Imajina toʼok aman ida koʼalia ba ninia oan-mane neʼebé tinan hitu. Nia hatete, “Husi uluk kedas, Maromak kria mundu no buat hotu iha mundu neʼe, nia kria loro-matan, fulan no fitun sira.” Oan neʼe hanoin uitoan, tuirmai nia husu, “Apá, sé mak kria Maromak?”

Aman neʼe hatán, “La iha ida mak kria Maromak. Nia sempre iha.” Resposta neʼe halo ona oan neʼe kontente tanba nia sei kiʼik. Maibé nuʼudar oan neʼe sai boot, nia hakarak hatene liután. Nia sente susar atu komprende oinsá mak la iha ida mak kria Maromak. Nia kontinua hanoin, ‘Maromak neʼe mai husi neʼebé?’

Tuir loloos, Bíblia fó resposta neʼebé hanesan uitoan ho saida mak aman neʼe hatete iha ezemplu ohin. Moisés hakerek: “Oh Jeová, . . . antes Ita halo foho sira ka antes Ita halo mundu no rai neʼebé buras, Ita mak Maromak, husi uluk kedas no ba nafatin.” (Salmo 90:1, 2) Nuneʼe mós ho profeta Isaias, nia hatete: “Ó la hatene ka? Ó la rona ka? Jeová mak Kriadór ba buat hotu iha mundu tomak, nia mak Maromak neʼebé iha ba nafatin.” (Isaias 40:28) No Judas nia karta mós temi katak Maromak iha “husi tempu uluk kedas”.—Judas 25.

Eskritura sira-neʼe hatudu katak Maromak mak “Liurai rohan-laek”, neʼe mak buat neʼebé apóstolu Paulo dehan. (1 Timóteo 1:17) Neʼe katak Maromak sempre iha, husi uluk kedas toʼo agora. No nia sei iha ba nafatin. (Apokalipse 1:8) Neʼe mak hanesan karakterístika importante kona-ba Maromak.

Tanbasá susar ba ita atu komprende pontu neʼe? Tanba ita-nia tempu moris mak limitadu, ita-nia haree kona-ba tempu la hanesan ho Maromak Jeová nia haree. Tanba Maromak mak rohan-laek, ba nia tinan rihun ida hanesan loron ida deʼit. (2 Pedro 3:8) Nuʼudar ilustrasaun: Gafañotu neʼebé bele moris deʼit ba loron 50 bele komprende ita ema nia moris neʼebé bele toʼo tinan 70 ka 80 ka lae? Klaru lae! Bíblia esplika katak ita mak hanesan deʼit ho gafañotu se kompara ho Kriadór Boot. No ita-nia kbiit atu hanoin mós limitadu se kompara ho Maromak nia kbiit. (Isaias 40:22; 55:8, 9) Tan neʼe, klaru katak iha buat balu kona-ba Maromak Jeová neʼebé ita ema labele atu komprende.

Maski susar atu komprende katak Maromak iha husi tempu uluk kedas, ita bele haree katak neʼe lójiku. Se iha ida mak kria Maromak, neʼe katak ida neʼebé kria nia mak bolu nuʼudar Kriadór. Maibé Bíblia esplika katak Maromak Jeová mak ida neʼebé ‘kria buat hotu’. (Apokalipse 4:11) Liután neʼe, ita mós hatene katak universu neʼe iha ninia hahú. (Génesis 1:1, 2) Oinsá mak universu neʼe bele mosu? Tenke iha uluk ida neʼebé kria. No Kriadór neʼe iha antes kriatura matenek sira seluk iha, hanesan Jesus Kristu no anju sira. (Job 38:4, 7; Koloso 1:15) Entaun klaru, Maromak mesak deʼit mak iha primeiru. Antes nia la iha ida seluk, tan neʼe la iha ida mak kria nia.

Tanba ita ema no universu neʼe iha, mak prova katak iha duni Maromak neʼebé rohan-laek. Ida neʼebé tau lei sira atu kontrola iha universu tomak, iha husi uluk kedas. Só nia deʼit mak fó moris ba buat hotu-hotu.—Job 33:4.