1, 2. (a) Prezente hanesan saida mak iha folin-boot ba Ita? (b) Tanbasá Jesus nia sakrifísiu mak prezente folin-boot liu hotu ba ita?

SAIDA mak prezente diʼak liu hotu neʼebé Ita simu? Tuir loloos, prezente neʼebé diʼak la presiza karun. Maski prezente ida baratu, maibé prezente neʼe bele iha folin-boot ba ita. Se prezente ida halo ita kontente ka bele uza iha ita-nia moris, prezente neʼe iha folin-boot.

² Husi prezente hotu neʼebé ita bele simu, iha ida neʼebé diʼak liu hotu. Prezente neʼe mak prezente neʼebé Maromak fó ba ema hotu. Maromak Jeová fó buat barak mai ita, maibé prezente boot liu hotu mak ninia Oan Jesus Kristu nia moris nuʼudar sakrifísiu atu selu ita-nia sala. (Mateus 20:28) Hanesan ita sei haree iha kapítulu neʼe, sakrifísiu neʼe mak prezente folin-boot liu hotu tanba prezente  neʼe bele halo ita haksolok tebes, no fó buat importante liu neʼebé ita presiza. Tuir loloos, dalan boot liu neʼebé Maromak Jeová hatudu nia domin ba ita mak hodi fó Jesus nia moris nuʼudar sakrifísiu.

3. Tanbasá mak ita presiza Jesus nia moris nuʼudar sakrifísiu? Saida mak ita tenke komprende atubele hatene tansá Jesus nia sakrifísiu iha folin-boot?

³ Maromak Jeová fó Jesus nia moris nuʼudar sakrifísiu hodi salva ema husi sala no mate. (Éfeso 1:7) Atu komprende kona-ba hanorin neʼe husi Bíblia, ita tenke hanoin fali ba buat neʼebé akontese iha jardín Eden. Se ita hatene buat neʼebé Adão halo lakon kuandu nia halo sala, ita bele komprende tansá mak Jesus nia sakrifísiu hanesan prezente folin-boot mai ita.

4. Tanba Adão mak ema perfeitu, ninia moris hanesan saida?

⁴ Kuandu Maromak Jeová kria Adão, Nia fó buat neʼebé folin-boot, neʼe mak moris nuʼudar ema perfeitu. Moris perfeitu katak sá? Adão iha isin ho neon neʼebé la iha sala ida, tan neʼe nia nunka moras, sai katuas, ka mate. Tanba nia ema perfeitu, nia iha relasaun espesiál ho Jeová. Bíblia hatete katak Adão mak “Maromak nia oan”. (Lucas 3:38) Nuneʼe, Adão iha relasaun neʼebé besik tebes ho Maromak Jeová, hanesan relasaun entre oan no aman neʼebé hadomi malu. Maromak Jeová koʼalia beibeik ho nia oan iha mundu. Jeová fó serbisu neʼebé halo Adão kontente, no fó-hatene buat neʼebé Nia hakarak Adão atu halo.—Gênesis (Kejadian) 1:28-30; 2:16, 17.

5. Kuandu Bíblia hatete katak Maromak kria Adão “tuir nia ilas”, neʼe katak sá loos?

 ⁵ Maromak kria Adão “tuir nia ilas”. (Gênesis [Kejadian] 1:27; Tiago 3:9) Ida-neʼe la dehan katak Adão iha oin hanesan Maromak. Hanesan ita aprende ona iha Kapítulu 1 husi livru neʼe, ita la bele haree Maromak Jeová tanba nia laʼós ema. (João 4:24) Tan neʼe, Maromak Jeová la iha isin ho raan hanesan ema. Maromak kria Adão tuir nia ilas, neʼe katak Adão hatudu hahalok hanesan Maromak nian, hanesan domin, matenek, justisa, no kbiit. Adão mós tuir nia Aman nia ilas iha dalan importante seluk, neʼe mak nia iha liberdade atu hili. Ho nuneʼe, Adão la hanesan boneka neʼebé la iha hanoin. Adão bele foti desizaun ba nia an rasik hodi hili atu halo buat neʼebé loos ka sala. Se nia hili atu halo tuir Maromak, nia sei moris ba nafatin iha Paraízu iha mundu.

