Apóstolu 3:1-26
3 Pedro ho João saʼe ba templu iha oras halo orasaun nian, katak tuku 3 lokraik,*
2 no iha neʼebá ema lori mane ida neʼebé ain-aat husi moris mai kedas. Loroloron sira tau nia besik odamatan templu nian naran Portaun Furak, hodi nuneʼe nia bele husu ezmola* husi ema sira neʼebé tama ba templu.
3 Kuandu mane neʼe haree Pedro no João atu tama ba templu, nia hahú husu ezmola.
4 Maibé Pedro no mós João hateke ba nia no dehan: “Haree mai ami.”
5 Entaun nia hateke ba sira, hodi hein katak nia bele simu buat ruma husi sira.
6 Maibé Pedro dehan: “Haʼu la iha osan-mutin no osan-mean, maibé buat neʼebé haʼu iha mak haʼu sei fó ba ó. Hodi Jesus Kristu ema Nazaré nia naran, haʼu hatete bá ó, laʼo bá!”+
7 Ho ida-neʼe, Pedro kaer ninia liman-loos no halo nia hamriik.+ Iha momentu neʼe kedas ninia ain sai diʼak,+
8 no nia haksoit hodi hahú laʼo.+ Nia tama ba templu ho sira, no nia laʼo no haksoit hodi fó hahiʼi ba Maromak.
9 Ema hotu haree nia laʼo no fó hahiʼi ba Maromak.
10 Sira hahú hatene katak nia mak mane neʼebé baibain tuur hodi husu ezmola iha Portaun Furak iha templu,+ no sira sai hakfodak tebes no haksolok ho buat neʼebé akontese ba nia.
11 Bainhira mane neʼe kaer daudaun Pedro no João nia liman, ema hotu mai besik sira iha fatin naran Salomão nia Pórtiku,*+ no ema sira-neʼe hakfodak loos ho buat neʼebé akontese.
12 Kuandu Pedro haree ida-neʼe, nia dehan: “Ema Izraél sira, tanbasá mak imi hakfodak loos ho ida-neʼe? Tanbasá mak imi hateke ami hodi hanoin katak ho ami-nia kbiit rasik ka ho ami-nia laran-metin ba Maromak* mak ami halo nia laʼo?
13 Abraão nia Maromak, Isaac nia Maromak no Jacob nia Maromak,+ ita-nia beiʼala sira-nia Maromak fó ona glória ba ninia Atan+ Jesus,+ neʼebé imi entrega+ no nega iha Pilatos nia oin maski Pilatos deside atu husik nia livre.
14 Imi nega ema neʼebé santu no laran-loos neʼe, no imi husu Pilatos atu husik livre mane ida seluk ba imi, mane neʼebé ohodór,+
15 maibé imi oho ona Naʼi-Ulun ba moris nian.+ Maski nuneʼe, Maromak halo nia moris hiʼas fali husi mate, no kona-ba neʼe mak ami sai nuʼudar sasin.+
16 Tan neʼe, liuhusi ninia naran no liuhusi ami-nia fiar ba ninia naran mak ema neʼe, neʼebé imi haree no hatene, sai forsa fali. Fiar liuhusi Jesus mak halo ona mane neʼe sai isin-diʼak iha imi hotu nia oin.
17 Agora, maun-alin sira, haʼu hatene katak imi halo ida-neʼe tanba imi la hatene,+ hanesan mós ho imi-nia ukun-naʼin sira halo ona.+
18 Maibé, hodi halo nuneʼe mak Maromak kumpre buat neʼebé nia fó-hatene nanis ona liuhusi profeta sira hotu nia ibun, katak Kristu tenke hetan terus.+
19 “Tan neʼe, arrepende an bá+ no fila fali ba Maromak,+ atu nuneʼe Jeová* bele hamoos tiha imi-nia sala sira+ no sei fó kmaan ba imi.
20 Nia sei haruka Kristu neʼebé nia hili ona ba imi, neʼe mak Jesus,
21 neʼebé tenke hein iha lalehan toʼo tempu neʼebé halo foun buat hotu hodi tuir buat neʼebé Maromak koʼalia ona liuhusi ninia profeta santu sira-nia ibun iha tempu uluk.
22 Tuir loloos, Moisés dehan: ‘Jeová,* imi-nia Maromak, sei hili profeta ida hanesan haʼu husi imi-nia leet.+ Imi tenke rona ba buat naran deʼit neʼebé nia dehan ba imi.+
23 Tuir Loloos, ema* naran deʼit neʼebé la rona ba Profeta neʼe sei lakon mohu tiha husi povu nia leet.’+
24 Profeta hotu, hahú husi Samuel nia tempu, koʼalia sai momoos kona-ba loron sira-neʼe.+
25 Imi mak profeta sira-nia oan no oan husi aliansa neʼebé Maromak halo ona ho imi-nia beiʼala sira.+ Nia dehan ba Abraão: ‘Liuhusi ó-nia bei-oan mak família hotu iha mundu sei hetan bensaun.’+
26 Maromak hili ona ninia Atan no haruka nia uluk ba imi+ atu fó bensaun ba imi hodi ajuda imi ida-idak atu hasees an husi imi-nia hahalok aat sira.”
Nota-rodapé
^ Orj., “oras 9”.
^ Ka “fó prezente ho laran-sadiʼa”. Haree “Fó prezente ho laran-sadiʼa” iha Glosáriu.
^ Ka “ami-nia devosaun ba Maromak”. Haree “Devosaun ba Maromak” iha Glosáriu.
^ Haree “Psiké” iha Glosáriu.
