Atu hatene bainhira mak mundu nia rohan sei toʼo mai, ita presiza komprende oinsá Bíblia uza liafuan “mundu”. Liafuan Gregu kósmos neʼebé baibain tradús nuʼudar “mundu”, dala barak refere ba ema, liuliu ema neʼebé la halo tuir Maromak no ninia hakarak. (João 15:18, 19; 2 Pedro 2:5) Dala ruma, kósmos refere ba sosiedade neʼebé inklui sistema komersiál, sistema polítika no relijiaun.​—1 Korinto 7:31; 1 João 2:15, 16. a

Saida mak “mundu nia rohan”?

 Fraze “mundu nia rohan” neʼebé temi iha tradusaun Bíblia barak, bele mós tradús nuʼudar “sistema neʼe nia rohan” ka “mundu neʼe atu hotu”. (Mateus 24:3; Liafuan diak ba imi, segundu edisaun) Neʼe la refere ba halakon planeta mundu ka halakon ema hotu, maibé neʼe refere ba halakon sosiedade neʼebé inklui sistema komersiál, sistema polítika no relijiaun.​—1 João 2:17.

 Bíblia hanorin katak “ema aat sei lakon tiha” atu nuneʼe ema diʼak bele moris ho kontente iha rai. (Salmo 37:9-11) Ema aat sei lakon durante “terus boot,” neʼebé sei remata ho funu Armagedon.​—Mateus 24:21, 22; Apokalipse 16:14, 16.

Bainhira mak mundu nia rohan sei mai?

 Jesus hatete: “Kona-ba loron no oras, ema ida la hatene, anju sira iha lalehan la hatene no Oan-Mane mós la hatene, só Aman deʼit mak hatene.” (Mateus 24:36, 42) Jesus hatutan katak tempu atu halakon mundu neʼe sei mosu derrepente deʼit, “iha oras neʼebé imi la hanoin”.​—Mateus 24:44.

 Maski ita la hatene loron no oras, maibé Jesus fó sai kona-ba sinál ka akontesimentu oioin neʼebé ajuda ita hatene kona-ba tempu antes mundu nia rohan toʼo mai. (Mateus 24:3, 7-14) Bíblia bolu neʼe nuʼudar “tempu nia rohan” no “loron ikus sira”.​—Daniel 12:4; 2 Timóteo 3:1-5.

Saida mak la lakon iha mundu nia rohan?

 Planeta mundu sei nafatin iha tanba Bíblia dehan: “Mundu neʼe sei la muda husi ninia fatin tinan ba tinan ba nafatin.” (Salmo 104:5) No mundu neʼe sei nakonu ho ema, hanesan Bíblia promete ona: “Ema laran-loos sira sei simu rai nuʼudar sira-nian, no sira sei moris ba nafatin iha rai.” (Salmo 37:29) Maromak sei hadiʼa fali mundu hodi tuir ninia hakarak uluk nian:

•   Paraízu.​—Isaias 35:1; Lucas 23:43.

•   Moris seguru no moris diʼak.​—Miqueias 4:4.

•   Ema hotu halo serbisu neʼebé diʼak no lori ksolok.​—Isaias 65:21-23.

•   Livre husi moras no la sai ferik-katuas.​—Job 33:25; Isaias 33:24.