Profesia mak mensajen ida neʼebé mai husi Maromak. Bíblia dehan katak profeta sira “koʼalia liafuan husi Maromak tanba espíritu santu book sira atu fó sai liafuan sira-neʼe”. (2 Pedro 1:20, 21) Tan neʼe, profeta mak ema ida neʼebé simu Maromak nia mensajen, depois fó sai fali ba ema seluk.​—Apóstolu 3:18.

Oinsá mak profeta sira simu mensajen husi Maromak?

 Maromak uza dalan oioin atu fó sai ninia mensajen ba ninia profeta sira:

•   Liuhusi hakerek. Bíblia fó sai dala ida neʼebé Maromak uza dalan neʼe. Maromak rasik hakerek Ukun-Fuan Sanulu no fó ba Moisés.​—Éxodo 31:18.

•   Liuhusi anju sira. Porezemplu, Maromak uza anju ida atu fó-hatene Moisés kona-ba mensajen neʼebé nia tenke hatoʼo ba Faraó iha Ejitu. (Éxodo 3:2-4, 10) Bainhira Maromak nia liafuan tenke hatoʼo ho loos tuir fraze ba fraze, nia sei haruka ninia anju atu dita, ka koʼalia sai mensajen neʼe. Porezemplu Maromak dehan ba Moisés: “Hakerek liafuan sira-neʼe, tanba haʼu halo aliansa ho ó no ho ema Izraél hodi tuir liafuan sira-neʼe.”​—Éxodo 34:27. a

•   Liuhusi vizaun sira. Dala ruma profeta ida simu vizaun bainhira nia matan-moris hela ka hadeer hela. (Isaias 1:1; Habakuk 1:1) Ema balu hola parte iha vizaun balu tanba haree hanesan tebes. (Lucas 9:28-36; Apokalipse 1:10-17) Dala ruma ema simu vizaun bainhira nia ho kondisaun lakon tiha sentidu balu. b (Apóstolu 10:10, 11; 22:17-21) Maromak mós hatoʼo ninia mensajen ba profeta sira liuhusi mehi kuandu sira toba hela.​—Daniel 7:1; Apóstolu 16:9, 10.

•   Dirije ema nia hanoin. Maromak dirije ninia profeta sira-nia hanoin hodi bele hatoʼo ninia mensajen. Bíblia dehan: “Eskritura hotu mai husi Maromak.” Liafuan “mai husi Maromak” mós bele tradús nuʼudar “Maromak huu iis”. (2 Timóteo 3:16, The Emphasised Bible) Maromak uza ninia espíritu santu, ka ninia forsa, atu hanesan “huu” ninia hanoin ba ninia atan sira-nia neon. Maski mensajen neʼe mak Maromak nian, maibé profeta neʼe bele hatoʼo mensajen neʼe hodi uza ninia liafuan rasik.​—2 Samuel 23:1, 2.

Profesia sempre liga ho buat neʼebé sei akontese iha futuru ka lae?

 Lae, profesia iha Bíblia laʼós sempre koʼalia kona-ba futuru. Maski nuneʼe, dala barak liu, mensajen sira husi Maromak koʼalia kona-ba saida mak sei akontese iha ema nia moris. Porezemplu, Maromak nia profeta sira fó avizu fila-fila ba ema Izraél kona-ba sira-nia hahalok aat. Avizu sira-neʼe koʼalia kona-ba bensaun neʼebé povu sei hetan se sira halo tuir avizu neʼe, no mós terus neʼebé sei kona sira se sira lakohi halo tuir. (Jeremias 25:4-6) Saida mak sei akontese depende ba desizaun neʼebé ema Izraél hili.​—Deuteronómio 30:19, 20.

Ezemplu balu kona-ba profesia neʼebé la koʼalia kona-ba futuru

•   Dala ida, bainhira ema Izraél husu ajuda husi Maromak, Maromak haruka profeta ba sira atu esplika katak, tanba sira lakohi rona ba Maromak, Maromak la ajuda sira.​—Juís 6:6-10.

•   Bainhira Jesus koʼalia ba feto Samaria ida, nia fó sai buat balu kona-ba feto neʼe nia pasadu neʼebé nia bele hatene tan deʼit ho Maromak nia ajuda. Feto neʼe rekoñese Jesus nuʼudar profeta ida, maski Jesus la fó sai buat ida kona-ba futuru.​—João 4:17-19.

•   Bainhira ema kaer Jesus, ninia inimigu sira taka ninia oin, baku nia no dehan: “Se ó mak profeta ida, siʼik toʼok bá! Sé mak baku ó?” Sira la husu Jesus atu siʼik futuru, maibé sira hakarak nia atu identifika, hodi uza kbiit husi Maromak, sé mak baku nia.​—Lucas 22:63, 64.