Segundu Korinto 7:1-16
7 Tan neʼe, haʼu-nia maluk doben sira, tanba ita iha promesa sira-neʼe,+ mai ita hamoos ita-nia an husi buat hotu neʼebé hafoʼer isin no neon,*+ no sai santu loloos hodi hamtaʼuk Maromak.
2 Fó fatin ba ami iha imi-nia laran.+ Ami la halo sala hasoru ema ida, ami la hakanek ema ida, ami la lohi ema ida atu hetan buat ruma.+
3 Haʼu koʼalia ida-neʼe laʼós atu tesi-lia ba imi. Tanba hanesan uluk haʼu dehan ona, imi iha ami-nia laran atu mate hamutuk no moris hamutuk ho ami.
4 Haʼu bele koʼalia nakloke ba imi. Imi halo haʼu sente orgullu tebes. Haʼu-nia laran sente kmaan, haʼu sente haksolok duni iha ami-nia terus hotu.+
5 Tuir loloos, kuandu ami toʼo iha Masedónia,+ ami* la hetan kmaan, maibé ami kontinua hetan terus oioin. Ema iha liʼur kontra ami no ami mós hanoin barak kona-ba kongregasaun.
6 Maibé, Maromak neʼebé fó kmaan ba ema laran-triste,+ fó kmaan ba ami bainhira Tito vizita ami.
7 Ami sente kmaan laʼós deʼit tanba ninia vizita, maibé mós tanba ninia ksolok kona-ba imi, tanba nia konta ba ami katak imi hakarak tebes hasoru haʼu, no katak imi triste tebes no hanoin tebetebes haʼu, tan neʼe haʼu sente haksolok liután.
8 Maski uluk haʼu halo imi triste ho haʼu-nia karta,+ maibé haʼu la sente sala kona-ba neʼe. Haʼu haree katak haʼu-nia karta halo imi triste ba tempu uitoan. Foufoun haʼu sente la diʼak kona-ba neʼe,
9 maibé agora haʼu haksolok. Haʼu haksolok laʼós tanba haʼu halo imi triste, maibé tanba imi sai triste hodi arrepende imi-nia sala. Tanba imi sai triste tuir Maromak nia hakarak, hodi nuneʼe imi la hetan kanek tanba ami.
10 Tanba ita sempre hetan buat diʼak hodi triste tuir Maromak nia hakarak neʼebé lori ita atu arrepende sala no hetan salvasaun,+ maibé triste tuir mundu lori ba mate.
11 Haree toʼok ba buat diʼak neʼebé imi hetan hodi sai triste tuir Maromak nia hakarak. Triste neʼe book imi atu badinas, hamoos imi-nia an, laran-nakali kona-ba sala, sai taʼuk, hakarak tebes atu hakribi sala, sai laran-manas, halo loos buat neʼebé sala!+ Iha buat hotu imi hatudu ona imi-nia an moos* kona-ba neʼe.
12 Maski haʼu hakerek ba imi, haʼu la hakerek neʼe ba ema neʼebé halo sala,+ ka ba ema neʼebé hetan laran-kanek, maibé haʼu hakerek neʼe hodi imi bele hatudu sai iha Maromak nia oin katak imi hakarak tebes atu rona ba ami-nia liafuan.
13 Tan ida-neʼe mak ami sente kmaan ona.
Ami laʼós deʼit sente kmaan maibé ami haksolok liután tanba Tito nia ksolok, tanba imi hotu halo nia* sente kmaan.
14 Tanba uluk haʼu gaba imi ba nia, no haʼu la sente moe hodi halo nuneʼe, maibé hanesan buat hotu neʼebé ami fó sai ba imi mak loos, nuneʼe buat neʼebé ami konta ba Tito mós sai loos.
15 No mós, ninia domin ba imi sai boot liután bainhira nia hanoin-hetan fali oinsá imi hotu halo tuir,+ no oinsá imi simu nia ho respeitu kleʼan.
16 Haʼu haksolok tanba iha buat hotu haʼu bele fiar* imi.
Nota-rodapé
^ Haree “Pneuma” iha Glosáriu.
^ Ka “ami-nia isin”.
^ Ka “hahalok moos; laran-moos”.
^ Ka “ninia espíritu”. Haree “Pneuma” iha Glosáriu.
^ Ka karik “bele sai aten-brani tanba”.
