “Imi tenke adora Jeová, imi-nia Maromak, no ba nia deʼit mak imi tenke halo serbisu sagradu.” (Lucas 4:8) Ema neʼebé adora ninia beiʼala sira la halo Maromak kontente. Laʼós neʼe deʼit, Bíblia hanorin katak “ema neʼebé mate ona la hatene buat ida”. Sira la hatene katak ita adora sira, no sira mós labele ajuda ita ka halo aat ba ita.—Eclesiastes 9:5, 10; Isaias 8:19.