Haʼu moris iha sidade Székesfehérvár iha rai-Ungria. Sidade neʼe harii ona maizumenus ba tinan 1.000. Haʼu sei hanoin-hetan rezultadu aat husi funu mundiál segundu neʼebé afeta sidade neʼe.

Bainhira haʼu sei kiʼik, haʼu-nia avó sira mak haboot haʼu. Haʼu iha memória diʼak kona-ba sira, liuliu haʼu-nia avó-feto Elisabeth. Nia ajuda haʼu atu fiar metin ba Maromak. Hahú husi haʼu tinan tolu, kalan-kalan haʼu no haʼu-nia avó-feto reza orasaun Ami Aman. Maski nuneʼe, haʼu la komprende orasaun neʼe nia signifikadu toʼo haʼu tinan 20 liu.

Haʼu-nia avó sira haboot haʼu tanba haʼu-nia inan-aman serbisu loron-kalan atu bele sosa uma diʼak ida. Maibé fulan ida dala rua iha loron-sábadu, família tomak halibur atu han hamutuk. Haʼu hafolin tebes tempu sira-neʼe.

Iha tinan 1958, haʼu-nia inan-aman konsege sosa uma atu ami naʼin-tolu hela bá. Ikusmai, haʼu bele hela ho haʼu-nia inan-aman. Haʼu sente kontente tebes. Maibé liutiha fulan neen, haʼu la sente kontente tan. Haʼu-nia aman mate tanba kankru.

Haʼu triste tebes. Haʼu harohan: “Maromak, haʼu husu ona Ita atu salva haʼu-nia apá. Haʼu presiza nia. Tanbasá Ita la hatán haʼu-nia orasaun?” Haʼu hakarak tebes atu hatene haʼu-nia apá agora iha neʼebé. Haʼu hanoin: ‘Nia bá lalehan ka lae? Ka nia lakon deʼit ba nafatin?’ Haʼu laran-moras ba labarik sira neʼebé sira-nia aman moris hela.

Durante tinan barak, haʼu bá rate loroloron. Haʼu hakneʼak iha haʼu-nia apá nia rate no halo orasaun: “Favór Maromak, haʼu hakarak hatene haʼu-nia apá iha neʼebé.” Haʼu mós halo orasaun atu bele komprende tanbasá ita moris.

Bainhira haʼu tinan 13, haʼu aprende lian Alemaun. Iha livru barak tebes iha lian Alemaun no haʼu hanoin karik haʼu bele hetan resposta ba haʼu-nia pergunta sira iha livru sira-neʼe. Iha tinan 1967, haʼu komesa eskola iha sidade Jena, uluk parte ba Alemaña Leste. Haʼu gosta tebes lee livru sira husi ema Alemaun neʼebé estuda filozofia, liuliu livru sira kona-ba tanbasá ema moris. Maski haʼu lee ideia balu neʼebé haʼu gosta, maibé haʼu seidauk hetan resposta neʼebé klaru ba haʼu-nia pergunta sira. Haʼu kontinua halo orasaun hodi husu resposta ba haʼu-nia pergunta sira.

Iha tinan 1970, haʼu fila fali ba rai-Ungria, no haʼu hasoru feto ida naran Rose neʼebé ikusmai sai haʼu-nia feen. Iha tempu neʼebá, governu komunista mak ukun rai-Ungria. Lakleur depois ami kaben, haʼu no Rose halai ba rai-Áustria. Ami-nia planu mak atu muda ba Sydney, rai-Austrália tanba haʼu-nia tiu ida hela iha neʼebá.

Lakleur haʼu hetan serbisu iha rai-Áustria. Loron ida, haʼu-nia kolega serbisu hatete katak haʼu bele hetan resposta ba haʼu-nia pergunta hotu husi Bíblia. Nia fó ba haʼu livru balu neʼebé koʼalia kona-ba Bíblia. Haʼu lee hotu lalais livru sira-neʼe no haʼu hakarak aprende liután. Tan neʼe, haʼu hakerek ba ema sira neʼebé fó sai livru sira-neʼe atu husu tan livru seluk. Ema neʼebé fó sai livru sira-neʼe mak Testemuña ba Jeová.

