Deuteronómio 5:1-33
5 Tuirmai Moisés bolu ema Izraél tomak mai no dehan ba sira: “Oh ema Izraél, rona ba ukun-fuan no lei sira neʼebé haʼu fó sai ba imi ohin, no imi tenke aprende no halo tuir ho didiʼak buat sira-neʼe.
2 Jeová, ita-nia Maromak, halo aliansa ida ho ita iha Horeb.+
3 Jeová la halo aliansa neʼe ho ita-nia beiʼala sira, maibé nia halo ho ita, katak ita hotu neʼebé moris hela ohin loron.
4 Jeová koʼalia ho imi oin ba oin iha Foho Horeb husi ahi laran.+
5 Iha tempu neʼebá, haʼu hamriik entre Jeová no imi+ atu fó sai ba imi Jeová nia liafuan, tanba imi taʼuk ahi neʼe no lakohi saʼe ba foho leten.+ Nia dehan:
6 “‘Haʼu mak Jeová, imi-nia Maromak, neʼebé lori imi sai husi rai-Ejitu, husi uma atan nian.+
7 Imi labele adora maromak seluk, só adora haʼu mesak deʼit.*+
8 “‘Imi labele halo estátua ba imi-nia an+ ka halo buat naran deʼit* atu reprezenta buat neʼebé iha lalehan ka iha rai ka iha bee laran.
9 Imi labele hakruʼuk ba sira ka serbí sira,+ tanba haʼu, Jeová, imi-nia Maromak, mak Maromak neʼebé hakarak ema atu adora haʼu mesak deʼit,+ Maromak neʼebé fó kastigu ba oan sira tanba aman nia sala, ba jerasaun tolu no ba jerasaun haat husi ema neʼebé odi haʼu,+
10 maibé kona-ba ema neʼebé hadomi haʼu no halo tuir haʼu-nia mandamentu sira, haʼu sei hatudu domin neʼebé laran-metin* ba sira toʼo sira-nia jerasaun rihun ba rihun.
11 “‘Imi labele temi* imi-nia Maromak Jeová nia naran iha dalan neʼebé la respeitu,+ tanba Jeová sei fó kastigu duni ba ema neʼebé temi ninia naran la ho respeitu.+
12 “‘Halaʼo loron Sábadu hodi halo loron neʼe sagradu, atu halo tuir mandamentu neʼebé Jeová, imi-nia Maromak, fó ona ba imi.+
13 Imi tenke halo imi-nia serbisu hotu durante loron neen,+
14 maibé loron hitu mak loron Sábadu ba Jeová, imi-nia Maromak.+ Imi labele halo serbisu ida,+ katak imi no imi-nia oan-mane, imi-nia oan-feto, imi-nia atan-mane no atan-feto, imi-nia karau, imi-nia kuda-burru, imi-nia animál-hakiak, no mós ema estranjeiru neʼebé hela iha imi-nia sidade laran,*+ atu nuneʼe imi-nia atan-mane no atan-feto sira bele deskansa hanesan imi.+
15 Hanoin-hetan bá katak uluk imi sai atan iha rai-Ejitu, no Jeová, imi-nia Maromak, lori imi sai husi neʼebá ho liman neʼebé forte no ho liman neʼebé iha kbiit.+ Tan neʼe mak Jeová, imi-nia Maromak, haruka imi atu halaʼo loron Sábadu.
