Galásia 2:1-21
2 Entaun liutiha tinan 14, haʼu saʼe fali ba Jeruzalein hamutuk ho Barnabé,+ no haʼu lori mós Tito.+
2 Haʼu saʼe ba Jeruzalein tanba lia-menon husi lalehan. Haʼu konta ba sira kona-ba liafuan diʼak neʼebé haʼu haklaken iha nasaun sira-nia leet. Haʼu konta neʼe mesamesak ba mane sira neʼebé ema respeitu, tanba haʼu hakarak hatene se haʼu-nia serbisu uluk nian ka agora nian saugati deʼit ka lae.
3 Maski Tito+ neʼebé laʼo hamutuk ho haʼu mak ema Gregu ida, maibé la iha ema ida mak obriga nia atu hetan sirkunsizaun.*+
4 Maibé problema neʼe mosu tanba maun-alin falsu sira neʼebé tama nonook+ ba kongregasaun nuʼudar espiaun. Sira hakarak atu halakon ita-nia liberdade+ tanba ita sai ida deʼit ho Kristu Jesus, atu nuneʼe sira bele halo ita sai fali atan.+
5 Ami la halo tuir ka hakruʼuk ba sira,+ maski ba tempu uitoan deʼit* mós lae, atu nuneʼe lia-loos husi liafuan diʼak bele kontinua hela iha imi.
6 Maibé kona-ba ema sira neʼebé haree hanesan ema importante+ no ema respeitu sira, sira la hanorin buat neʼebé foun mai haʼu. Maski uluk sira mak ema importante, maibé neʼe la folin ba haʼu, tanba Maromak la haree ema tuir deʼit buat neʼebé iha liʼur.
7 Maibé, sira haree duni katak haʼu simu ona knaar atu fó sai liafuan diʼak ba ema neʼebé la hetan sirkunsizaun,+ hanesan Pedro mós simu ona knaar atu haklaken ba ema neʼebé hetan sirkunsizaun.
8 Tanba Ida neʼebé fó kbiit ba Pedro atu halaʼo knaar nuʼudar apóstolu ba ema neʼebé hetan sirkunsizaun, nia mós fó kbiit ba haʼu atu halaʼo knaar ba ema husi nasaun sira seluk.+
9 Sira rekoñese katak Maromak fó ona ninia laran-diʼak neʼebé boot ba haʼu,+ entaun Tiago,+ Cefas* no João, neʼebé hanesan ai-riin iha kongregasaun, sira lolo sira-nia liman-loos ba haʼu no Barnabé,+ hodi hatudu katak ami hotu mak maluk serbisu-naʼin, atu nuneʼe ami bele bá halaʼo knaar ba nasaun sira, maibé sira sei halaʼo knaar ba ema neʼebé hetan ona sirkunsizaun.
10 Buat ida deʼit neʼebé sira husu ba ami mak atu hanoin ema kiak sira. No haʼu hakaʼas an ona atu halo ida-neʼe.+
11 Maibé, kuandu Cefas*+ toʼo iha Antiokia,+ haʼu koʼalia nakloke ba nia oin ba oin, tanba nia halo sala duni.
12 Tanba antes ema sira neʼebé Tiago+ haruka toʼo mai, nia toman atu han hamutuk ho ema husi nasaun seluk,+ maibé kuandu sira toʼo ona, nia la halo tan ida-neʼe no haketak ninia an, tanba taʼuk ba ema sira husi grupu neʼebé hetan ona sirkunsizaun.+
13 Ema Judeu sira seluk mós halo tuir ninia hahalok laran-makerek* neʼe, tan neʼe Barnabé mós halo tuir sira.
14 Maibé bainhira haʼu haree katak sira la laʼo tuir lia-loos husi liafuan diʼak,+ haʼu dehan ba Cefas* iha sira hotu nia oin: “Ó ema Judeu, maibé ó moris hanesan ema husi nasaun seluk, laʼós hanesan ema Judeu. Entaun, oinsá mak ó bele book ema husi nasaun seluk atu moris tuir ema Judeu nia toman?”+
15 Ita neʼebé moris mai nuʼudar ema Judeu, no laʼós nuʼudar ema sala-naʼin husi nasaun sira seluk,
16 ita rekoñese katak Maromak haree ema ida nuʼudar ema laran-loos, laʼós tanba halo tuir ukun-fuan, maibé tanba deʼit fiar+ Jesus Kristu.+ Entaun ita tau fiar ona ba Kristu Jesus, atu ita bele sai ema laran-loos liuhusi fiar ba Kristu, no laʼós hodi halo tuir ukun-fuan, tanba la iha ema ida mak bele sai ema laran-loos hodi halo tuir ukun-fuan.+
17 Se ema haree ona ita hanesan ema sala-naʼin tanba ita buka atu Maromak haree ita nuʼudar ema laran-loos liuhusi Kristu, entaun Kristu mak book ita atu halo sala ka? Lae duni!
18 Se haʼu harii fali buat neʼebé haʼu rasik sobu ona, haʼu hatudu katak haʼu kontra ukun-fuan.
19 Tanba liuhusi ukun-fuan, haʼu mate ona tuir ukun-fuan,+ atu nuneʼe haʼu bele moris ba Maromak.
20 Haʼu prega tiha ona ba ai-riin hamutuk ho Kristu.+ Agora laʼós tan haʼu mak moris,+ maibé Kristu mak moris iha haʼu. Neʼe duni, agora haʼu halaʼo haʼu-nia moris nuʼudar ema ida ho fiar ba Maromak nia Oan-Mane,+ neʼebé hadomi haʼu no fó nia moris ba haʼu-nia diʼak.+
21 Haʼu sei la fila kotuk ba* Maromak nia laran-diʼak neʼebé boot.+ Se ema ida bele sai ema laran-loos liuhusi ukun-fuan, neʼe katak Kristu mate saugati deʼit.+
Nota-rodapé
^ Orj., “ba oras ida”.
^ Ninia naran seluk mak Pedro.
^ Ninia naran seluk mak Pedro.
^ Ka “finje”.
^ Ninia naran seluk mak Pedro.
^ Ka “sei dudu sees”.
