Ema uza Jesus Kristu nia hanorin atu forma relijiaun “Kristaun” oioin. Maibé Bíblia fó sai katak iha dalan ida deʼit atu halaʼo adorasaun Kristaun neʼebé loos. Haree toʼok razaun tolu tuirmai.

1.   Jesus hatete katak nia hanorin “lia-loos”, no ema Kristaun iha apóstolu sira-nia tempu mós refere ba buat neʼebé sira fiar nuʼudar “lia-loos”. (João 8:32; 2 Pedro 2:2; 2 João 4; 3 João 3) Ida-neʼe hatudu katak se ema ida habelar doutrina neʼebé kontra Jesus nia hanorin, ema neʼe laʼós Kristaun neʼebé loos.

2.   Bíblia hanorin katak ema Kristaun sira “tenke sai laran ida deʼit iha sira-nia koʼalia”. (1 Korinto 1:10) Maibé, relijiaun Kristaun barak la konkorda malu kona-ba hanorin báziku sira, porezemplu ema Kristaun katak sá. Relijiaun hanesan neʼe labele dehan sira halaʼo adorasaun neʼebé loos.​—1 Pedro 2:21.

3.   Jesus fó-hatene nanis katak ema barak sei temi sira-nia an nuʼudar Kristaun, maibé la halo tuir Jesus nia mandamentu sira. Jesus dehan nia sei la simu ema hanesan neʼe. (Mateus 7:21-23; Lucas 6:46) Ema balu la hatene ho loloos saida mak Bíblia hanorin tanba ulun-naʼin relijiaun sira mak lohi sira atu bele hetan lukru. (Mateus 7:15) Maibé iha mós ema neʼebé finje atu sai ema Kristaun tanba gosta rona deʼit buat neʼebé sira hakarak, duké rona ba lia-loos husi Bíblia.​—2 Timóteo 4:3, 4.

 Jesus konta ai-knanoik kona-ba trigu no duʼut aat hodi fó sai nanis katak ema barak sei kontra (apostazia) hasoru adorasaun Kristaun neʼebé loos. (Mateus 13:24-30, 36-43) Ba tempu kleur, susar atu rekoñese Kristaun neʼebé loos no Kristaun neʼebé falsu. Hanesan Jesus fó-hatene nanis, apostazia sei sai barak kuandu apóstolu hotu mate ona. (Apóstolu 20:29, 30) Maski sira iha hanorin oioin, maibé hanorin sira-neʼe “laʼo sees ona husi lia-loos”.​—2 Timóteo 2:18.

 Jesus mós fó-hatene nanis katak ikusmai diferensa entre relijiaun Kristaun neʼebé loos no falsu sai klaru. Ida-neʼe akontese iha ita-nia tempu, durante “mundu neʼe nia rohan”.​—Mateus 13:30, 39.