16 “‘Hatudu respeitu ba imi-nia inan-aman,+ hodi halo tuir mandamentu neʼebé Jeová, imi-nia Maromak, fó ona ba imi, atu nuneʼe imi bele moris naruk no buat hotu bele sai diʼak ba imi iha rai neʼebé Jeová, imi-nia Maromak, sei fó ba imi.+
17 “‘Imi labele oho ema.+
18 “‘Imi labele halo sala seksuál ho ema neʼebé laʼós imi-nia kaben.*+
19 “‘Imi labele naʼok.+
20 “‘Imi labele fó sasin falsu kona-ba imi-nia maluk.+
21 “‘Imi labele kaan imi-nia maluk nia feen.+ No imi labele kaan imi-nia maluk nia uma, ninia toʼos, ninia atan-mane ka atan-feto, ninia karau ka kuda-burru, ka buat naran deʼit neʼebé imi-nia maluk nian.’+
22 “Jeová fó sai mandamentu* sira-neʼe ba kongregasaun* tomak iha foho neʼe, nia koʼalia husi ahi no kalohan metan,+ ho lian neʼebé boot, no nia la aumenta tan buat ida ba liafuan sira-neʼe; tuirmai nia hakerek buat sira-neʼe iha fatuk-belar rua no fó ba haʼu.+
23 “Maibé bainhira imi foin rona lian sai husi kalohan metan, nuʼudar ahi lakan makaʼas iha foho neʼe,+ ulun-naʼin sira husi imi-nia suku no katuas sira hakbesik ba haʼu.
24 Tuirmai imi dehan: ‘Jeová, ita-nia Maromak, hatudu sai ona ninia glória no kbiit boot, no ita rona ona ninia lian sai husi ahi.+ Ohin ita haree ona katak Maromak bele koʼalia ho ema, no ema bele kontinua moris.+
25 Maibé ami sei taʼuk, tanba ahi-lakan makaʼas neʼe bele han mohu ami. Se ami kontinua rona ba Jeová, ita-nia Maromak, nia lian, ami sei mate duni.
26 Husi ema hotu, sé mak rona ona Maromak neʼebé moris koʼalia sai husi ahi hanesan ami rona no bele moris hela?
27 Ó rasik mak tenke hakbesik atu rona buat hotu neʼebé Jeová, ita-nia Maromak, sei fó sai, no ó mak sei fó-hatene fali ba ami kona-ba buat hotu neʼebé Jeová, ita-nia Maromak, hatete ona ba ó, no ami sei rona no halo tuir ida-neʼe.’+
28 “Entaun Jeová rona liafuan neʼebé imi koʼalia ba haʼu, no Jeová dehan ba haʼu: ‘Haʼu rona ona liafuan neʼebé povu neʼe koʼalia ba ó. Buat hotu neʼebé sira koʼalia mak diʼak.+
29 Se sira kontinua hamtaʼuk haʼu+ ho laran no halo tuir haʼu-nia mandamentu hotu;+ entaun buat hotu sei sai diʼak ba sira no ba sira-nia oan sira ba nafatin!+
30 Bá hodi koʼalia ba sira: “Fila fali ba imi-nia tenda.”
31 Maibé ó tenke hela iha neʼe ho haʼu, no haʼu sei fó sai ba ó mandamentu, ukun-fuan no lei hotu neʼebé ó tenke hanorin ba sira, no sira tenke halo tuir iha rai neʼebé haʼu sei fó ba sira atu foti nuʼudar sira-nian.’
32 Agora imi tenke halo tuir ho didiʼak buat hotu neʼebé Jeová, imi-nia Maromak, haruka ona ba imi.+ Imi labele fila ba liman-loos ka ba liman-karuk.+
33 Imi tenke laʼo tuir dalan hotu neʼebé Jeová, imi-nia Maromak, haruka imi atu laʼo bá,+ hodi nuneʼe imi bele kontinua moris no buat hotu sei sai diʼak ba imi no imi bele moris naruk iha rai neʼebé imi sei foti nuʼudar imi-nian.+
Nota-rodapé
^ Ka “Imi labele iha maromak seluk hodi kontra haʼu iha haʼu-nia oin”.
^ Ka “hatudu laran-diʼak neʼebé nakonu ho domin”.
^ Ka “uza”.
^ Orj., “portaun laran”.
^ Ka “halo adultériu”. Haree “Adultériu” iha Glosáriu.
^ Orj., “liafuan”.
