Bíblia esplika kona-ba Jesus: “Ema oho nia iha isin, maibé Maromak halo nia moris fali nuʼudar espíritu.”​—1 Pedro 3:18; Apóstolu 13:34; 1 Korinto 15:45; 2 Korinto 5:16.

 Jesus nia liafuan mós hatudu katak nia sei la hetan moris-hiʼas nuʼudar ema neʼebé iha isin no raan. Jesus dehan katak nia sei fó ninia “isin atu fó moris ba mundu” nuʼudar sakrifísiu ba ema barak. (João 6:51; Mateus 20:28) Se nia hetan moris-hiʼas ho isin hanesan ema, sakrifísiu neʼe sei la vale. Maibé neʼe la akontese tanba Bíblia dehan katak Jesus hasaʼe nia isin no raan nuʼudar sakrifísiu “dala ida deʼit ba nafatin”.—Ebreu 9:11, 12.

Se Jesus moris fali ho isin espíritu, oinsá mak ninia dixípulu sira bele haree nia?

•  Kriatura espíritu sira bele nakfila an sai fali ema. Porezemplu, iha tempu uluk anju sira halo ida-neʼe hodi han no hemu hamutuk ho ema. (Génesis 18:1-8; 19:1-3) Maibé, sira nafatin kriatura espíritu no bele saʼe fali ba lalehan.​—Juís 13:15-21.

•  Bainhira Jesus moris hiʼas, nia mós uza isin nuʼudar ema ba tempu uitoan, hanesan anju sira uluk halo. Maibé, nuʼudar kriatura espíritu, nia bele mosu no lakon derrepente deʼit. (Lucas 24:31; João 20:19, 26) Jesus mosu nuʼudar ema neʼebé la hanesan. Tan neʼe Jesus nia belun sira la rekoñese nia, só deʼit kuandu sira rona ninia liafuan ka haree buat neʼebé nia halo.​—Lucas 24:30, 31, 35; João 20:14-16; 21:6, 7.

•  Kuandu Jesus mosu ba apóstolu Tomé, nia uza isin ho fitar. Nia halo ida-neʼe atu hametin Tomé nia fiar, tanba Tomé duvida katak Jesus moris hiʼas ona.​—João 20:24-29.