Maski Bíblia la temi kona-ba Jesus kaben ka lae, maibé Bíblia hatudu ho klaru katak Jesus nunka kaben. a Hanoin toʼok kona-ba pontu sira tuirmai.

1.   Bíblia temi beibeik kona-ba Jesus nia família, feto sira neʼebé hamaluk nia kuandu nia haklaken no mós feto sira neʼebé hamriik besik nia kuandu nia mate. Maibé Bíblia nunka temi katak Jesus iha feen. (Mateus 12:46, 47; Marcos 3:31, 32; 15:40; Lucas 8:2, 3, 19, 20; João 19:25) Ita bele fiar katak razaun tanbasá Bíblia nunka temi kona-ba neʼe mak tanba Jesus nunka kaben.

2.   Jesus koʼalia ba ninia dixípulu sira kona-ba ema sira neʼebé hakarak klosan nafatin no uza tempu barak liután atu serbí Maromak. Nia hatete ba sira: “Ema neʼebé hakarak moris hodi la kaben, halo nuneʼe bá.” (Mateus 19:10-12) Jesus sai nuʼudar ezemplu ba ema sira neʼebé hakarak klosan nafatin hodi bele aumenta sira-nia serbisu ba Maromak.​—João 13:15; 1 Korinto 7:32-38.

3.   Bainhira Jesus besik atu mate, nia halo arranju atu ema tau matan ba ninia inan. (João 19:25-27) Se Jesus mak iha feen no mós oan, iha tempu neʼebá, nia mós sei halo arranju atu ema tau matan ba sira.

4.   Bíblia temi katak Jesus mak ezemplu diʼak ba laʼen sira. Maibé Bíblia nunka temi katak Jesus iha feen no mós la temi kona-ba oinsá Jesus tau matan ba feen ida. Duké halo nuneʼe, Bíblia hatete: “Laʼen sira, kontinua hadomi imi-nia feen, hanesan Kristu mós hadomi kongregasaun no fó ninia moris ba kongregasaun.” (Éfeso 5:25) Ita bele fiar katak se Jesus mak kaben duni bainhira nia iha rai, Bíblia sei temi ninia ezemplu neʼebé perfeitu kona-ba neʼe.

 Sin, ita bele fiar katak Jesus iha alin naʼin-neen ka liu, neʼe inklui ninia alin-mane sira naran Tiago, José, Simão no Judas, no mós alin-feto naʼin-rua. (Mateus 13:54-56; Marcos 6:3) Jesus nia alin sira mak Maria no José nia oan sira. (Mateus 1:25) Bíblia bolu Jesus nuʼudar Maria nia “oan primeiru”, neʼe hatudu katak Maria mós iha oan seluk tan.​—Lucas 2:7

 Atu bele apoia ideia katak Maria mak virjen nafatin durante ninia moris tomak, ema balu dehan katak liafuan “maun-alin sira” iha signifikadu seluk. Porezemplu, ema balu hanoin katak Jesus iha maun sira no sira mak José nia oan-mane husi feen seluk. Maibé Bíblia hatudu katak Jesus mak iha diretu legál atu simu liman-rohan hodi sai nuʼudar liurai iha David nia liña jerasaun. (2 Samuel 7:12, 13; Lucas 1:32) Se José iha duni oan-mane sira neʼebé idade boot liu Jesus, loloos oan-mane sira-neʼe mak sei iha diretu legál neʼe.

 Liafuan “maun-alin sira” bele refere ba Jesus nia dixípulu sira ka maun-alin espirituál ka lae? Ideia neʼe kontra malu ho Bíblia, tanba Bíblia hatete katak Jesus nia “alin sira la hatudu fiar ba nia”. (João 7:5) Bíblia hatudu katak Jesus nia alin sira no Jesus nia dixípulu sira mak la hanesan.​—João 2:12

 Ema seluk tan dehan katak Jesus nia maun-alin sira mak ninia primu sira. Maibé Eskritura Lian Gregu iha liafuan espesífiku ba “maun-alin”, “família” no “primu”. (Lucas 21:16; Koloso 4:10) Matenek-naʼin barak rekoñese katak Jesus nia alin-mane no alin-feto mak ninia alin rasik. Porezemplu, livru ida naran The Expositor’s Bible Commentary hatete: “Dalan diʼak liu atu komprende ‘alin sira’ . . . mak liafuan neʼe refere ba Maria no José nia oan-mane sira no Jesus nia alin sira husi ninia inan.” b