“Ami labele konkorda malu kona-ba Maromak iha naran ka lae, no se nia iha naran, ninia naran mak saida.”​—Profesór David Cunningham, Theological Studies.

Maromak hatete: “Haʼu mak Jeová. Neʼe mak haʼu-nia naran.” (Isaias 42:8) Jeová mak Maromak nia naran iha lian Ebraiku neʼebé signifika “Nia mak halo sai”.​—Génesis 2:4, nota-rodapé.

Jeová hakarak ita atu uza ninia naran. Bíblia hatete: “Bolu ninia naran, fó sai ninia hahalok sira iha povu nia leet! Haklaken katak ninia naran deʼit mak aas liu.”​—Isaias 12:4.

Jesus uza Maromak nia naran. Liuhusi orasaun, Jesus hatete ba Jeová: “Haʼu fó sai tiha ona Ita-nia naran ba [haʼu-nia dixípulu] no sei kontinua fó sai naran neʼe.” Tanbasá Jesus fó sai Maromak nia naran ba ninia dixípulu sira? Jesus hatutan tan: “Atu nuneʼe domin neʼebé [Maromak] hatudu mai haʼu bele hamutuk ho sira no haʼu hamutuk ho sira.”​—João 17:26.

Mestre ida ba relijiaun naran Walter Lowrie hatete katak se ema ida la hatene Maromak nia naran, nia labele koñese didiʼak Maromak no labele hadomi Maromak.

Mane ida naran Victor tuir misa semana-semana, maibé nia sente katak nia la koñese didiʼak Maromak. Nia hatete: “Tuirmai, haʼu aprende katak Maromak nia naran mak Jeová no neʼe hanesan haʼu hasoru Maromak ba dala primeiru. Haʼu sente hanesan foin hasoru Ida neʼebé haʼu hein namanas atu hasoru. Haʼu komesa aprende kona-ba ninia hahalok furak oioin no haburas relasaun diʼak ho nia.”

Jeová hakarak hakbesik ba ema neʼebé uza ninia naran. Kona-ba ema neʼebé “hanoin kleʼan kona-ba ninia naran”, Maromak promete: “Haʼu sei hatudu laran-sadiʼa ba sira, hanesan aman ida hatudu laran-sadiʼa ba ninia oan neʼebé serbí nia.” (Malaquias 3:16, 17) Maromak mós fó kolen ba ema neʼebé bolu ninia naran. Bíblia hatete: “Ema hotu neʼebé bolu Jeová nia naran sei hetan salvasaun.”​—Roma 10:13.