Iha aniversáriu primeiru ba ami-nia kazamentu, joven Testemuña ida husi rai-Áustria vizita haʼu no Rose. Nia lori livru sira neʼebé haʼu husu no nia mós oferese atu estuda Bíblia ho haʼu. Haʼu konkorda. Haʼu hakarak tebes atu aprende, tan neʼe ami estuda semana ida dala rua. No tempu ida-idak ami estuda, ami uza maizumenus oras haat.

Testemuña sira hanorin haʼu husi Bíblia no haʼu gosta tebes ida-neʼe. Bainhira sira hatudu Maromak nia naran Jeová ba haʼu iha haʼu-nia Bíblia iha lian Úngaru, haʼu hakfodak tebes. Haʼu tuir misa durante tinan 27, maibé nunka rona ema temi Maromak nia naran. Haʼu gosta tebes Bíblia nia resposta neʼebé klaru no lójiku. Porezemplu, haʼu aprende katak ema mate la hatene buat ida, mate mak hanesan toba dukur loos. (Eclesiastes 9:​5, 10; João 11:11-​15) Haʼu mós aprende katak Bíblia hanorin kona-ba mundu foun no iha neʼebá “mate sei la iha tan”. (Apokalipse 21:​3, 4) Haʼu hein namanas atu hasoru fali haʼu-nia apá, tanba iha mundu foun “Maromak sei fó moris-hiʼas ba ema”.​—Apóstolu 24:15.

Testemuña estuda Bíblia ho haʼu no Rose. Ami naʼin-rua laʼo ba oin lalais, no ami remata livru estudu nian iha fulan rua nia laran deʼit. Ami tuir reuniaun hotu neʼebé Testemuña sira halaʼo iha Reuniaun-Fatin. Ami admira tebes ho domin neʼebé Testemuña sira hatudu ba malu, oinsá sira prontu atu ajuda malu no mós sira-nia unidade.​—João 13:34, 35.

Iha tinan 1976, haʼu no Rose hetan lisensa atu tama ba rai-Austrália. Iha neʼebá, ami kontaktu kedas Testemuña ba Jeová. Testemuña sira iha neʼebá ajuda ami sai toman lalais ho ami-nia situasaun foun. Iha tinan 1978, ami hetan batizmu nuʼudar Testemuña ba Jeová.

Ikusmai, haʼu hetan resposta ba haʼu-nia pergunta sira neʼebé haʼu husu durante tempu kleur. Hodi hakbesik ba Maromak Jeová, haʼu mós hetan Aman neʼebé diʼak liu. (Tiago 4:8) Haʼu hafolin tebes esperansa atu hasoru fali haʼu-nia apá iha mundu foun.​—João 5:​28, 29.

Iha tinan 1989, haʼu no Rose deside atu muda bá fali rai-Ungria hodi nuneʼe ami bele fahe ami-nia nia fiar foun ho ami-nia família no belun sira, no mós ba ema seluk neʼebé ami hasoru. Ami hetan ona priviléjiu atu hanorin Bíblia ba ema atus ba atus. Ami ajuda ema naʼin-70 liu atu hetan batizmu no serbí Jeová hamutuk ho ami, neʼe inklui mós haʼu-nia amá.

Durante tinan 17, haʼu halo orasaun atu hetan resposta ba haʼu-nia pergunta sira. Agora tinan 39 liu ona no haʼu nafatin halo orasaun. Maibé haʼu halo orasaun no hatete: “Obrigadu Aman iha lalehan tanba ita hatán pergunta sira neʼebé haʼu husu kuandu haʼu sei labarik.”