6. Kuandu Adão la halo tuir Maromak, nia halo lakon saida deʼit? Oinsá mak ida-neʼe kona Adão nia bei-oan hotu?

⁶ Kuandu Adão la halo tuir Maromak, Adão simu kastigu-mate, no nia lakon buat neʼebé folin-boot tebes, neʼe mak moris perfeitu, no mós bensaun hotu nuʼudar ema perfeitu. (Gênesis [Kejadian] 3:17-19) Triste tebes, Adão halo lakon moris diʼak neʼe ba nia an no mós ba ninia bei-oan neʼebé seidauk moris. Maromak nia Liafuan hatete: “Liuhusi ema ida mak sala tama iha mundu, no mate tanba sala. Nuneʼe mate habelar ba ema hotu tanba ema hotu sala.” (Roma 5:12) Sin, ita hotu simu sala husi Adão. Tan neʼe, Bíblia hatete katak Adão “faʼan” nia an no nia bei-oan sira sai atan ba sala  no mate. (Roma 7:14) La iha esperansa tan ba Adão no Eva tanba sira ho neon hili rasik atu la halo tuir Maromak. Maibé oinsá ho sira-nia bei-oan, inklui mós ita hotu?

7, 8. Prezente neʼebé Maromak fó, selu buat rua saida?

⁷ Maromak Jeová salva ema hodi fó prezente ida, neʼe mak Jesus nia moris nuʼudar sakrifísiu. Prezente neʼe kumpre buat rua. Primeiru, prezente neʼe sosa fali ita. Prezente neʼe hanesan ho osan neʼebé inan-aman tenke fó ba ema neʼebé naʼok sira-nia oan, atu hetan fali sira-nia oan. Segundu, prezente neʼe selu buat ida neʼebé lakon. Ida-neʼe hanesan ho osan neʼebé ema fó atu selu buat neʼebé lakon ka estraga. Porezemplu, se ema nia animál estraga ema seluk nia toʼos, tenke selu osan neʼebé iha folin hanesan ho buat neʼebé animál estraga iha toʼos laran.

⁸ Oinsá mak bele selu fali buat folin-boot tebes neʼebé Adão halo lakon no salva ita husi sala no mate? Mai ita koʼalia kona-ba oinsá mak Maromak Jeová arranja atu sosa fali ita liuhusi Jesus nia sakrifísiu no bensaun neʼebé ita bele hetan.

9. Tanbasá mak presiza moris perfeitu atu sosa fali buat neʼebé Adão halo lakon?

⁹ Tanba Adão halo lakon moris perfeitu, la bele sosa fali buat neʼebé lakon ho moris neʼebé la perfeitu. (Salmo [Mazmur] 49:7, 8; Mateus 16:26) Buat neʼebé lakon tenke selu fali ho folin hanesan. Ida-neʼe tuir Maromak nia justisa neʼebé perfeitu neʼebé  temi iha ninia Liafuan. Porezemplu, Bíblia hatete: “Moris sei troka moris.” (Deuteronômio [Ulangan] 19:21; Mateus 5:38) Nuneʼe, oinsá mak bele selu fali moris perfeitu nia folin neʼebé Adão halo lakon? Presiza moris perfeitu ida seluk.—1 Timóteo 2:6.

