Aprende husi Maromak nia Liafuan

Saida mak sei akontese iha Loron Tesi-Lia nian?

LOKE

Informasaun neʼe sei fó resposta ba pergunta sira neʼebé karik Ita husu ona no ajuda Ita atu hetan resposta husi Ita rasik nia Bíblia. Testemuña ba Jeová sira kontente atu koʼalia hamutuk ho Ita kona-ba pergunta sira-neʼe.

1. Saida mak Loron Tesi-Lia nian?

Hanesan hatudu iha dezeñu iha sorin, ema barak hanoin katak iha Loron Tesi-Lia nian ema barak nia klamar sei hamriik iha Maromak nia kadunan nia oin no hetan tesi-lia tuir sira-nia hahalok uluk. Balu sei simu bensaun atu moris iha lalehan, no balu simu kastigu iha infernu. Maibé Bíblia hatudu katak objetivu husi Loron Tesi-Lia nian mak atu salva ema husi hahalok la justu. (Salmo 96:13) Maromak hili ona Jesus atu sai Juís neʼebé sei lori fali justisa mai mundu.—Lee Isaias 11:1-5; Apóstolu 17:31.

2. Oinsá mak Loron Tesi-Lia nian sei lori fali justisa?

Bainhira ema primeiru, Adão ho neon halo sala kontra Maromak, nia lori sala, susar no mate ba ninia bei-oan hotu. (Roma 5:12) Atu bele hadiʼa situasaun la justu neʼe, Jesus sei fó moris-hiʼas ba ema biliaun ba biliaun. Livru Apokalipse fó sai katak neʼe sei akontese durante Kristu nia Ukun ba Tinan Rihun ida.—Lee Apokalipse 20:4, 11, 12.

Ema neʼebé moris-hiʼas sei hetan tesi-lia, laʼós tuir sira-nia hahalok antes sira mate, maibé tuir sira-nia hahalok depois Maromak fó sai mandamentu foun iha “livru” neʼebé temi iha Apokalipse kapítulu 20. (Roma 6:7) Apóstolu Paulo hatete katak “ema neʼebé hatudu hahalok loos no mós ema neʼebé hatudu hahalok la loos” sei hetan moris-hiʼas no iha oportunidade atu aprende kona-ba Maromak.—Lee Apóstolu 24:15.

3. Loron Tesi-Lia nian sei kumpre saida?

Ema neʼebé mate antes koñese no serbí Maromak sei hetan oportunidade atu troka sira-nia moris no hatudu hahalok diʼak. Se sira halo nuneʼe, neʼe katak sira “moris-hiʼas atu hetan moris rohan-laek”. Maibé ema balu neʼebé hetan moris-hiʼas sei lakohi aprende no halo tuir Jeová. Neʼe katak sira “moris hiʼas atu hetan tesi-lia”.—Lee João 5:28, 29; Isaias 26:10; 65:20.

Loron Tesi-Lia nian halaʼo ba tinan rihun ida, no iha loron neʼe nia rohan, Jeová halo ona ema neʼebé laran-metin sai perfeitu fali. (1 Korinto 15:24-28) Neʼe mak esperansa furak ba ema hotu neʼebé laran-metin. Durante koko ba dala ikus, Maromak sei husik Diabu Satanás livre husi rai-kuak neʼebé kleʼan. Satanás iha ona rai-kuak neʼe durante tinan rihun ida. Dala ida tan Satanás sei koko halo ema fila kotuk ba Jeová, ema neʼebé lakohi halo tuir Satanás sei hetan moris ba nafatin iha mundu.—Lee Isaias 25:8; Apokalipse 20:7-9.

4. Iha loron tesi-lia nian seluk neʼebé sei lori bensaun ba ema ka lae?

Bíblia mós uza fraze “loron tesi-lia nian” atu refere ba akontesimentu neʼebé sei remata sistema agora nian. Loron tesi-lia nian neʼe sei mai derrepente deʼit hanesan ho Rai-Nabeen iha Noé nia tempu. Rai-Nabeen halakon ema aat hotu iha tempu neʼebá. Ita kontente tanba lakleur tan Maromak sei halakon “ema aat” no neʼe sei loke dalan ba ema atu moris iha mundu foun no “iha neʼebá buat hotu sei tuir justisa”.—Lee 2 Pedro 3:6, 7, 13.