Bíblia nunka temi kona-ba hena-liñu Turín nian. Ema barak hanoin katak hena-liñu Turín mak hena neʼebé ema uza atu falun Jesus Kristu nia mate-isin. Tan neʼe, relijiaun Kristaun oioin haree hena-liñu neʼe nuʼudar buat neʼebé lulik tebes. Ohin loron, hena-liñu neʼe rai ho seguru iha kaixa vidru ida nia laran iha katedrál iha sidade Turín, rai-Itália.

 Bíblia apoia ideia katak Jesus nia mate-isin falun ho hena-liñu Turín nian ka lae? Lae.

 Hanoin toʼok razaun tolu neʼebé bazeia ba Bíblia.

1.   Hena-liñu Turín nian mak hena ida deʼit neʼebé naruk sentímetru 442 no luan sentímetru 113. Tuirmai iha hena nia ninin, suku ho luan sentímetru ualu iha sorin neʼebé naruk.

    Bíblia dehan saida: Jesus nia mate-isin laʼós falun ho hena ida deʼit, maibé ho hena balu. Ninia ulun mós bobar ho hena seluk. Depois Jesus moris-hiʼas, apóstolu ida bá Jesus nia rate neʼebé mamuk ona no nia “haree hena-liñu sira neʼebé latan hela”. Bíblia mós dehan: “Hena neʼebé uluk kesi iha Jesus nia ulun la tau hamutuk ho hena sira seluk, maibé lulun tiha hodi tau ketak.”​—João 20:6, 7.

2.   Hena-liñu Turín nian iha noda neʼebé ema hanoin nuʼudar noda raan husi Jesus nia mate-isin neʼebé la fó-hariis.

    Bíblia dehan saida: Kuandu Jesus mate, ninia dixípulu sira prepara ninia mate-isin “tuir ema Judeu sira-nia toman kona-ba prepara mate-isin atu hakoi”. (João 19:39-42) Toman neʼe inklui fó-hariis mate-isin no tau mina-morin no buat morin sira antes hakoi mate-isin. (Mateus 26:12; Apóstolu 9:37) Klaru katak Jesus nia dixípulu sira fó-hariis ba ninia mate-isin antes sira falun nia ho hena sira.

3.   Hena-liñu Turín nian hatudu mane nia isin-lolon “neʼebé toba latan iha hena-liñu parte sorin no hena parte seluk taka mate-isin nia oin husi ulun toʼo ain” tuir esplikasaun husi Encyclopædia Britannica.

    Bíblia dehan saida: Jesus nia dixípulu sira koʼalia kona-ba Jesus nia mate, ninia rate neʼebé mamuk, no mós feto balu neʼebé “haree anju sira neʼebé fó-hatene katak nia moris hiʼas ona”. (Lucas 24:15-24) Se iha tempu neʼebá hena-liñu Turín nian iha Jesus nia rate laran, dixípulu sira sei koʼalia kona-ba neʼe no mós kona-ba buat neʼebé sira haree iha hena neʼe. Maibé, Bíblia la temi buat ida neʼebé hatudu katak dixípulu sira koʼalia kona-ba neʼe.

 Lae. Maski karik hena-liñu Turín nian neʼe uza duni atu falun Jesus nia mate-isin, sala atu adora ida-neʼe. Hanoin toʼok Bíblia nia prinsípiu balu tuirmai.

1.   La presiza adora ida-neʼe. Jesus esplika: “Maromak mak Espíritu, no sira neʼebé adora nia tenke adora tuir espíritu no lia-loos.” (João 4:24) Adorasaun neʼebé loos la presiza uza estátua ka sasán ruma neʼebé ema hanoin mak lulik.

2.   Maromak bandu ida-neʼe. Ukun-Fuan Sanulu bandu atu adora estátua. (Deuteronómio 5:6-10) Bíblia mós haruka ema Kristaun atu “hadook an husi estátua”. (1 João 5:21) Ema balu karik hanoin katak hena-liñu Turín nian laʼós estátua. Karik sira haree ida-neʼe nuʼudar buat neʼebé sagradu ka reprezenta sira-nia fiar. Maski nuneʼe, buat neʼebé ema haree nuʼudar símbolu deʼit, bele sai fali nuʼudar ídolu se sira adora ida-neʼe. a Tan neʼe, se ema ida hakarak halo Maromak kontente, nia sei la adora buat naran deʼit, inklui mós hena-liñu Turín nian.