10. Oinsá mak Maromak Jeová arranja atu selu fali buat neʼebé Adão halo lakon?

¹⁰ Oinsá mak Maromak Jeová arranja atu selu fali buat neʼebé Adão halo lakon? Nia haruka anju ida toʼo mundu. Nia haruka anju neʼebé nia hadomi liu, ninia Oan-Mane mesak. (1 João 4:9, 10) Oan-Mane neʼe prontu atu husik ninia hela-fatin iha lalehan hodi tun mai rai. (Filipe 2:7) Hanesan ita aprende tiha ona iha Kapítulu 4 husi livru neʼe, Maromak Jeová halo milagre hodi muda ninia Oan nia moris ba Maria nia knotak. Liuhusi Maromak nia espíritu santu, Jesus moris mai nuʼudar ema perfeitu neʼebé la presiza mate tanba sala.—Lucas 1:35.

11. Oinsá mak Maromak Jeová bele uza ema ida deʼit atu sosa fali ema rihun ba rihun?

¹¹ Oinsá mak Maromak Jeová bele uza ema ida deʼit atu sosa fali ema barak, katak ema rihun ba rihun? Entaun, oinsá mak ema rihun ba rihun sai atan ba sala? Hanoin-hetan katak hodi halo sala, Adão halo lakon buat neʼebé folin-boot, neʼe mak moris nuʼudar ema perfeitu. Nuneʼe, nia la bele iha oan neʼebé perfeitu. Ninia oan no bei-oan hotu sala-naʼin no ikusmai mate. Maibé, Jesus neʼebé Bíblia bolu nuʼudar “Adão neʼebé ikus”, iha moris nuʼudar ema perfeitu, no nia nunka halo sala.  (1 Korinto 15:45) Tan neʼe, Jesus bele troka Adão hodi salva ita. Tanba Jesus halo tuir Maromak iha buat hotu, nia loloos bele moris ba nafatin, nia la presiza mate. Maibé, nia prontu atu saran ninia moris perfeitu hodi selu buat neʼebé lakon ona tanba Adão nia sala. Hodi halo nuneʼe, Jesus fó esperansa ba Adão nia bei-oan hotu.—Roma 5:19; 1 Korinto 15:21, 22.

12. Jesus nia terus hatudu saida?

¹² Bíblia konta buat barak kona-ba Jesus nia terus antes nia mate. Ema baku nia ho xikote, ema hedi nia iha ai-riin no husik nia terus toʼo mate. (João 19:1, 16-18, 30; Apéndise, pájina 235-6) Tanbasá mak Jesus presiza terus barak hanesan neʼe? Iha kapítulu seluk iha livru neʼe, ita sei haree katak Satanás hasaʼe lia kona-ba Maromak Jeová nia atan sira. Tuir Satanás, Maromak Jeová nia atan sira sei la laran-metin ba nia kuandu sira hetan susar. Maibé hodi tahan ho laran-metin, maski hasoru terus boot, Jesus hatudu katak lia neʼebé Satanás hasaʼe laloos. Jesus hatudu iha dalan kompletu katak ema perfeitu neʼebé livre atu hili, bele halo tuir Maromak maski Satanás halo saida deʼit. Klaru katak Jeová kontente tebes tanba ninia Oan doben laran-metin nafatin!—Provérbios (Amsal) 27:11.

13. Saida mak Maromak Jeová halo atu sosa fali Adão nia bei-oan husi sala?

¹³ Saida mak Maromak Jeová halo atu sosa fali Adão nia bei-oan husi sala? Iha loron 14 fulan-Nisan iha tinan 33 tuir ema judeu sira-nia kalendáriu, Maromak husik ema oho ninia Oan  perfeitu neʼebé nunka halo sala. Neʼe duni, Jesus saran ninia moris nuʼudar ema perfeitu “dala ida ba nafatin”. (Ebreu 10:10) Iha loron tolu tuirmai, Maromak Jeová halo Jesus moris hiʼas fali nuʼudar kriatura espíritu ida. Tanba Jesus sei iha direitu atu moris nuʼudar ema perfeitu iha mundu, kuandu nia fila fali ba lalehan, nia saran direitu neʼe ba Maromak. No Maromak uza folin neʼe atu sosa fali Adão nia bei-oan sira. (Ebreu 9:24) Maromak Jeová simu Jesus nia sakrifísiu nuʼudar folin atu salva ema husi sala no mate.—Roma 3:23, 24.

