Primeiru Korinto 1:1-31
1 Husi Paulo, neʼebé Kristu Jesus bolu ona atu sai ninia apóstolu+ liuhusi Maromak nia hakarak, hamutuk ho ita-nia maluk Sóstenes,
2 ami haruka karta neʼe ba Maromak nia kongregasaun* neʼebé iha Korinto,+ hamutuk ho sira hotu neʼebé iha fatin oioin neʼebé bolu ita-nia Naʼi Jesus Kristu nia naran.+ Nia mak sira-nia Naʼi no ita-nian. Maromak haketak* ona imi atu sai ida deʼit ho Kristu Jesus no nia bolu imi atu sai nuʼudar ema santu:*+
3 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak neʼebé boot ba imi no haraik dame ba imi.
4 Haʼu sempre fó obrigadu ba haʼu-nia Maromak tanba Maromak hatudu ninia laran-diʼak neʼebé boot ba imi iha Kristu Jesus,
5 tanba iha Kristu mak imi simu ona buat hotu, neʼe inklui kbiit atu bele koʼalia no koñesimentu neʼebé kompletu.+
6 Imi sai metin ona liuhusi lia-sasin kona-ba Kristu,+
7 tan neʼe mak imi la falta buat ida nuʼudar imi hein namanas ba tempu neʼebé ita-nia Naʼi Jesus Kristu sei hatudu sai ninia kbiit.+
8 Maromak mós sei halo imi metin toʼo rohan, atu nuneʼe la iha ema ida mak iha razaun atu duun imi iha ita-nia Naʼi Jesus Kristu nia loron.+
9 Maromak mak laran-metin+ no nia bolu ona imi atu sai ida deʼit* ho ninia Oan-Mane, Jesus Kristu ita-nia Naʼi.
10 Maun-alin sira, agora haʼu husu imi liuhusi ita-nia Naʼi Jesus Kristu nia naran atu imi hotu tenke sai laran ida deʼit iha imi-nia koʼalia, no imi labele haketak malu,+ maibé imi tenke sai ida deʼit iha imi-nia neon no iha hanoin neʼebé hanesan.+
11 Tanba ema balu husi Kloe nia umakain fó-hatene mai haʼu kona-ba imi, haʼu-nia maun-alin sira, katak imi diskute malu.
12 Haʼu koʼalia nuneʼe tanba imi balu dehan: “Haʼu Paulo nian”, seluk tan dehan: “Haʼu Apolo nian”,+ “Haʼu Cefas* nian”, ka “Haʼu Kristu nian”.
13 Se ida-neʼe loos, neʼe katak Kristu nia kongregasaun haketak malu ona, loos ka lae? Maibé, Paulo la hetan kastigu-mate iha ai-riin tanba imi, loos ka lae? No imi hetan batizmu* iha Paulo nia naran ka?
14 Haʼu fó agradese ba Maromak katak haʼu la fó batizmu ba imi, só Crispo+ no Gaio+ deʼit,
15 atu nuneʼe la iha ema ida mak bele dehan katak imi hetan batizmu iha haʼu-nia naran.
16 Loos duni, haʼu mós fó batizmu ba Estéfanas nia umakain.+ Maibé kona-ba sira seluk, haʼu la hatene se haʼu fó batizmu ba ema ruma tan ka lae.
17 Tanba Kristu haruka haʼu, laʼós atu fó batizmu, maibé atu haklaken liafuan diʼak,+ no laʼós ho matenek-naʼin sira-nia liafuan, atu nuneʼe Kristu nia ai-riin terus nian* la sai folin-laek.
18 Tanba mensajen kona-ba ai-riin terus nian* mak buat beik ba ema sira neʼebé atu lakon,+ maibé ba ita neʼebé hetan daudaun salvasaun, neʼe mak Maromak nia kbiit.+
19 Tanba hakerek nanis ona: “Haʼu sei halakon matenek husi matenek-naʼin sira, no haʼu sei la simu* matenek-naʼin sira-nia hanoin.”+
20 Matenek-naʼin sira iha neʼebé? Eskriba* sira iha neʼebé? Ema neʼebé gosta haksesuk malu iha mundu* neʼe iha neʼebé? Maromak halo matenek mundu neʼe nian sai buat beik, loos ka lae?
21 Mundu nia matenek+ labele ajuda ema hatene Maromak.+ Maibé Maromak uza mensajen neʼebé ita haklaken neʼebé ema seluk haree nuʼudar buat beik+ atu salva sira neʼebé fiar ba mensajen neʼe. Maromak hatudu ninia matenek liuhusi ida-neʼe.
22 Ema Judeu husu sinál+ no ema Gregu buka matenek;
23 maibé ita haklaken kona-ba Kristu neʼebé hetan kastigu-mate iha ai-riin, no ida-neʼe sai fatuk sidi nian ba ema Judeu no sai nuʼudar buat beik ba ema husi nasaun seluk.+
24 Maibé, ba ema Judeu no Gregu neʼebé Maromak bolu ona, sira haree Kristu nuʼudar Maromak nia kbiit no Maromak nia matenek.+
25 Tanba buat neʼebé beik husi Maromak mak matenek liu fali ema, no buat neʼebé fraku husi Maromak mak iha kbiit liu fali ema.+
26 Maun-alin sira, imi rasik bele haree iha imi-nia leet ema neʼebé Maromak bolu ona, katak Maromak la bolu ema barak neʼebé matenek tuir ema nia haree,+ no la bolu ema barak neʼebé iha kbiit, no la bolu mós ema barak neʼebé mai husi liurai nia jerasaun.*+
27 Maibé Maromak hili buat beik husi mundu neʼe, atu hamoe matenek-naʼin sira; no Maromak hili buat fraku husi mundu neʼe, atu hamoe buat sira neʼebé kbiit boot;+
28 no Maromak hili sira neʼebé ema haree nuʼudar folin-laek no sira neʼebé ema hakribi, buat sira neʼebé ema haree la vale, atu nia bele halakon tiha buat sira neʼebé vale,+
29 atu nuneʼe labele iha ema* ida neʼebé gaba an iha Maromak nia oin.
30 Maibé tanba Maromak mak imi sai ida deʼit ho Kristu Jesus. Kristu hatudu sai ona Maromak nia matenek no Maromak nia hahalok loos.+ Liuhusi Jesus mak ita bele sai santu,+ no liuhusi ninia mate atu sosa fali ita mak ita bele sai livre.+
31 Tan neʼe, hanesan hakerek nanis ona: “Ema labele gaba an, nia tenke gaba deʼit Jeová.”*+
Nota-rodapé
^ Ka “halo santu”. Haree “Halo santu” iha Glosáriu.
^ Haree “Ema santu” iha Glosáriu.
^ Ka “atu akompaña”.
^ Ninia naran seluk mak Pedro.
^ Ka “sei soe tiha”.
^ Neʼe katak ema neʼebé matenek kona-ba Ukun-Fuan.
^ Ka “husi família sira neʼebé importante”.
^ Orj., “isin”.