14, 15. Atu ‘hetan perdua ba ita-nia sala sira’, ita tenke halo saida?

¹⁴ Maski ita hotu atan ba sala, maibé ita bele hetan bensaun kapás tebes tanba Jesus nia sakrifísiu. Mai ita hanoin kona-ba bensaun balu neʼebé ita hetan agora no iha futuru liuhusi Maromak nia prezente neʼebé folin-boot liu hotu.

¹⁵ Hetan perdua ba ita-nia sala. Tanba sala neʼebé ita simu husi Adão, ita tenke hakaʼas an atu halo buat neʼebé loos. Ita hotu halo sala liuhusi ita-nia liafuan ka hahalok. Maibé liuhusi Jesus nia sakrifísiu, ita bele ‘hetan perdua ba ita-nia sala sira’. (Koloso 1:13, 14) Maski nuneʼe, atu hetan perdua neʼe, ita tenke hakribi sala neʼebé ita halo no arrepende an. Ita mós tenke husu ho haraik-an ba Jeová atu fó perdua mai ita liuhusi ninia Oan nia sakrifísiu.—1 João 1:8, 9.

16. Tanbasá mak ita bele sente katak Maromak simu ita-nia adorasaun? Ida-neʼe lori bensaun saida mai ita?

 ¹⁶ Sente katak Maromak simu ita. Se ita hanoin katak Maromak la simu ita, ita bele lakon esperansa no sente katak ita la iha folin. Maibé, tanba ita bele hetan perdua liuhusi Jesus nia sakrifísiu, Maromak Jeová ho laran-diʼak loke dalan atu ita bele adora nia, no ita sente katak nia simu ita maski ita sala-naʼin. (Ebreu 9:13, 14) Nuneʼe, ita bele hakbesik ba Maromak Jeová iha orasaun, no sente katak nia rona ita-nia orasaun hotu. (Ebreu 4:14-16) Se ita haburas relasaun diʼak ho Maromak Jeová, ita bele hetan dame iha laran, hafolin ita-nia an, no sai kontente liu.

17. Tanba Jesus mate ba ita, ita bele simu bensaun saida deʼit?

¹⁷ Esperansa atu moris ba nafatin iha mundu foun. Eskritura iha Roma 6:23 dehan: “Sala nia kolen mak mate, maibé prezente neʼebé Maromak fó mak moris rohan-laek liuhusi Kristu Jesus ita Naʼi.” Iha Kapítulu 3 husi livru neʼe, ita estuda ona kona-ba  bensaun sira neʼebé ema sei simu iha mundu foun. (Apokalipse 21:3, 4) Ita bele simu bensaun sira iha futuru no mós moris ba nafatin ho saúde perfeitu, tanba Jesus mate ba ita. Maibé atu bele simu bensaun sira-neʼe, ita tenke hatudu katak ita hafolin Jesus nia sakrifísiu.

18. Tanbasá mak ita tenke fó-agradese ba Maromak Jeová kona-ba Jesus nia sakrifísiu?

¹⁸ Tanbasá mak ita tenke fó-agradese ba Maromak Jeová kona-ba Jesus nia sakrifísiu? Hanoin toʼok, kuandu ema gasta tempu, hakaʼas an, ka gasta osan hodi fó prezente ba ita, prezente neʼe iha folin-boot liu. Prezente neʼe book ita-nia laran tanba ita hatene katak ema neʼebé fó prezente hadomi tebes ita. Eskritura iha João 3:16 hatete: “Maromak hadomi tebes mundu toʼo fó Nia Oan-Mane mesak.” Jesus nia sakrifísiu mak prezente neʼebé iha folin-boot liu hotu, tanba Maromak saran nia Oan doben hodi fó prezente neʼe mai ita. Ida-neʼe hatudu katak Jeová hadomi tebes ita ema. Sakrifísiu neʼe mós hatudu katak Jesus hadomi ita, tanba nia prontu atu saran ninia moris ba ita. (João 15:13) Tan neʼe, Jesus nia sakrifísiu mak prezente ida neʼebé halo ita fiar katak Maromak Jeová no ninia Oan hadomi duni ita ida-idak.—Galásia 2:20.

19, 20. Oinsá mak ita bele hatudu katak ita hafolin Jesus nia sakrifísiu nuʼudar prezente husi Maromak?

¹⁹ Entaun, oinsá mak ita bele hatudu katak ita hafolin prezente neʼe? Primeiru, hakaʼas an atu  hatene liután kona-ba Maromak Jeová, Ida neʼebé fó nia Oan tan ita. (João 17:3) Estuda Bíblia hodi uza livru ida-neʼe sei ajuda ita atu hatene liután kona-ba Jeová. Kuandu ita halo nuneʼe, ita-nia domin ba nia sei sai boot liu. Tuirmai, ita-nia domin sei book ita atu halo kontente Jeová.—1 João 5:3.

²⁰ Hatudu fiar ba Jesus nia sakrifísiu. Bíblia hatete: “Ema neʼebé hatudu fiar ba Oan-Mane hetan moris rohan-laek.” (João 3:36) Oinsá mak ita bele hatudu fiar ba Jesus? Ita la hatudu fiar neʼe ho liafuan deʼit. Eskritura iha Tiago 2:26 dehan: “Fiar la hamutuk ho hahalok mate.” Sin, ita hatudu fiar neʼebé loos liuhusi ita-nia “hahalok”. Dalan ida atu hatudu katak ita fiar ba Jesus mak hakaʼas an atu halo tuir ninia ezemplu, laʼós deʼit ho buat neʼebé ita koʼalia maibé mós ho ita-nia hahalok.—João 13:15.

21, 22. (a) Tanbasá mak ita tenke tuir reuniaun atu komemora Naʼi nia Han-Kalan tinan-tinan? (b) Saida mak sei esplika iha Kapítulu 6 no 7?

²¹ Tinan-tinan, tuir reuniaun atu komemora Naʼi nia Han-Kalan. Iha kalan 14 fulan-Nisan tinan 33, Jesus hahú selebrasaun espesiál neʼebé Bíblia bolu nuʼudar “Naʼi nia han-kalan”. (1 Korinto 11:20; Mateus 26:26-28) Selebrasaun neʼe mós bolu nuʼudar Memoriál kona-ba Kristu nia mate. Jesus hahú selebrasaun neʼe atu ajuda ninia apóstolu sira no mós ema hotu neʼebé sai kristaun loos, atu hanoin-hetan katak liuhusi ninia mate nuʼudar ema perfeitu, nia saran nia moris atu selu ema nia sala. Jesus fó mandamentu kona-ba selebrasaun  neʼe hodi dehan: “Kontinua halo ida-neʼe hodi hanoin haʼu.” (Lucas 22:19) Kuandu ita tuir reuniaun atu komemora Kristu nia mate, ita hanoin fali kona-ba domin boot neʼebé Maromak Jeová ho Jesus hatudu mai ita hodi saran Jesus nia moris nuʼudar sakrifísiu. Nuneʼe, ita bele hatudu katak ita hafolin Jesus nia sakrifísiu bainhira ita tuir reuniaun atu komemora Jesus nia mate tinan-tinan. *

²² Loos duni, hodi fó Jesus nia moris nuʼudar sakrifísiu atu selu ita-nia sala, Maromak Jeová fó prezente folin-boot liu hotu. (2 Korinto 9:14, 15) Prezente neʼe mós bele ajuda ema neʼebé mate ona. Kapítulu 6 no 7 sei esplika kona-ba ida-neʼe.